ನವದೆಹಲಿ: ಜಾಗತಿಕ ಅಸ್ಥಿರತೆಯ ನಡುವೆಯೇ ಭಾರತ ಸದಾ ಶಾಂತಿಯ ಪರವಾಗಿಯೇ ನಿಂತಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಶುಕ್ರವಾರ ಸ್ಪಷ್ಟಪಡಿಸಿದರು. ಹೈದರಾಬಾದ್ ಹೌಸ್ನಲ್ಲಿ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರೊಡನೆ ಮಹತ್ವದ ದ್ವಿಪಕ್ಷೀಯ ಮಾತುಕತೆ ನಡೆಸಿದ ಬಳಿಕ ಮಾತನಾಡಿದ ಮೋದಿ, ಉಕ್ರೇನ್–ರಷ್ಯಾ ಸಂಘರ್ಷದ ನಡುವೆ “ಭಾರತ ತಟಸ್ಥವಲ್ಲ, ಆದರೆ ಶಾಂತಿಯೊಂದಿಗಿದೆ” ಎಂದು ಜಗತ್ತಿಗೆ ಸಂದೇಶ ರವಾನಿಸಿದರು.
Narendra Modi addressing the joint press meet with President Putin.
ಉಕ್ರೇನ್ ಯುದ್ಧವನ್ನು ನೇರವಾಗಿ ಉಲ್ಲೇಖಿಸಿದ ಅವರು, “ರಷ್ಯಾ–ಉಕ್ರೇನ್ ಮತ್ತೆ ಶಾಂತಿಯ ಹಾದಿಗೆ ಮರಳುತ್ತದೆ ಎಂಬ ನಂಬಿಕೆ ನನಗಿದೆ. ನಾನು ಭೇಟಿಯಾದ ಪ್ರತಿಯೊಬ್ಬ ವಿಶ್ವ ನಾಯಕರಿಗೂ ಇದೇ ಸಂದೇಶವನ್ನು ಹೇಳಿದ್ದೇನೆ” ಎಂದು ಹೇಳಿದರು.
ಪುಟಿನ್ಗೆ ಭವ್ಯ ಸ್ವಾಗತ:
ಇಂದು ಬೆಳಿಗ್ಗೆ ರಾಷ್ಟ್ರಪತಿ ಭವನದಲ್ಲಿ ಅಧ್ಯಕ್ಷ ದ್ರೌಪದಿ ಮುರ್ಮು ಹಾಗೂ ಪ್ರಧಾನಿ ಮೋದಿ ಪುಟಿನ್ ಅವರಿಗೆ ಸಾಂಪ್ರದಾಯಿಕ ʻಗಾರ್ಡ್ ಆಫ್ ಹಾನರ್ʼ ನೀಡಿದರು. ಆನಂತರ ಇಬ್ಬರು ನಾಯಕರು ರಾಜ್ ಘಾಟ್ನಲ್ಲಿ ಮಹಾತ್ಮ ಗಾಂಧಿ ಅವರಿಗೆ ನಮನ ಸಲ್ಲಿಸಿ, ಹೈದರಾಬಾದ್ ಹೌಸ್ನಲ್ಲಿ ಉನ್ನತ ಮಟ್ಟದ ಮಾತುಕತೆ ಆರಂಭಿಸಿದರು.
ಮೋದಿ ತಮ್ಮ ಭಾಷಣದಲ್ಲಿ ಪುಟಿನ್ ಅವರನ್ನು “ಭಾರತದ ನಿಜವಾದ ಸ್ನೇಹಿತ” ಎಂದು ಕರೆದರು. “2001ರಿಂದ ನೀವು ಭಾರತ–ರಷ್ಯಾ ಸಂಬಂಧಕ್ಕೆ ನೀಡಿದ ನಾಯಕತ್ವ ಐತಿಹಾಸಿಕವಾಗಿದೆ. ನಮ್ಮ ಬಾಂಧವ್ಯ ನಂಬಿಕೆಯ ಮೇಲೆ ಕಟ್ಟಲಾಗಿದೆ,” ಎಂದು ಹೇಳಿದರು.
ಆರ್ಥಿಕ–ತಾಂತ್ರಿಕ ಸಂಬಂಧ ಮತ್ತಷ್ಟು ಬಲಗೊಳ್ಳಲಿದೆ:
ಭಾರತ–ರಷ್ಯಾ ವ್ಯಾಪಾರ–ಆರ್ಥಿಕ ಸಂಬಂಧ ಹೊಸ ಎತ್ತರಕ್ಕೆ ಏರಲಿದೆ ಎಂದು ಮೋದಿ ವಿಶ್ವಾಸ ವ್ಯಕ್ತಪಡಿಸಿದರು. “ನಮ್ಮ ಆರ್ಥಿಕ ಸಂಬಂಧಗಳು ಇನ್ನಷ್ಟು ಗಟ್ಟಿ ಆಗುತ್ತವೆ ಎಂಬ ವಿಶ್ವಾಸ ನನಗಿದೆ,” ಎಂದು ಹೇಳಿದರು.
ಕೋವಿಡ್ ನಂತರ ಜಗತ್ತು ಎದುರಿಸಿದ ಸವಾಲುಗಳನ್ನು ನೆನಪಿಸಿದವರು, “ಜಗತ್ತಿಗೆ ಹೊಸ ಶಾಂತಿ ಚಳವಳಿ ಅಗತ್ಯವಿದೆ. ಭಾರತ–ರಷ್ಯಾ ಸಹಕಾರ ಇದಕ್ಕೆ ಬಲ ನೀಡಲಿದೆ” ಎಂದು ಹೇಳಿದರು.
ಪುಟಿನ್ ಪ್ರತಿಕ್ರಿಯೆ: “ಶಾಂತಿಯುತ ಇತ್ಯರ್ಥಕ್ಕೆ ರಷ್ಯಾ ಬದ್ಧ”
ಮೋದಿ ಅವರ ಹೇಳಿಕೆಗಳಿಗೆ ