ಕಾಸರಗೋಡು: “ಸರ್, ನನ್ನ ಸ್ಥಿತಿಯನ್ನು ಸತ್ಯವಾಗಿ ಹೇಳಬೇಕಾದರೆ, ದೇಹದೊಳಗಿಂದಲೇ ಯಾರೋ ತಿಂದುಕೊಳ್ಳುತ್ತಿರುವಂತೆ ಭಾಸವಾಗುತ್ತಿದೆ. ಈ ನೋವು ಸಾಯುವಾಗ ಮಾತ್ರ ಕಡಿಮೆಯಾಗುತ್ತದೆ ಎಂದು ನಾನು ನನ್ನ ತಾಯಿಗೂ ಹೇಳಿದ್ದೇನೆ. ಆದರೂ ನಾನು ಈ ಸ್ಪರ್ಧೆಯಲ್ಲಿ ಭಾಗವಹಿಸಬೇಕೆಂಬ ಬಲವಾದ ಆಸೆ ಹೊಂದಿದ್ದೇನೆ. ದಯವಿಟ್ಟು ಸಹಾಯ ಮಾಡಿ…”
ಈ ಹೃದಯ ವಿದ್ರಾವಕ ಸಂದೇಶ ಕಾಸರಗೋಡು ಜಿಲ್ಲೆಯ 10ನೇ ತರಗತಿ ವಿದ್ಯಾರ್ಥಿನಿ ಸಿಯಾ ಫಾತಿಮಾ ಅವರು ಕೇರಳದ ಸಾಮಾನ್ಯ ಶಿಕ್ಷಣ ಸಚಿವ ವಿ. ಶಿವಂಕುಟ್ಟಿ ಅವರಿಗೆ ವಾಟ್ಸಾಪ್ ಮೂಲಕ ಕಳುಹಿಸಿದ್ದರು. ತ್ರಿಶೂರ್ನಲ್ಲಿ ನಡೆಯುತ್ತಿರುವ ರಾಜ್ಯ ಶಾಲಾ ಕಲೋತ್ಸವದಲ್ಲಿ ಭಾಗವಹಿಸುವ ಕನಸು ಕೈತಪ್ಪುವ ಭಯದಲ್ಲಿದ್ದ ಹುಡುಗಿಯೊಬ್ಬಳ ಕೊನೆಯ ಮನವಿ ಇದಾಗಿತ್ತು.
ಅರಬಿಕ್ ಪೋಸ್ಟರ್ ಡಿಸೈನಿಂಗ್ ವಿಭಾಗದಲ್ಲಿ ಜಿಲ್ಲಾಮಟ್ಟದಲ್ಲಿ ಪ್ರಥಮ ಸ್ಥಾನ ಪಡೆದಿದ್ದ ಸಿಯಾ, ನಂತರ ಅಪರೂಪದ ಹಾಗೂ ತೀವ್ರವಾದ ‘ವ್ಯಾಸ್ಕುಲೈಟಿಸ್’ ಕಾಯಿಲೆಗೆ ತುತ್ತಾದರು. ಚಿಕಿತ್ಸೆಯ ಭಾಗವಾಗಿ ರೋಗನಿರೋಧಕ ಶಕ್ತಿ ಕಡಿಮೆಯಾಗಿದ್ದರಿಂದ ಪ್ರಯಾಣ ಜೀವಾಪಾಯಕಾರಿಯಾಗಿತ್ತು. ಆದರೂ ಕಲೋತ್ಸವದ ಕನಸನ್ನು ಸಿಯಾ ಕೈಬಿಡಲಿಲ್ಲ.
ಸಿಯಾ ಅವರ ಮನವಿಗೆ ಮಾನವೀಯ ಸ್ಪಂದನೆ ದೊರೆತಿದ್ದು, ಸಚಿವರು ವಿಶೇಷ ಆದೇಶ ಹೊರಡಿಸಿ ಮನೆಯಲ್ಲೇ ಇದ್ದು ಆನ್ಲೈನ್ ಮೂಲಕ ಸ್ಪರ್ಧೆಯಲ್ಲಿ ಭಾಗವಹಿಸಲು ಅವಕಾಶ ನೀಡಿದ್ದಾರೆ. ಶನಿವಾರ ಬೆಳಿಗ್ಗೆ ವಿಡಿಯೋ ಕಾನ್ಫರೆನ್ಸ್ ಮೂಲಕ ಸ್ಪರ್ಧೆ ನಡೆಯಲಿದ್ದು, ನ್ಯಾಯಾಧೀಶರು ಆನ್ಲೈನ್ನಲ್ಲೇ ಮೌಲ್ಯಮಾಪನ ಮಾಡಲಿದ್ದಾರೆ.
“ಇದೇ ಮೊದಲ ಬಾರಿಗೆ ರಾಜ್ಯಮಟ್ಟ ತಲುಪಿದ್ದೇನೆ. ಇದನ್ನು ತಪ್ಪಿಸಿಕೊಳ್ಳಲು ಮನಸ್ಸಾಗಲಿಲ್ಲ” ಎಂದು ನೋವಿನ ನಡುವೆಯೂ ಸಿಯಾ ಸಂತಸ ವ್ಯಕ್ತಪಡಿಸಿದ್ದಾರೆ. ಶಾಲಾ ಕಲೋತ್ಸವದ ಇತಿಹಾಸದಲ್ಲೇ ಮೊದಲ ಬಾರಿಗೆ, ಒಬ್ಬ ವಿದ್ಯಾರ್ಥಿನಿಗಾಗಿ ಸ್ಪರ್ಧೆ ಆನ್ಲೈನ್ನಲ್ಲಿ ನಡೆಯುತ್ತಿರುವುದು ಮಾನವೀಯತೆಗೆ ದೊರೆತ ಜಯವಾಗಿಯೇ ಕಾಣುತ್ತಿದೆ.
