ಮಂಗಳೂರು: ಕರ್ನಾಟಕ ರಾಜಕಾರಣದ ಆ ʻಗದ್ದುಗೆ’ಯ ಆಟವಿದೆಯಲ್ಲ, ಅದು ಸರ್ಕಸ್ಸಿಗಿಂತಲೂ ಮಜಾ ಕೊಡುತ್ತಿದೆ. ಇತ್ತೀಚೆಗೆ ಸಿದ್ದರಾಮಯ್ಯ ಪುತ್ರರತ್ನ ಯತೀಂದ್ರ ಸಿದ್ದರಾಮಯ್ಯ ಅವರು ಒಂದು ಮುತ್ತು ಉದುರಿಸಿದ್ದಾರೆ. “ನೋಡಿ ಬಾಸ್, ನಮ್ಮ ತಂದೆಯೇ ಮುಂದಿನ ಐದು ವರ್ಷ ಸಿಎಂ ಆಗಿರುತ್ತಾರೆ, ಇದಕ್ಕೆ ಹೈಕಮಾಂಡ್ ಗ್ರೀನ್ ಸಿಗ್ನಲ್ ಕೊಟ್ಟಿದೆ” ಅಂತ ಯತೀಂದ್ರ ಹೇಳಿದ್ದೇ ತಡ, ಇತ್ತ ಕನಕಪುರದ ಬಂಡೆ ಡಿ.ಕೆ. ಶಿವಕುಮಾರ್ ಅವರಿಗೆ ಬೆವರು ಇಳಿದಂತಿದೆ!
ಪುತ್ತೂರಿನಲ್ಲಿ ಕಾಂಗ್ರೆಸ್ ಕಚೇರಿ ಕಟ್ಟೋಕೆ ಹೋದ ಡಿಕೆಶಿಗೆ ಮಾಧ್ಯಮದವರು ಈ ಯತೀಂದ್ರನ ಭವಿಷ್ಯವಾಣಿಯನ್ನು ಮೈಕ್ ಹಿಡಿದು ಕೇಳಿದ್ದಾರೆ. ಡಿಕೆಶಿ ಸುಮ್ಮನೆ ಬಿಡ್ತಾರಾ? ಅವರ ಒಳಗಿರುವ ಆ ಹಳೆ ಚಾಣಕ್ಯ ಎದ್ದು ಕೂತಿದ್ದಾನೆ. “ಬಾಸ್, ಯತೀಂದ್ರ ಅವರೇ ನಮ್ಮ ಹೈಕಮಾಂಡ್. ಅವರು ಹೇಳಿದ ಮೇಲೆ ಮುಗಿಯಿತು, ಅದನ್ನೇ ನಾವೆಲ್ಲಾ ಒಪ್ಪಿಕೊಳ್ಳೋಣ” ಅಂತ ತೀಕ್ಷ್ಣವಾಗಿ ಟಾಂಗ್ ಕೊಟ್ಟಿದ್ದಾರೆ. ಡಿಕೆಶಿ ಮಾತುಗಳಲ್ಲಿ ನಗು ಇತ್ತು ನಿಜ, ಆದರೆ ಅದರ ಹಿಂದಿದ್ದ ವ್ಯಂಗ್ಯ ಸುಡೋ ಬೆಂಕಿಯಂತಿತ್ತು!
ನೋಡಿ ಸ್ವಾಮಿ, ತಂದೆ ಸಿದ್ದರಾಮಯ್ಯನವರು ಸಿಎಂ ಆಗಿ ಕೂತಿದ್ದಾರೆ. ಮಗ ಯತೀಂದ್ರ ಪಕ್ಕದಲ್ಲಿ ನಿಂತು ಅಪ್ಪನ ಹಣೆಬರಹವನ್ನೇ ಬರೆಯುತ್ತಿದ್ದಾರೆ. ದಿಲ್ಲಿಯಲ್ಲಿ ಮಲ್ಲಿಕಾರ್ಜುನ ಖರ್ಗೆ, ರಾಹುಲ್ ಗಾಂಧಿ ಅಂತ ದೊಡ್ಡ ಹೈಕಮಾಂಡ್ ಇರೋದು ಈ ಹುಡುಗನಿಗೆ ಮರೆತು ಹೋದಂತಿದೆ. ಅಪ್ಪನ ಆಶೀರ್ವಾದದ ಮೇಲೆ ರಾಜಕೀಯಕ್ಕೆ ಬಂದ ಈ ‘ಡಾಕ್ಟರಪ್ಪ’, ಈಗ ಕಾಂಗ್ರೆಸ್ ಪಕ್ಷಕ್ಕೇ ಡಾಕ್ಟರ್ ಆಗಿ ಟ್ರೀಟ್ಮೆಂಟ್ ಕೊಡಲು ಶುರು ಮಾಡಿದರೆ ಸಂಕಟ ಆಗೋದು ಡಿಕೆಶಿಗಲ್ಲದೆ ಮತ್ಯಾರಿಗೆ?
