ಶಬರಿಮಲೆ: ಪ್ರಸಿದ್ಧ ಅಯ್ಯಪ್ಪ ಸ್ವಾಮಿ ದೇವಸ್ಥಾನವು ಮಂಡಲ – ಮಕರವಿಳಕ್ಕು ಯಾತ್ರೆಯ ಹಿನ್ನೆಲೆಯಲ್ಲಿ ನವೆಂಬರ್ 16ರಂದು ಸಂಜೆ 5 ಗಂಟೆಗೆ ಭಕ್ತರ ದರ್ಶನಕ್ಕಾಗಿ ತೆರೆಯಲಿದೆ.
ತಂತ್ರಿ ಕಂದರ್ ಮಹೇಶ್ ಮೋಹನರ್ ಅವರ ಸಮ್ಮುಖದಲ್ಲಿ ಪ್ರಸ್ತುತ ಮೇಲ್ಶಾಂತಿ ಅರುಣ್ ಕುಮಾರ್ ನಂಬೂದರಿ ಅವರು ದೇವಸ್ಥಾನದ ಬಾಗಿಲು ತೆರೆದು ದೀಪ ಬೆಳಗಿಸಲಿದ್ದಾರೆ. ಆನಂತರ ಮಲಿಕಾಪುರಂ ದೇವಾಲಯದ ಬಾಗಿಲು ತೆರೆಯಲು ಮೇಲ್ಶಾಂತಿ ವಾಸುದೇವನ್ ನಂಬೂದರಿಗೆ ಕೀಲಿ ಮತ್ತು ಚಿತಾಭಸ್ಮ ಹಸ್ತಾಂತರಿಸಲಾಗುವುದು.
ದೀಪ ಬೆಳಗಿಸಿದ ನಂತರ ಮಾತ್ರ ಯಾತ್ರಿಕರಿಗೆ ಮೆಟ್ಟಿಲು ಹತ್ತುವ ಮತ್ತು ದರ್ಶನ ಪಡೆಯುವ ಅವಕಾಶವಿರಲಿದೆ. ಮೊದಲಿಗೆ ನೇಮಕಗೊಂಡ ಮೇಲ್ಶಾಂತಿಗಳು ಮೆಟ್ಟಿಲುಗಳನ್ನು ಹತ್ತಲಿದ್ದಾರೆ. ಸಂಜೆ 6 ಗಂಟೆಗೆ ಶಬರಿಮಲೆಯಲ್ಲಿ ಇ.ಡಿ. ಪ್ರಸಾದ್ ಹಾಗೂ ಮಲಿಕಾಪುರಂನಲ್ಲಿ ಎಂ.ಜಿ. ಮನು ನಂಬೂದರಿ ಅವರ ನೇತೃತ್ವದಲ್ಲಿ ಉದ್ಘಾಟನಾ ವಿಧಿಗಳು ನೆರವೇರಲಿವೆ.
ತಂತ್ರಿ ಕಂದರ್ ಮಹೇಶ್ ಮೋಹನರ್ ಅವರು ಕಲಶ ಪೂಜೆ ಹಾಗೂ ಕಲಶಾಭಿಷೇಕ ನೆರವೇರಿಸಲಿದ್ದಾರೆ. ನಂತರ ಮೂಲಮಂತ್ರ ಪಠಣೆ ನಡೆಯಲಿದೆ. ನವೆಂಬರ್ 17 ರಂದು ವೃಶ್ಚಿಕಪುಲಾರಿ ಪೂಜೆ ಆರಂಭವಾಗಲಿದ್ದು, ಡಿಸೆಂಬರ್ 26ರಂದು ಸಂಜೆ 6.30 ಕ್ಕೆ ಥಂಕಯಂಗಿ ಪೂಜೆ ಹಾಗೂ ದೀಪಾರಾಧನೆ ನಡೆಯಲಿದೆ.
ಡಿಸೆಂಬರ್ 27ರಂದು ಮಂಡಲ ಪೂಜೆ ಬಳಿಕ ರಾತ್ರಿ 10 ಗಂಟೆಗೆ ದೇವಾಲಯ ಮುಚ್ಚಲಾಗುತ್ತದೆ. ಡಿಸೆಂಬರ್ 30 ರಂದು ಮಕರವಿಳಕ್ಕಿನ ಅಂಗವಾಗಿ ದೇವಾಲಯ ಸಂಜೆ 5ಕ್ಕೆ ಮರುತೆರೆಯಲಿದ್ದು, ಜನವರಿ 14ರಂದು ಮಕರವಿಳಕ್ಕು ಆಚರಣೆ ನಡೆಯಲಿದೆ. ಯಾತ್ರಾ ಕಾಲಾವಧಿಯ ಅಂತ್ಯದಲ್ಲಿ ಜನವರಿ 20ರಂದು ದೇವಾಲಯ ಮುಚ್ಚಲಾಗುತ್ತದೆ.
