2026 ಬಂದಿದೆ. ಮೊಬೈಲ್ನಲ್ಲಿ ನೋಟಿಫಿಕೇಶನ್ ಬಂತು— Happy New Year! ನಾನು ನಗ್ಲಿಲ್ಲ. ಏಕೆಂದರೆ ನನ್ನೊಳಗೆ ಒಂದು ಪ್ರಶ್ನೆ ಇನ್ನೂ ಉತ್ತರವಾಗಿಲ್ಲ.
“ಈ ವರ್ಷ ನನ್ನ ಬದುಕು ಒಂದಿಷ್ಟು ಮುಂದೆ ಹೋಗುತ್ತಾ?” ಡಿಗ್ರಿ ಸರ್ಟಿಫಿಕೇಟ್ ಫೈಲ್ನಲ್ಲಿ ಮಡಚಿಟ್ಟಿದ್ದೇನೆ. ರಿಸ್ಯೂಮ್ ಮೇಲ್ ಮಾಡಿದ್ದೇನೆ. “Will get back to you” ಅನ್ನೋ ಉತ್ತರಗಳಿಗೆ Ok ಆಗಿಬಿಟ್ಟಿದ್ದೇನೆ. ನನಗೆ ದೊಡ್ಡ ಕನಸುಗಳಿಲ್ಲ. ಒಂದು ಕೆಲಸ. ತಿಂಗಳ ಕೊನೆಗೆ ಜೀರೋ ಆಗದ ಬ್ಯಾಂಕ್ ಬ್ಯಾಲೆನ್ಸ್. ರಾತ್ರಿ ನಿದ್ರೆ. ಇಷ್ಟು ಸಾಕು.
2026 ಅಂದ್ರೆ ನನಗೆ ಪಾರ್ಟಿ ಅಲ್ಲ. ಅದು ಲೆಕ್ಕಾಚಾರ. EMI, ಇಂಟರ್ನೆಟ್ ಬಿಲ್, ಮನೆಗೆ ಕಳಿಸೋ ಹಣ— ಈ ಲೆಕ್ಕಗಳಲ್ಲಿ ನಾನು ಕಳೆದು ಹೋಗಿದ್ದೇನೆ. ನನ್ನ ಅಪ್ಪ ಇನ್ನೂ ನಂಬ್ತಾನೆ— “ಈ ವರ್ಷ ನಿನ್ನದು” ಅಂತ. ಅಮ್ಮ ದೇವರಿಗೆ ದೀಪ ಹಚ್ಚಿ “ಮಗನಿಗೆ ಒಳ್ಳೆಯದು ಮಾಡು” ಅಂತ ಕೇಳ್ತಾಳೆ.
ನಾನು ಮಾತ್ರ ಮೌನವಾಗಿ ನನ್ನನ್ನೇ ಕೇಳ್ಕೊಳ್ತೀನಿ— “ನಾನು ಸೋತೇನಾ, ಇಲ್ಲ ಇನ್ನೂ ಶುರುವಾಗಲೇ ಇಲ್ಲವಾ?” 2026ರಿಂದ ನನಗೆ ಬೇಕಿರೋದು ಅದ್ಭುತವಲ್ಲ. ಅವಕಾಶ. ನನ್ನ ಸಾಮರ್ಥ್ಯವನ್ನು ತೋರಿಸೋ ಒಂದು ಅವಕಾಶ.
ನಾವು ಯುವಕರು ಸೋಮಾರಿಗಳಲ್ಲ. ನಮಗೆ ದಾರಿ ಬೇಕು. ನಾವು ಗದ್ದಲ ಮಾಡೋದಿಲ್ಲ, ಆದ್ರೆ ಒಳಗೆ ಒಳಗೆ ಕುಗ್ಗುತ್ತಾ ಹೋಗ್ತೀವಿ. ಸೋಶಿಯಲ್ ಮೀಡಿಯಾದಲ್ಲಿ ಎಲ್ಲರೂ ಗೆದ್ದಂತೆ ಕಾಣ್ತಾರೆ. ನಾನು ಮಾತ್ರ ಕನ್ನಡಿಯ ಮುಂದೆ ನಿಂತು ನನ್ನನ್ನೇ ಸಮಾಧಾನ ಮಾಡ್ಕೊಳ್ತೀನಿ— “ಇನ್ನೊಂದು ವರ್ಷ ಪ್ರಯತ್ನಿಸೋಣ” ಅಂತ.