ಡಿಕೆಶಿ ಈಗ ʻನೂರು ಕಚೇರಿ’ ಕಟ್ಟುವ ಪ್ಲಾನ್ ಮಾಡ್ತಿದ್ದಾರೆ. ಅತ್ತ ಸಿದ್ದರಾಮಯ್ಯನವರ ಟೀಮಿನವರು ‘ಸಿಎಂ ಕುರ್ಚಿ’ಯನ್ನೇ ಅಪ್ಪಿ ಹಿಡಿಯುವ ಸೀನ್ ಕ್ರಿಯೇಟ್ ಮಾಡ್ತಿದ್ದಾರೆ. “ರಾಜಕಾರಣದಲ್ಲಿ ಧರ್ಮ ಇರಲಿ, ಧರ್ಮದಲ್ಲಿ ರಾಜಕಾರಣ ಬೇಡ” ಅನ್ನೋ ಡಿಕೆಶಿ ಮಾತಿನ ಹಿಂದಿರೋದು ಸಿದ್ದಾಂತವೋ ಅಥವಾ ಸಿದ್ದು ಬಣಕ್ಕೆ ಕೊಟ್ಟ ಎಚ್ಚರಿಕೆಯೋ ಅನ್ನೋದನ್ನ ಅವರೇ ಹೇಳ್ಬೇಕು!
ಮಾರ್ಚ್ 10ಕ್ಕೆ ಶಿಲಾನ್ಯಾಸ ಮಾಡ್ತೀನಿ ಅಂತ ಡಿಕೆಶಿ ಹೇಳಿದ್ದಾರೆ. ಆದರೆ ಅಷ್ಟರಲ್ಲಿ ಯತೀಂದ್ರನ ʻಸಿಗ್ನಲ್’ ಇನ್ಯಾವ ಮಟ್ಟಕ್ಕೆ ಹೋಗುತ್ತೋ? ಅಪ್ಪ ಸಿಎಂ ಆಗಿರೋದು ಯತೀಂದ್ರನಿಗೆ ಖುಷಿ ಇರಬಹುದು, ಆದರೆ ಮಗ ಹೈಕಮಾಂಡ್ನಂತೆ ಆಡಿದರೆ ಪಕ್ಕದಲ್ಲಿರೋ ಕನಕಪುರದ ಬಂಡೆ ಸಿಡಿದು ನಿಲ್ಲೋದು ಗ್ಯಾರಂಟಿ.
ಯತೀಂದ್ರನಿಗೆ ಅಪ್ಪ ಮುಖ್ಯ, ಡಿಕೆಶಿಗೆ ಕುರ್ಚಿ ಮುಖ್ಯ. ಇವರಿಬ್ಬರ ಮಧ್ಯೆ ಕಾಂಗ್ರೆಸ್ ಕಚೇರಿ ಕಟ್ಟೋಕೆ ಹೋಗಿ ಡಿಕೆಶಿ ಸಾಹೇಬರು ಈ ʻಯತೀಂದ್ರ ಹೈಕಮಾಂಡ್’ಗೆ ಶರಣಾಗ್ತಾರಾ ಇಲ್ಲಾ ಉಲ್ಟಾ ಹೊಡೆಯುತ್ತಾರಾ ಕಾದು ನೋಡಬೇಕು. ಬಾಸ್, ನಗು ಬರುತ್ತೆ ಅಲ್ವಾ? ರಾಜಕೀಯ ಅಂದ್ರೆ ಹೀಗೆ… ಒಬ್ಬರಿಗೆ ಕುರ್ಚಿ ಸವಿ, ಇನ್ನೊಬ್ಬರಿಗೆ ಹಗ್ಗ ಜಗ್ಗಾಟದ ನೋವು!
ಕರ್ನಾಟಕ ರಾಜಕಾರಣದ ಈ ಹೊಲಸು ಆಟವಿದೆಯಲ್ಲ, ಅದು ಹಳೆ ಮೈಸೂರಿನ ಗಲ್ಲಿಗಳಿಂದ ಹಿಡಿದು ದಿಲ್ಲಿಯ ಹೈಕಮಾಂಡ್ ಹಜಾರದವರೆಗೆ ಹರಡಿಕೊಂಡಿದೆ. ಅಪ್ಪ ಸಿದ್ದರಾಮಯ್ಯ ಮುಖ್ಯಮಂತ್ರಿ ಕುರ್ಚಿಯಲ್ಲಿ ಕಾಲ ಮೇಲೆ ಕಾಲು ಹಾಕಿ ಕುಳಿತಿದ್ದರೆ, ಅವರ ಮುದ್ದಿನ ಪುತ್ರ ಡಾಕ್ಟರ್ ಯತೀಂದ್ರ ಈಗ ಜ್ಯೋತಿಷಿಯ ಅವತಾರ ಎತ್ತಿದ್ದಾರೆ! ಇಲ್ಲಿ ಅಸಲಿ ಮಜಾ ಇರೋದೇ ಅಲ್ಲಿ. ದಿಲ್ಲಿಯಲ್ಲಿ ಮಲ್ಲಿಕಾರ್ಜುನ ಖರ್ಗೆ ಮತ್ತು ರಾಹುಲ್ ಗಾಂಧಿ ಅಂತ ದೊಡ್ಡ ಹೈಕಮಾಂಡ್ ಇರೋದು ಈ ಹುಡುಗನಿಗೆ ಮರೆತುಹೋದಂತಿದೆ. ಪುತ್ರನ ಈ ‘ಹೈಕಮಾಂಡ್’ ಅವತಾರಕ್ಕೆ ಡಿಕೆಶಿ ಕೊಟ್ಟ ಆ ಒಂದು ಟಾಂಗ್ ಇದೆಯಲ್ಲ, ಅದು ಕನಕಪುರದ ಕಡೆಯಿಂದ ಬಂದ ನೇರ ಗುಂಡಿನಂತಿದೆ!