ಕೊಲೊಂಬೊ/ನವದೆಹಲಿ: ಪಶ್ಚಿಮ ಏಷ್ಯಾದಲ್ಲಿ ಹೊತ್ತಿ ಉರಿಯುತ್ತಿರುವ ಯುದ್ಧದ ಕಿಚ್ಚು ಈಗ ಭಾರತದ ನೆರೆಯ ರಾಷ್ಟ್ರ ಶ್ರೀಲಂಕಾದ ಕರಾವಳಿಗೂ ಅಪ್ಪಳಿಸಿದೆ! ಶ್ರೀಲಂಕಾದ ದಕ್ಷಿಣ ಕರಾವಳಿಯಲ್ಲಿ ಇರಾನ್ ಮೂಲದ ಬೃಹತ್ ಹಡಗಿನ ಮೇಲೆ ಭೀಕರ ಜಲಂತರ್ಗಾಮಿ ದಾಳಿ ನಡೆದಿದ್ದು, ಈ ದಾಳಿಯಲ್ಲಿ ಕನಿಷ್ಠ 101 ಜನರು ನಾಪತ್ತೆಯಾಗಿದ್ದು, 78 ಮಂದಿ ಗಂಭೀರವಾಗಿ ಗಾಯಗೊಂಡಿದ್ದಾರೆ ಎಂದು ಶ್ರೀಲಂಕಾ ನೌಕಾಪಡೆ ಮತ್ತು ರಕ್ಷಣಾ ಸಚಿವಾಲಯದ ಮೂಲಗಳು ಖಚಿತಪಡಿಸಿವೆ.
ಬುಧವಾರದಂದು ನಡುಸಮುದ್ರದಲ್ಲಿ ಚಲಿಸುತ್ತಿದ್ದ ಇರಾನ್ ಹಡಗಿನ ಮೇಲೆ ಹಠಾತ್ತನೆ ಜಲಂತರ್ಗಾಮಿ ದಾಳಿಯಾಗಿದೆ. ಹಡಗು ಮುಳುಗುತ್ತಿರುವ ಸಂದರ್ಭದಲ್ಲಿ ಬಂದ ತುರ್ತು ಸಂಕೇತವನ್ನು (Distress Call) ಆಲಿಸಿದ ಶ್ರೀಲಂಕಾ ನೌಕಾಪಡೆ ತಕ್ಷಣವೇ ಬೃಹತ್ ಮಟ್ಟದ ರಕ್ಷಣಾ ಕಾರ್ಯಾಚರಣೆಗೆ ಇಳಿದಿದೆ. ಸಮುದ್ರದ ಅಲೆಗಳ ನಡುವೆ ಸಾವು-ಬದುಕಿನ ಹೋರಾಟ ನಡೆಸುತ್ತಿದ್ದವರ ಪೈಕಿ ಇದುವರೆಗೆ 32 ಜನರನ್ನು ರಕ್ಷಿಸಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಉಳಿದ ನೂರಕ್ಕೂ ಹೆಚ್ಚು ಜನರ ಗತಿ ಏನಾಯಿತು ಎಂಬುದು ಇಂದಿಗೂ ನಿಗೂಢವಾಗಿದೆ.
ದಾಳಿ ಮಾಡಿದ್ದು ಯಾರು?
ಈ ಭೀಕರ ದಾಳಿಯನ್ನು ನಡೆಸಿದವರು ಯಾರು? ಆ ಜಲಂತರ್ಗಾಮಿ ಯಾವ ದೇಶಕ್ಕೆ ಸೇರಿದ್ದು? ಎಂಬ ಪ್ರಶ್ನೆಗಳಿಗೆ ಶ್ರೀಲಂಕಾ ಸರ್ಕಾರವಾಗಲಿ ಅಥವಾ ಇರಾನ್ ಆಗಲಿ ಇದುವರೆಗೆ ಅಧಿಕೃತ ಉತ್ತರ ನೀಡಿಲ್ಲ. ಶ್ರೀಲಂಕಾದ ವಿದೇಶಾಂಗ ಸಚಿವ ವಿಜಿತ ಹೇರತ್ ಅವರು, “ಘಟನೆಯ ಬಗ್ಗೆ ತನಿಖೆ ನಡೆಯುತ್ತಿದೆ ಮತ್ತು ಸೂಕ್ತ ಕ್ರಮ ಕೈಗೊಳ್ಳಲಾಗುವುದು” ಎಂದಷ್ಟೇ ಹೇಳಿದ್ದಾರೆ. ಆದರೆ, ಪಶ್ಚಿಮ ಏಷ್ಯಾದಲ್ಲಿ ಇಸ್ರೇಲ್ ಮತ್ತು ಇರಾನ್ ನಡುವೆ ನಡೆಯುತ್ತಿರುವ ಯುದ್ಧದ ಹಿನ್ನೆಲೆಯಲ್ಲಿ ಈ ದಾಳಿಯ ಹಿಂದೆ ಪ್ರಬಲ ಶಕ್ತಿಯ ಕೈವಾಡವಿರುವ ಶಂಕೆ ವ್ಯಕ್ತವಾಗಿದೆ.
ಈ ಘಟನೆಯು ಕೇವಲ ಒಂದು ಹಡಗಿನ ಮೇಲಿನ ದಾಳಿಯಲ್ಲ; ಇದು ಹಿಂದೂ ಮಹಾಸಾಗರದ ಶಾಂತಿಯನ್ನು ಕದಡುವ ಸಂಚು. ಭಾರತದ ಅತ್ಯಂತ ಹತ್ತಿರದಲ್ಲಿ ನಡೆದಿರುವ ಈ ದಾಳಿಯು ಭಾರತೀಯ ನೌಕಾಪಡೆಗೂ ಎಚ್ಚರಿಕೆಯ ಗಂಟೆಯಾಗಿದೆ. ಸಮುದ್ರದ ಆಳದಿಂದ ಬಂದ ಆ ಕ್ಷಿಪಣಿ ಇಡೀ ಜಗತ್ತಿನ ಸಮುದ್ರ ಮಾರ್ಗದ ಸುರಕ್ಷತೆಯನ್ನೇ ಪ್ರಶ್ನಿಸುವಂತೆ ಮಾಡಿದೆ.