ಹೈದರಾಬಾದ್: ಪ್ರಭಾಸ್ ಅಭಿನಯದ ಬಹು ನಿರೀಕ್ಷಿತ ಚಿತ್ರ ‘ದಿ ರಾಜಾ ಸಾಬ್’ ಚಿತ್ರದ ಪ್ರಚಾರ ಕಾರ್ಯಕ್ರಮದ ವೇಳೆ ಹೈದರಾಬಾದ್ನ ಲುಲು ಮಾಲ್ನಲ್ಲಿ ಅಹಿತಕರ ಘಟನೆ ನಡೆದಿದ್ದು, ನಟಿ ನಿಧಿ ಅಗರ್ವಾಲ್ ಅವರಿಗೆ ಅಭಿಮಾನಿಗಳ ಗುಂಪಿನಿಂದ ನಡೆದ ಕಿರುಕುಳ ಘಟನೆ ವ್ಯಾಪಕ ಆಕ್ರೋಶಕ್ಕೆ ಕಾರಣವಾಗಿದೆ. ತನ್ನ ಮೇಲೆ ಮೃಗೀಯವಾಗಿ ವರ್ತಿಸಿದ ಪುರುಷರ ಗುಂಪನ್ನು ʻಕತ್ತೆಕಿರುಬʼಗಳಿಗೆ ಹೋಲಿಸಿದ್ದಾರೆ.
ಡಿಸೆಂಬರ್ 17ರಂದು ಲುಲು ಮಾಲ್ನಲ್ಲಿ ಆಯೋಜಿಸಲಾಗಿದ್ದ ಚಿತ್ರದ ‘ಸಹನಾ ಸಹನಾ’ ಹಾಡಿನ ಪ್ರಚಾರ ಸಮಾರಂಭದ ವೇಳೆ, ನಿಧಿ ಅಗರ್ವಾಲ್ ಅಭಿಮಾನಿಗಳೊಂದಿಗೆ ಸೆಲ್ಫಿ ತೆಗೆದುಕೊಳ್ಳಲು ಹಾಗೂ ಮಾತಾಡಲು ಮುಂದಾದಾಗ, ಅಚಾನಕ್ ಅಭಿಮಾನಿಗಳ ಗುಂಪು ಭದ್ರತಾ ತಡೆಗೋಡೆಗಳನ್ನು ದಾಟಿ ಅವರತ್ತ ದೌಡಾಯಿಸಿತು. ಜನಸಂದಣಿ ನಿಯಂತ್ರಣ ತಪ್ಪಿದ ಪರಿಣಾಮ, ಭದ್ರತಾ ಸಿಬ್ಬಂದಿ ನಟಿಯನ್ನು ಸುರಕ್ಷಿತವಾಗಿ ಕಾರಿನತ್ತ ಕರೆದೊಯ್ಯಲು ಹರಸಾಹಸ ಪಟ್ಟರು.
ಈ ಸಂದರ್ಭದಲ್ಲಿ ಅಭಿಮಾನಿಗಳು ನಿಧಿ ಅಗರ್ವಾಲ್ ಅವರ ದುಪಟ್ಟಾವನ್ನು ಹಿಡಿದುಕೊಂಡಿರುವ ದೃಶ್ಯಗಳು ವೀಡಿಯೊಗಳಲ್ಲಿ ಸೆರೆ ಹಿಡಿಯಲ್ಪಟ್ಟಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಡಿವೆ. ಈ ಘಟನೆ ಮಹಿಳಾ ಕಲಾವಿದರ ಸುರಕ್ಷತೆ ಕುರಿತಾಗಿ ಗಂಭೀರ ಪ್ರಶ್ನೆಗಳನ್ನು ಎಬ್ಬಿಸಿದೆ.
