ಹಿಮಾಚಲಪ್ರದೇಶ: ಭಾರೀ ಮಳೆಯಿಂದ ತತ್ತರಿಸುತ್ತಿರುವ ಹಿಮಾಚಲ ಪ್ರದೇಶದಲ್ಲಿ ಪ್ರವಾಹ ಸ್ಥಿತಿ ಉಂಟಾಗಿದೆ. ಆದರೆ ಮಂಡಿಯಲ್ಲಿ ಸಂಭವಿಸಿದ ಭೂ ಕುಸಿತದ ಸಂದರ್ಭದಲ್ಲಿ ಸಾಕು ನಾಯಿಯೊಂದು ಊರಿನ ಜನರಿಗೆ ಎಚ್ಚರಿಕೆ ನೀಡಿ 63 ಜನರ ಜೀವ ಕಾಪಾಡಿ ಊರಿನ ಹೀರೋ ಎನಿಸಿಕೊಂಡಿದೆ.
ಸಿಯಾಥಿ ಗ್ರಾಮದಲ್ಲಿ ಜೂನ್ 26ರ ಮಧ್ಯರಾತ್ರಿ 12.30 ರಿಂದ 1ರ ಸುಮಾರಿಗೆ ಈ ಘಟನೆ ನಡೆದಿದೆ. ಆ ಪ್ರದೇಶದಲ್ಲಿ ಭಾರಿ ಮಳೆ ಸುರಿಯುತ್ತಿದ್ದಂತೆ, ಮನೆಯ ನೆಲ ಮಹಡಿಯಲ್ಲಿ ಮಲಗಿದ್ದ ರಾಕಿ ಹೆಸರಿನ ನಾಯಿ ಅಸಹಜವಾಗಿ ಬೊಗಳಲು ಶುರು ಮಾಡಿತ್ತು. ಮನೆಯ ಮಾಲೀಕ ಲಲಿತ್ ಕುಮಾರ್ ಶಬ್ದ ಕೇಳಿ ಎಚ್ಚರಗೊಂಡರು. ಆಗ ಗೋಡೆಯಲ್ಲಿ ದೊಡ್ಡ ಬಿರುಕು ಮತ್ತು ನೀರು ವೇಗವಾಗಿ ಮನೆಯೊಳಗೆ ಹರಿಯುವುದನ್ನು ಅವರು ನೋಡಿದ್ದಾರೆ.
ಲಲಿತ್ ಬೇಗನೆ ಎರಡನೇ ಮಹಡಿಯಿಂದ ಕೆಳಗಿಳಿದು, ತನ್ನ ನಾಯಿಯನ್ನು ಎತ್ತಿಕೊಂಡು, ತನ್ನ ಕುಟುಂಬ ಮತ್ತು ಹತ್ತಿರದ ಗ್ರಾಮಸ್ಥರನ್ನು ಎಬ್ಬಿಸಲು ಪ್ರಾರಂಭಿಸಿದ್ದರು. ಅಪಾಯವನ್ನು ಅರಿತ ಲಲಿತ್ ತನ್ನ ನೆರೆಹೊರೆಯವರಿಗೆ ತಿಳಿಸಲು ಮನೆಯಿಂದ ಮನೆಗೆ ಓಡಿ ಹೋಗಿದ್ದರು.22 ಕುಟುಂಬಗಳು ತಮ್ಮ ಮನೆಗಳು ಮತ್ತು ವಸ್ತುಗಳೊಂದಿಗೆ ಸುರಕ್ಷಿತ ಸ್ಥಳಕ್ಕೆ ತಲುಪಲು ಸಾಧ್ಯವಾಯಿತು.
ಕೆಲವೇ ನಿಮಿಷಗಳಲ್ಲಿ, ಗ್ರಾಮದಲ್ಲಿ ಭಾರಿ ಭೂಕುಸಿತ ಸಂಭವಿಸಿ, ಸುಮಾರು ಒಂದು ಡಜನ್ ಮನೆಗಳು ನೆಲಸಮವಾದವು. ಈಗ ಕೇವಲ ನಾಲ್ಕು ಅಥವಾ ಐದು ಕಟ್ಟಡಗಳು ಮಾತ್ರ ಉಳಿದಿವೆ. ಎಲ್ಲಾ 63 ಗ್ರಾಮಸ್ಥರು ಪವಾಡಸದೃಶವಾಗಿ ಯಾವುದೇ ಹಾನಿಯಾಗದಂತೆ ಪಾರಾಗಿದ್ದಾರೆ. ನಾಯಿಯ ಜಾಗರೂಕತೆ ಮತ್ತು ಅದರ ಮಾಲೀಕರ ತ್ವರಿತ ಪ್ರತಿಕ್ರಿಯೆಯಿಂದಾಗಿ ಇದು ಸಾಧ್ಯವಾಯಿತು. ಸಂತ್ರಸ್ತ ಕುಟುಂಬಗಳು ಸ್ಥಳದಿಂದ ಸುಮಾರು 500 ಮೀಟರ್ ದೂರದಲ್ಲಿರುವ ತ್ರಯಂಬಲ ಗ್ರಾಮದಲ್ಲಿರುವ ನೈನಾ ದೇವಿ ದೇವಸ್ಥಾನದಲ್ಲಿ ಆಶ್ರಯ ಪಡೆದಿದ್ದಾರೆ.