ನವದೆಹಲಿ: ದೇಶದ ಲಕ್ಷಾಂತರ ಯುವ ಜನತೆಯ ವೈದ್ಯಕೀಯ ಕನಸಿಗೆ ಕೊಳ್ಳಿ ಇಟ್ಟಿರುವ ‘ನೀಟ್-ಯುಜಿ 2026’ ಪರೀಕ್ಷೆಯ ಪ್ರಶ್ನೆ ಪತ್ರಿಕೆ ಸೋರಿಕೆ ಹಗರಣವನ್ನು ಸುಪ್ರೀಂ ಕೋರ್ಟ್ ಅತ್ಯಂತ ತೀಕ್ಷ್ಣವಾಗಿ ಖಂಡಿಸಿದೆ. ಈ ಇಡೀ ತನಿಖೆಯನ್ನು ತಾನೇ ಖುದ್ದಾಗಿ ಕೆಲವು ಕಾಲ ಉಸ್ತುವಾರಿ ಮಾಡುವುದಾಗಿ ಸುಪ್ರೀಂ ಕೋರ್ಟ್ ಗಂಭೀರ ಆದೇಶ ನೀಡಿದೆ.
“ವ್ಯವಸ್ಥೆಯಲ್ಲಿ ನಿಜವಾದ ಹೊಣೆಗಾರಿಕೆಯನ್ನು ನಿಗದಿಪಡಿಸದ ಹೊರತು ಈ ಅಸಲಿ ಪೇಪರ್ ಲೀಕ್ ದಂಧೆಗಳು ಕೊನೆಗೊಳ್ಳುವುದಿಲ್ಲ” ಎಂದು ನ್ಯಾಯಮೂರ್ತಿಗಳಾದ ಪಿ.ಎಸ್. ನರಸಿಂಹ ಮತ್ತು ಅಲೋಕ್ ಅರಾಧೆ ಅವರಿದ್ದ ಪೀಠವು ಎನ್ಟಿಎ (NTA) ಗೆ ಚಾಟಿ ಬೀಸಿದೆ. ಭವಿಷ್ಯದಲ್ಲಿ ಇಂತಹ ಹಗರಣಗಳನ್ನು ತಡೆಯಲು ನೀಟ್ ಪರೀಕ್ಷೆಯನ್ನು ಸಂಪೂರ್ಣವಾಗಿ ಕಂಪ್ಯೂಟರ್ ಆಧಾರಿತ ಪರೀಕ್ಷೆಯಾಗಿ (CBT) ಪರಿವರ್ತಿಸಬೇಕು ಎಂಬ ಬೇಡಿಕೆಗಳು ಈಗ ಕೇಳಿಬರುತ್ತಿವೆ.
ಹಿಂದಿನ ತಪ್ಪುಗಳಿಂದ ಪಾಠ ಕಲಿಯದ ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆಯನ್ನು (NTA) ತರಾಟೆಗೆ ತೆಗೆದುಕೊಂಡ ಕೋರ್ಟ್, “ಯುಪಿಎಸ್ಸಿ ಪರೀಕ್ಷೆಗಳಲ್ಲಿ ಎಂದಿಗೂ ಪ್ರಶ್ನೆ ಪತ್ರಿಕೆ ಸೋರಿಕೆಯಾಗುವುದಿಲ್ಲ. ಆದರೆ, ಎಲ್ಲಾ ಕಾವಲು ಮತ್ತು ಉಸ್ತುವಾರಿ ವ್ಯವಸ್ಥೆಗಳಿದ್ದರೂ ನೀಟ್ನಲ್ಲಿ ಮಾತ್ರ ಇಂತಹ ಘೋರ ವೈಫಲ್ಯಗಳು ಹೇಗೆ ಸಂಭವಿಸುತ್ತವೆ?” ಎಂದು ತೀಕ್ಷ್ಣವಾಗಿ ಪ್ರಶ್ನಿಸಿದೆ.
ನಿಮ್ಮ ಮನೆ/ಆಸ್ತಿ ಮಾರಾಟ ಮತ್ತು ಖರೀದಿಗೆ ಇಲ್ಲಿದೆ ಸುವರ್ಣ ಅವಕಾಶ! ಈಗಲೇ ಈ ಲಿಂಕ್ ಕ್ಲಿಕ್ ಮಾಡಿ ಗುಂಪಿಗೆ ಸೇರಿಕೊಳ್ಳಿ
.