ನೋವಿನ ನಡುವೆಯೂ ಸಿಯಾ ಸಂತಸದಲ್ಲಿದ್ದಾರೆ. “7ನೇ ತರಗತಿಯಿಂದಲೇ ನಾನು ಅರಬಿಕ್ ಪೋಸ್ಟರ್ ಮೇಕಿಂಗ್ನಲ್ಲಿ ಭಾಗವಹಿಸುತ್ತಿದ್ದೇನೆ. ಪ್ರತೀ ಬಾರಿ ಜಿಲ್ಲಾಮಟ್ಟದವರೆಗೆ ಬಂದಿದ್ದೇನೆ. ಇದೇ ಮೊದಲ ಬಾರಿಗೆ ರಾಜ್ಯಮಟ್ಟ ತಲುಪಿದ್ದೇನೆ. ಇದನ್ನು ತಪ್ಪಿಸಿಕೊಳ್ಳಲು ಮನಸ್ಸಾಗಲಿಲ್ಲ” ಎಂದು ಅವರು ಹೇಳಿದ್ದಾರೆ.
‘ವ್ಯಾಸ್ಕುಲೈಟಿಸ್’ ಎಂದರೇನು?
ಸಿಯಾ ಅವರ ತಂದೆ ಅಬ್ದುಲ್ ಮುನೀರ್ (ಆಟೋ ಚಾಲಕ) ಮತ್ತು ತಾಯಿ ಸಾರಾ ಎಲ್.ಕೆ. ಅವರ ಪ್ರಕಾರ, ಕಾಲಿನ ಸಣ್ಣ ಗುಳ್ಳೆಯಿಂದ ಆರಂಭವಾದ ತೊಂದರೆ ನಿಧಾನವಾಗಿ ದೇಹವಿಡೀ ತೀವ್ರ ನೋವಿನ ರೂಪ ಪಡೆದುಕೊಂಡಿತು. ಎರಡು ತಿಂಗಳಿಗೂ ಹೆಚ್ಚು ಕಾಲ ಅಸಹನೀಯ ವೇದನೆ ಅನುಭವಿಸಿದ ಬಳಿಕ, ಕಣ್ಣೂರು ಬಿಬಿ ಮೆಮೋರಿಯಲ್ ಆಸ್ಪತ್ರೆಯಲ್ಲಿ ನಡೆಸಿದ ಸಮಗ್ರ ಪರೀಕ್ಷೆಯಲ್ಲಿ ‘ವ್ಯಾಸ್ಕುಲೈಟಿಸ್’ ಎಂಬ ಅಪರೂಪದ ರೋಗವಿದೆ ಎಂದು ದೃಢಪಟ್ಟಿತು.
ವ್ಯಾಸ್ಕುಲೈಟಿಸ್ ಎನ್ನುವುದು ದೇಹದ ರೋಗನಿರೋಧಕ ವ್ಯವಸ್ಥೆಯೇ ತನ್ನದೇ ರಕ್ತನಾಳಗಳ ಮೇಲೆ ದಾಳಿ ಮಾಡುವ ಗಂಭೀರ ಕಾಯಿಲೆ. ಇದರಿಂದ ರಕ್ತನಾಳಗಳಲ್ಲಿ ಉರಿಯೂತ ಉಂಟಾಗಿ ರಕ್ತಸಂಚಾರಕ್ಕೆ ಅಡ್ಡಿಪಡುತ್ತದೆ. ಪರಿಣಾಮವಾಗಿ ತೀವ್ರ ನೋವು, ಚರ್ಮ ಗಾಯಗಳು ಹಾಗೂ ಕೆಲವೊಮ್ಮೆ ಒಳಾಂಗಗಳಿಗೆ ಹಾನಿಯೂ ಸಂಭವಿಸಬಹುದು.
ಈ ರೋಗದ ನಿಯಂತ್ರಣಕ್ಕಾಗಿ ಸಿಯಾ ಅವರಿಗೆ ಪ್ರಸ್ತುತ ಸೈಕ್ಲೋಫಾಸ್ಫಮೈಡ್ ಎಂಬ ರೋಗನಿರೋಧಕ ಶಕ್ತಿ ಕಡಿಮೆ ಮಾಡುವ ಇಂಜೆಕ್ಷನ್ ಮೂಲಕ ಚಿಕಿತ್ಸೆ ನೀಡಲಾಗುತ್ತಿದೆ. ಚಿಕಿತ್ಸೆ ಪರಿಣಾಮಕಾರಿಯಾಗಲು ಸೋಂಕುಗಳಿಂದ ಸಂಪೂರ್ಣ ದೂರವಿರಬೇಕು ಎಂಬ ಕಾರಣಕ್ಕೆ ವೈದ್ಯರು ಕಠಿಣ ಐಸೊಲೇಷನ್ ಹಾಗೂ ಪ್ರಯಾಣ ನಿಷೇಧವನ್ನು ವಿಧಿಸಿದ್ದಾರೆ.
