ಮೈಸೂರು: ನಂಜನಗೂಡು ತಾಲೂಕಿನ ಕುರಹಟ್ಟಿ ಗ್ರಾಮದಲ್ಲಿ ಪ್ರಕೃತಿಯೊಂದು ಅಚ್ಚರಿಯ ಘಟನೆ ದಾಖಲಾಗಿದೆ. ಗ್ರಾಮದ ರೈತ ರವೀಶ್ ಅವರ ಮೇಕೆಯೊಂದು ಎರಡು ಮರಿಗಳಿಗೆ ಜನ್ಮ ನೀಡಿದ್ದು, ಅವುಗಳಲ್ಲಿ ಒಂದೇ ಮರಿ ಸಾಮಾನ್ಯವಾಗಿದ್ದರೆ, ಇನ್ನೊಂದು ಮರಿ ಎರಡು ತಲೆ, ನಾಲ್ಕು ಕಣ್ಣು, ಎರಡು ಬಾಯಿ ಮತ್ತು ಎರಡು ಕಿವಿಗಳೊಂದಿಗೆ ಜನಿಸಿದ್ದು, ಜನರನ್ನು ಬೆರಗುಗೊಳಿಸಿದೆ.
ಈ ಮರಿ ದೇಹದ ದೃಷ್ಟಿಯಿಂದ ಸಾಮಾನ್ಯವಾಗಿದ್ದರೂ, ತಲೆಯ ಭಾಗದಲ್ಲಿ ಅಪರೂಪದ ವಿಕಾಸ ವೈಷಮ್ಯ (congenital anomaly) ಕಂಡುಬಂದಿದೆ. ಹಾಲು ಕುಡಿಯುವಾಗ ಅದು ತನ್ನ ಎರಡು ಬಾಯಿಗಳಿಂದಲೂ ಹಾಲು ಕುಡಿಯುತ್ತಿರುವುದು ಇನ್ನಷ್ಟು ವಿಚಿತ್ರತೆಯನ್ನು ತಂದುಕೊಟ್ಟಿದೆ.
“ಇಂತಹ ಮರಿಯನ್ನು ನಾನು ಜೀವನದಲ್ಲಿ ಮೊಟ್ಟಮೊದಲು ನೋಡುತ್ತಿದ್ದೇನೆ. ಪ್ರಸ್ತುತ ಅದು ಆರೋಗ್ಯವಾಗಿದೆ. ಆದರೆ ಮುಂದಿನ ದಿನಗಳಲ್ಲಿ ಹೇಗಾಗಬಹುದು ಎಂಬುದರ ಕುರಿತು ಅನುಮಾನವಿದೆ. ಪಶುವೈದ್ಯರ ಸಲಹೆ ಪಡೆಯಲು ಉದ್ದೇಶಿಸಿದ್ದೇನೆ,” ಎಂದು ಮೇಕೆ ಮಾಲೀಕ ರವೀಶ್ ಹೇಳಿದ್ದಾರೆ.
ಜನರಲ್ಲಿ ಕುತೂಹಲ, ತಜ್ಞರಲ್ಲಿ ವೈಜ್ಞಾನಿಕ ಪ್ರಶ್ನೆಗಳು
ಈ ಘಟನೆ ಗ್ರಾಮಸ್ಥರಲ್ಲಿ ಕುತೂಹಲ ಹುಟ್ಟಿಸಿದರೆ, ಪಶು ವೈದ್ಯರಲ್ಲಿ ವೈಜ್ಞಾನಿಕ ಕುತೂಹಲವನ್ನು ಹುಟ್ಟಿಸಿದೆ. ಪಶು ತಜ್ಞರ ಪ್ರಕಾರ – ಪಾಲಿಸೆಫಾಲಿ (Polycephaly) ಎಂಬ ವೈಜ್ಞಾನಿಕ ಸ್ಥಿತಿಯ ಪರಿಣಾಮವಾಗಿ ಪ್ರಾಣಿಗಳು ಎರಡು ತಲೆಗಳೊಂದಿಗೆ ಹುಟ್ಟಬಹುದು.
ಇದು ಭ್ರೂಣ ವಿಕಸನದ ವೇಳೆ ವರ್ಣತಂತುಗಳ ಸಮಸ್ಯೆ ಅಥವಾ ಅಪೂರ್ಣ ವಿಭಜನೆ (incomplete twinning) ಕಾರಣವಾಗಿರಬಹುದು.ಇಂತಹ ಪ್ರಾಣಿಗಳು ಸಾಮಾನ್ಯವಾಗಿ ಹೆಚ್ಚು ಕಾಲ ಬದುಕುವುದಿಲ್ಲ. ಆದರೆ ಕೆಲವೊಮ್ಮೆ ಅಪರೂಪವಾಗಿ ಆರೋಗ್ಯವಾಗಿಯೇ ಬೆಳೆದ ಘಟನೆಗಳೂ ವರದಿಯಾಗಿದೆ.
2023ರಲ್ಲಿ ಮಧ್ಯಪ್ರದೇಶದ ಇಂದೋರ್‌ನಲ್ಲಿ ಮಾನವನ ಮುಖವನ್ನು ಹೋಲುವ ಮೇಕೆಮರಿ ಜನಿಸಿದ್ದು ದೇಶಾದ್ಯಂತ ಸುದ್ದಿಯಾಯಿತು. ಇತ್ತೀಚಿನ ನಂಜನಗೂಡಿನ ಪ್ರಕರಣವೂ ಅದೇ ಶ್ರೇಣಿಯ ಚರ್ಚೆಗೆ ಕಾರಣವಾಗಿದೆ. ಜನಸಾಮಾನ್ಯರಲ್ಲಿ ಇದು “ಪ್ರಕೃತಿಯ ಅದ್ಭುತ” ಎನ್ನುವ ನಂಬಿಕೆಯನ್ನು ಬಲಪಡಿಸುತ್ತಿದ್ದರೆ, ವಿಜ್ಞಾನಿಗಳು ಇದನ್ನು ಅಪರೂಪದ ವಂಶವಾಹಿ ಸಮಸ್ಯೆಗಳಿಂದ ಈ ರೀತಿ ಆಗಿರುವ ಬಗ್ಗೆ ಶಂಕಿಸಿದ್ದಾರೆ.
ಸದ್ಯಕ್ಕೆ ಕಈ ಮೇಕೆಮರಿ ಆರೋಗ್ಯವಾಗಿದ್ದು, ಸ್ಥಳೀಯರಲ್ಲಿ ಕುತೂಹಲದ ಕೇಂದ್ರವಾಗಿದೆ. ಆದರೆ ಮುಂದೆ ಇದರ ಜೀವನ ಎಷ್ಟು ದಿನ ಸ್ಥಿರವಾಗಿರಲಿದೆ ಎನ್ನುವುದನ್ನು ಪ್ರಕೃತಿ ತೀರ್ಮಾನಿಸಬೇಕಿದೆ.