“ಇಂತಹ ಹಗರಣಗಳು ಪದೇ ಪದೇ ನಡೆಯುತ್ತಿರುವುದು ವಿದ್ಯಾರ್ಥಿಗಳು ಮತ್ತು ಅವರ ಕುಟುಂಬಗಳಲ್ಲಿ ತೀವ್ರ ಮಾನಸಿಕ ಆಘಾತವನ್ನುಂಟು ಮಾಡುತ್ತದೆ. ಇದರ ಹಿಂದೆ ಕೇವಲ ಒಬ್ಬ ವಿದ್ಯಾರ್ಥಿಯಲ್ಲ, ಇಡೀ ಕುಟುಂಬದ ಶ್ರಮ, ಪ್ರೀತಿ ಮತ್ತು ಭವಿಷ್ಯ ಅಡಗಿರುತ್ತದೆ. ನಾವು ಅವರನ್ನು ನಿರಾಶೆಗೊಳಿಸಲು ಸಾಧ್ಯವಿಲ್ಲ” ಎಂದು ನ್ಯಾಯಪೀಠವು ಭಾವುಕವಾಗಿ ನುಡಿದಿದೆ.
ಪೇಪರ್ ಲೀಕ್ ತಡೆಗೆ ರಚಿಸಲಾಗಿದ್ದ ಉನ್ನತಾಧಿಕಾರ ಸಮಿತಿಯ ಮುಖ್ಯಸ್ಥ ಹಾಗೂ ಇಸ್ರೋ ಮಾಜಿ ಅಧ್ಯಕ್ಷ ಡಾ. ಕೆ. ರಾಧಾಕೃಷ್ಣನ್ ಅವರ ಅಫಿಡವಿಟ್ ಅನ್ನು ಪರಿಶೀಲಿಸಿದ ಕೋರ್ಟ್, “ಸಮಿತಿ ಇದ್ದಾಗಲೂ ಈ ಹಗರಣ ನಡೆದಿದೆ ಎಂದರೆ, ಒಂದೋ ನಿಮ್ಮ ಮೂಲ ಶಿಫಾರಸುಗಳಲ್ಲೇ ದೋಷವಿದೆ ಅಥವಾ ಅದರ ಸರಿಯಾದ ಅನುಷ್ಠಾನವಾಗಿಲ್ಲ” ಎಂದು ಚುಚ್ಚಿದೆ.
ಕೋರ್ಟ್ನ ತೀಕ್ಷ್ಣ ಪ್ರಶ್ನೆಗಳಿಗೆ ಉತ್ತರಿಸಿದ ಡಾ. ರಾಧಾಕೃಷ್ಣನ್, “ಕಳೆದ ೨೦೨೫ರ ಪರೀಕ್ಷೆಯು ಅತ್ಯಂತ ತೃಪ್ತಿಕರವಾಗಿ ನಡೆದಿತ್ತು. ಆದರೆ, ಈ ಬಾರಿ ಪ್ರಶ್ನೆ ಪತ್ರಿಕೆ ಸಿದ್ಧಪಡಿಸುವ (Question setting) ಹಂತದಲ್ಲೇ ಭದ್ರತಾ ಲೋಪ ಉಂಟಾಗಿತ್ತು. ಪ್ರಸ್ತುತ ಆ ದೋಷವನ್ನೂ ಸಹ ಸರಿಪಡಿಸಲಾಗಿದೆ” ಎಂದು ಒಪ್ಪಿಕೊಂಡಿದ್ದಾರೆ.
ಸದ್ಯ ಎನ್ಟಿಎ ಹಾಗೂ ಉನ್ನತಾಧಿಕಾರ ಸಮಿತಿಯ ವರದಿಗಳನ್ನು ಪಡೆದಿರುವ ಸುಪ್ರೀಂ ಕೋರ್ಟ್, ಈ ಇಡೀ ಹಗರಣದ ಲೋಪದೋಷಗಳ ಕುರಿತು ಅಫಿಡವಿಟ್ ಸಲ್ಲಿಸುವಂತೆ ಕೇಂದ್ರ ಸರ್ಕಾರಕ್ಕೆ ಸೂಚಿಸಿದೆ. ಈ ಮಹತ್ವದ ಪ್ರಕರಣದ ಮುಂದಿನ ವಿಚಾರಣೆಯನ್ನು ಜುಲೈ ಎರಡನೇ ವಾರಕ್ಕೆ ಮುಂದೂಡಲಾಗಿದೆ.