ತಿರುವನಂತಪುರಂ: ವೀರ್ ಸಾವರ್ಕರ್ ಅವರ ಹೆಸರಲ್ಲಿ ನೀಡಲಾದ ‘ವೀರ್ ಸಾವರ್ಕರ್ ಅಂತರರಾಷ್ಟ್ರೀಯ ಇಂಪ್ಯಾಕ್ಟ್ ಪ್ರಶಸ್ತಿ 2025’ ಅನ್ನು ಕಾಂಗ್ರೆಸ್ ಹಿರಿಯ ನಾಯಕ ಹಾಗೂ ತಿರುವನಂತಪುರಂ ಸಂಸದ ಶಶಿ ತರೂರ್ ನಿರಾಕರಿಸಿದ್ದಾರೆ. ಪ್ರಶಸ್ತಿಯ ಸ್ವರೂಪ, ಅದು ನೀಡುವ ಸಂಸ್ಥೆ ಹಾಗೂ ಸಂಬಂಧಿತ ವಿವರಗಳ ಬಗ್ಗೆ ಯಾವುದೇ ಸ್ಪಷ್ಟನೆ ನೀಡದಿರುವುದು ಇದಕ್ಕೆ ಕಾರಣ ಎಂದು ಅವರು ಹೇಳಿದ್ದಾರೆ.
ಪ್ರಶಸ್ತಿಗೆ ನಾಮನಿರ್ದೇಶನಗೊಂಡಿರುವ ವಿಚಾರ ಮಾಧ್ಯಮ ವರದಿಗಳ ಮೂಲಕವೇ ತಿಳಿದುಕೊಂಡೆ ಎಂದು ತರೂರ್ ತಿಳಿಸಿದ್ದಾರೆ. “ಪ್ರಶಸ್ತಿಯ ಸ್ವರೂಪ, ಸಂಸ್ಥೆಯ ಮಾಹಿತಿ, ಯಾವುದೇ ಪ್ರಾಸಂಗಿಕ ವಿವರಗಳ ಗೈರು–ಸಾನ್ನಿಧ್ಯದಲ್ಲಿ, ನಾನು ಕಾರ್ಯಕ್ರಮಕ್ಕೆ ಹಾಜರಾಗುವ ಅಥವಾ ಪ್ರಶಸ್ತಿಯನ್ನು ಸ್ವೀಕರಿಸುವ ಪ್ರಶ್ನೆಯೇ ಉದ್ಭವಿಸುವುದಿಲ್ಲ,” ಎಂದು ಆನ್ಲೈನ್ ಪೋಸ್ಟ್ನಲ್ಲಿ ಅವರು ಸ್ಪಷ್ಟಪಡಿಸಿದ್ದಾರೆ.
HRDS (High Range Rural Development Society) ಎಂಬ ಎನ್ಜಿಒ ವತಿಯಿಂದ ಸ್ಥಾಪಿಸಲಾದ ಈ ಪ್ರಶಸ್ತಿಯ ಮೊದಲ ಸ್ವೀಕರಿಸುವವರಾಗಿ ತರೂರ್ರನ್ನು ಘೋಷಿಸಲಾಗಿತ್ತು. ಇಂದು ನವದೆಹಲಿಯ ಎನ್ಡಿಎಂಸಿ ಕನ್ವೆನ್ಷನ್ ಹಾಲ್ನಲ್ಲಿ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಪ್ರಶಸ್ತಿಯನ್ನು ಉದ್ಘಾಟಿಸಲು ನಿಗದಿಯಿತ್ತು.
“ನನ್ನ ಅನುಮತಿಯಿಲ್ಲದೆ ಹೆಸರನ್ನು ಘೋಷಿಸಿದುದು ಆಯೋಜಕರ ಬೇಜವಾಬ್ದಾರಿ” ಎಂದು ತರೂರ್ ಗರಂ ಆಗಿದ್ದಾರೆ. ಕೇರಳದಲ್ಲಿದ್ದಾಗಲೇ ಪ್ರಶಸ್ತಿ ವಿಷಯ ತಿಳಿದುಕೊಂಡೆಂದೂ, ಸಂಘಟಕರು ಮುಂಚಿತವಾಗಿ ವಿಚಾರಿಸದೇ, ತನ್ನ ಹೆಸರನ್ನು ಪ್ರಕಟಿಸಿರುವುದು ಸರಿಯಲ್ಲ ಎಂದೂ ಅವರು ಟೀಕಿಸಿದ್ದಾರೆ.
ಈ ವಿಚಾರ ಕಾಂಗ್ರೆಸ್ ವಲಯದಲ್ಲಿ ವಿವಾದಕ್ಕೆ ಕಾರಣವಾಗಿದ್ದು, ಕೇರಳದ ಕಾಂಗ್ರೆಸ್ ಹಿರಿಯ ಮುರಳೀಧರನ್, “ಇಂತಹ ಪ್ರಶಸ್ತಿಯನ್ನು ಸ್ವೀಕರಿಸುವುದು ಪಕ್ಷಕ್ಕೆ ಅವಮಾನ” ಎಂದು ಪ್ರತಿಕ್ರಿಯಿಸಿದ್ದರು. ಬಲಪಂಥೀಯರಲ್ಲಿ ಸ್ವಾತಂತ್ರ್ಯ ಹೋರಾಟದ ‘ಕ್ರಾಂತಿಕಾರಿ ಐಕಾನ್’ ಎಂದು ಪರಿಗಣಿಸಲ್ಪಡುವ ಸಾವರ್ಕರ್ ಕುರಿತಾಗಿ ಕಾಂಗ್ರೆಸ್ನ ನಿಲುವು ಸದಾ ಭಿನ್ನವಾಗಿದೆ.
ತರೂರ್ ಸಾವರ್ಕರ್ ಬಗ್ಗೆ ನೇರವಾಗಿ ಯಾವುದೇ ಹೇಳಿಕೆ ನೀಡದಿದ್ದರೂ, ಅವರ ಹೆಸರಿನ ಪ್ರಶಸ್ತಿಯನ್ನು ನಿರಾಕರಿಸಿರುವುದು ಕಾಂಗ್ರೆಸ್ನ ಪರಂಪರಾ ನಿಲುವಿಗೆ ತಮ್ಮ ಅಂಟಿಕೊಳ್ಳುವಿಕೆಯನ್ನು ತೋರಿಸುತ್ತದೆ ಎಂದು ರಾಜಕೀಯ ವೀಕ್ಷಕರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಇತ್ತೀಚೆಗೆ ತರೂರ್ ತಮ್ಮದೇ ಪಕ್ಷದ ಕಾರ್ಯವೈಖರಿಯನ್ನು ಪ್ರಶ್ನಿಸುವ ಹೇಳಿಕೆಗಳಿಂದ ಸುದ್ದಿಯಲ್ಲಿದ್ದರು. ಆದಾಗ್ಯೂ, “ಕಾಂಗ್ರೆಸ್ ತೊರೆಯುವ ಯೋಚನೆ ಇಲ್ಲ” ಎಂದು ಇತ್ತೀಚೆಗಿನ ಸಂದರ್ಶನದಲ್ಲಿ ಅವರು ಹೇಳಿದ್ದಾರೆ.