ಘಟನೆಯ ಕುರಿತು ಖ್ಯಾತ ಗಾಯಕಿ ಚಿನ್ಮಯಿ ಶ್ರೀಪಾದ ಅವರು ಸಾಮಾಜಿಕ ಜಾಲತಾಣ ‘ಎಕ್ಸ್’ನಲ್ಲಿ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. “ಕತ್ತೆಕಿರುಬಗಳಿಗಿಂತಲೂ ಕೆಟ್ಟ ರೀತಿಯಲ್ಲಿ ಪುರುಷರ ಗುಂಪೊಂದು ವರ್ತಿಸಿದೆ. ವಾಸ್ತವವಾಗಿ ಕತ್ತೆಕಿರುಬಗಳನ್ನು ಅವಮಾನಿಸುವ ಅಗತ್ಯವೇನು? ‘ಸಮಾನ ಮನಸ್ಸಿನ’ ಪುರುಷರನ್ನು ಗುಂಪಾಗಿ ಸೇರಿಸಿ, ಅವರು ಈ ರೀತಿ ಮಹಿಳೆಯನ್ನು ಕಿರುಕುಳ ಮಾಡುತ್ತಾರೆ. ದೇವರು ಅವರೆಲ್ಲರನ್ನೂ ಬೇರೆ ಗ್ರಹಕ್ಕೆ ಏಕೆ ಕರೆದೊಯ್ಯುವುದಿಲ್ಲ?” ಎಂದು ಅವರು ಬರೆದಿದ್ದಾರೆ. ಅವರ ಈ ಪೋಸ್ಟ್, ಪ್ರಚಾರ ಕಾರ್ಯಕ್ರಮಗಳ ವೇಳೆ ಸೆಲೆಬ್ರಿಟಿಗಳಿಗೆ ಎದುರಾಗುತ್ತಿರುವ ಕಿರುಕುಳ ಕಳವಳಕ್ಕೆ ಕಾರಣವಾಗಿದೆ.
ಮಾರುತಿ ನಿರ್ದೇಶನದ ‘ದಿ ರಾಜಾ ಸಾಬ್’ ಚಿತ್ರವು ಪ್ರಭಾಸ್ ಅವರ ಹಾರರ್ ಶೈಲಿಯ ಮೊದಲ ಪೂರ್ಣ ಪ್ರಮಾಣದ ಚಿತ್ರವಾಗಿದ್ದು, ಚಿತ್ರದಲ್ಲಿ ಸಂಜಯ್ ದತ್, ನಿಧಿ ಅಗರ್ವಾಲ್, ಮಾಳವಿಕಾ ಮೋಹನನ್ ಹಾಗೂ ರಿದ್ಧಿ ಕುಮಾರ್ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಚಿತ್ರವನ್ನು ಮೂಲತಃ ಜನವರಿ 2024ರಲ್ಲಿ ಘೋಷಿಸಲಾಗಿದ್ದು, ಚಿತ್ರೀಕರಣ ಅಕ್ಟೋಬರ್ 2022ರಲ್ಲಿ ಆರಂಭಗೊಂಡಿತ್ತು. ಹಲವು ವಿಳಂಬಗಳ ಬಳಿಕ, ಚಿತ್ರವು ಜನವರಿ 9, 2026ರಂದು ಸಂಕ್ರಾಂತಿ ಹಬ್ಬದಂದು ಬಿಡುಗಡೆಯಾಗಲು ಸಿದ್ಧವಾಗಿದೆ.
ಲುಲು ಮಾಲ್ನಲ್ಲಿ ನಡೆದ ಈ ಘಟನೆ, ಜನಸಂದಣಿ ನಿರ್ವಹಣೆ ಹಾಗೂ ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಕಲಾವಿದರ ಸುರಕ್ಷತೆ ಕುರಿತು ಹೊಸ ಚರ್ಚೆಗೆ ಕಾರಣವಾಗಿದೆ. ಅಭಿಮಾನಿಗಳ ಉತ್ಸಾಹ ಸಹಜವಾದದ್ದಾಗಿದ್ದರೂ, ಅದು ಮಿತಿಯನ್ನು ಮೀರಿದಾಗ ಅಪಾಯಕಾರಿಯಾಗುತ್ತದೆ ಎಂಬ ಅಭಿಪ್ರಾಯಗಳು ವ್ಯಕ್ತವಾಗುತ್ತಿದ್ದು, ಇಂತಹ ಪ್ರಚಾರ ಕಾರ್ಯಕ್ರಮಗಳಲ್ಲಿ ಕಠಿಣ ಭದ್ರತಾ ಕ್ರಮಗಳನ್ನು ಜಾರಿಗೆ ತರಬೇಕು ಎಂಬ ಒತ್ತಾಯ ಉದ್ಯಮ ವಲಯದಿಂದ ಕೇಳಿಬರುತ್ತಿದೆ.