ಆದ್ರೆ ಕೆಲವೊಮ್ಮೆ ನನಗೆ ಅನಿಸುತ್ತೆ, ಸೋಲು ಅಂದ್ರೆ ಕೆಳಗೆ ಬೀಳೋದು ಅಲ್ಲ. ಎದ್ದು ನಿಲ್ಲೋ ಮನಸ್ಸೇ ಇಲ್ಲದಾಗ ಬರುವ ಖಾಲಿತನ. ನಮ್ಮ ತಲೆಮಾರನ್ನು ಯಾರೂ ಕೇಳಲ್ಲ. “ನೀವು ಯಾಕೆ ಹೀಗೆ?” ಅಂತ ಪ್ರಶ್ನೆ ಕೇಳ್ತಾರೆ. ಆದ್ರೆ “ನಿಮ್ಮ ಮೇಲೆ ಏನಾಯ್ತು?” ಅಂತ ಕೇಳೋವರು ಕಡಿಮೆ.
ನಾವು ಬೆಳೆದಿದ್ದು ದೊಡ್ಡ ಮಾತುಗಳ ಮಧ್ಯೆ— ವಿಕಾಸ, ಅವಕಾಶ, ಜಾಗತೀಕರಣ. ಆದ್ರೆ ಬದುಕುವಾಗ ಸಿಕ್ಕಿದ್ದು ಸ್ಪರ್ಧೆ, ಹೋಲಿಕೆ, ನಿರಾಶೆ. 2026ರಿಂದ ನಾನು ನನ್ನನ್ನೇ ಒಂದು ವಾಗ್ದಾನ ಮಾಡ್ಕೊಂಡಿದ್ದೇನೆ. ಇನ್ನು ನನ್ನನ್ನು ನಾನು ತಗ್ಗಿಸಿಕೊಳ್ಳಲ್ಲ. ಇನ್ನೊಬ್ಬರ ಯಶಸ್ಸನ್ನು ನನ್ನ ಸೋಲಾಗಿ ನೋಡಲ್ಲ.ನಿಧಾನವಾದರೂ, ನನ್ನ ದಾರಿಯಲ್ಲಿ ನಡೆಯುತ್ತೇನೆ.
ನನಗೆ ಇನ್ನೂ ಭಯ ಇದೆ. ಆದ್ರೆ ಭಯ ಇರೋದೇ ಜೀವಂತವಾಗಿರುವ ಲಕ್ಷಣ ಅಂತೆ. ನಾನು ಕುಸಿದರೂ, ನನ್ನ ಕನಸುಗಳನ್ನು ಹಾಸಿಗೆ ಮಾಡಿಕೊಂಡು ಮಲಗೋದಿಲ್ಲ.
2026… ನೀನು ಜಾದೂ ಮಾಡಬೇಕಿಲ್ಲ. ನನಗೆ ಒಂದಿಷ್ಟು ಉಸಿರಾಟ ಕೊಡು. ಒಂದು ಸಣ್ಣ ಗೆಲುವು ಕೊಡು— “ನೀನು ಇನ್ನೂ ಹೋರಾಟದಲ್ಲಿದ್ದೀಯ” ಅಂತ ಹೇಳೋಷ್ಟು. ಕಳೆದ ವರ್ಷ ನಾನು ಶಬ್ದ ಮಾಡದೇ ಇರಬಹುದು. ಆದ್ರೆ ಒಳಗೆ ಒಳಗೆ ನನ್ನ ಬದುಕಿನ ಅರ್ಥ ಹುಡುಕ್ತಾ ಇರುತ್ತೇನೆ.
ನಾಳೆ ಹೇಗಿರುತ್ತೆ ಗೊತ್ತಿಲ್ಲ. ಆದ್ರೆ ಇವತ್ತು ನಾನು ಕೈಬಿಟ್ಟಿಲ್ಲ. ಅದೇ ನನ್ನ ಹೊಸ ವರ್ಷದ ರೆಸಲ್ಯೂಶನ್. 2026 ನನಗೆ ಒಂದು ಭರವಸೆ ಕೊಡಲಿ. ನಾನು ಅನಾವಶ್ಯಕನಲ್ಲ ಅನ್ನೋ ಭರವಸೆ. ನನ್ನ ಕನಸುಗಳಿಗೆ ಜಾಗ ಇದೆ ಅನ್ನೋ ನಂಬಿಕೆ. ಈ ವರ್ಷ ನಾನು ಬದಲಾಗುತ್ತೇನಾ? ಅಥವಾ ನನ್ನ ಪರಿಸ್ಥಿತಿ? ಉತ್ತರ ಗೊತ್ತಿಲ್ಲ. ಆದ್ರೆ ಇನ್ನೂ ನಾನು ಹೋರಾಟ ಬಿಡಿಲ್ಲ. ಅಷ್ಟೇ ಸಾಕು.
2026… ನನ್ನನ್ನು ಸ್ವಲ್ಪ ಮಾನವನಂತೆ ಬದುಕಲು ಬಿಡು.