ಕೋಝಿಕ್ಕೋಡ್ (ಕೇರಳ): ವಿಜ್ಞಾನ ಲೋಕದಿಂದ ನಾಪತ್ತೆಯಾಗಿದೆಯೆಂದು ಭಾವಿಸಲಾಗಿದ್ದ ಅಪರೂಪದ ಪರಾವಲಂಬಿ ಸಸ್ಯ ಕ್ಯಾಂಪ್ಬೆಲ್ಲಿಯಾ ಔರಾಂಟಿಯಾಕಾ ಅನ್ನು 175 ವರ್ಷಗಳ ನಂತರ ವಯನಾಡಿನ ಥೊಲ್ಲೈರಾಮ್ ಪ್ರದೇಶದಲ್ಲಿ ಪತ್ತೆ ಹಚ್ಚಲಾಗಿದೆ.
1849ರೊಳಗೆ ತಮಿಳುನಾಡಿನ ನಡುವಟ್ಟಂ ಬಳಿ ಸ್ಕಾಟಿಷ್ ಸಸ್ಯಶಾಸ್ತ್ರಜ್ಞ ರಾಬರ್ಟ್ ವೈಟ್ ಈ ಜಾತಿಯನ್ನು ಕೊನೆಯಾಗಿ ದಾಖಲಿಸಿದ್ದರು. ಅದರ ನಂತರ ಯಾವುದೇ ದಾಖಲೆಗಳು ಸಿಗದ ಕಾರಣ, ಈ ಸಸ್ಯವನ್ನು ಕ್ರಿಸ್ಟಿಸೋನಿಯಾ ಬೈಕಲರ್ ಎಂಬ ಮತ್ತೊಂದು ಜಾತಿಯೊಂದಿಗೆ ತಪ್ಪಾಗಿ ಗುರುತಿಸಲಾಗುತ್ತಿತ್ತು.
ಇತ್ತೀಚಿನ ಸಂಶೋಧನೆ ವೇಳೆ, ಕಲ್ಪಟ್ಟಾದ ಎಂ.ಎಸ್. ಸ್ವಾಮಿನಾಥನ್ ಸಂಶೋಧನಾ ಪ್ರತಿಷ್ಠಾನದ ಸಲೀಂ ಪಿಚನ್ ಹಾಗೂ ಅಲಪ್ಪುಳದ ಸನಾತನ ಧರ್ಮ ಕಾಲೇಜಿನ ಸಂಶೋಧಕರಾದ ಡಾ. ಜೋಸ್ ಮ್ಯಾಥ್ಯೂ, ಅರುಣ್ರಾಜ್, ಡಾ. ವಿ.ಎನ್. ಸಂಜಯ್ ಮತ್ತು ಶ್ರೀಲಂಕಾದ ವಿಜ್ಞಾನಿ ಬಿ. ಗೊಪ್ಪಲ್ಲವ ಅವರು ವೈಟ್ ದಾಖಲಿಸಿದ ಜಾತಿಯೇ ವಯನಾಡಿನಲ್ಲಿ ಕಂಡ ಸಸ್ಯ ಎಂದು ದೃಢಪಡಿಸಿದ್ದಾರೆ.
ಈ ಮಹತ್ವದ ಅಧ್ಯಯನವನ್ನು ಇಂಗ್ಲೆಂಡ್ನ ರಾಯಲ್ ಬೊಟಾನಿಕಲ್ ಗಾರ್ಡನ್ಸ್ ಪ್ರಕಟಿಸುವ ಕ್ಯೂ ಬುಲೆಟಿನ್ ಪತ್ರಿಕೆಯಲ್ಲಿ ಪ್ರಕಟಿಸಲಾಗಿದೆ. ಕ್ಯಾಂಪ್ಬೆಲ್ಲಿಯಾ ಔರಾಂಟಿಯಾಕಾ ಒಂದು ಹೋಲೋಪ್ಯಾರಸೈಟ್, ಅಂದರೆ ಸಂಪೂರ್ಣ ಪರಾವಲಂಬಿ ಸಸ್ಯ. ಇದು ತನ್ನ ಪೌಷ್ಟಿಕಾಂಶಕ್ಕಾಗಿ ಕುರಿಂಜಿ (ಸ್ಟ್ರೋಬಿಲಾಂಥೆಸ್) ಸಸ್ಯಗಳ ಬೇರುಗಳ ಮೇಲೆ ಸಂಪೂರ್ಣವಾಗಿ ಅವಲಂಬಿತವಾಗಿರುತ್ತದೆ. ನೆಲದ ಮೇಲೆ ಕೆಲವೇ ವಾರಗಳು ಮಾತ್ರ ಬೆಳೆಯುವ ಅಲ್ಪಾವಧಿಯ ಸಸ್ಯ ಇದು.
ಸಸ್ಯ ಕಂಡುಬಂದ ಸ್ಥಳ, ಇತ್ತೀಚೆಗೆ ಭೂಕುಸಿತಕ್ಕೆ ಒಳಗಾದ ಚೂರಲಮಲ ಮತ್ತು ಮುಂಡಕ್ಕೈ ಪ್ರದೇಶಗಳಿಂದ ಕೇವಲ 5 ಕಿಮೀ ದೂರದಲ್ಲಿದೆ ಎಂದು ಸಂಶೋಧಕರು ಹೇಳಿದರು.
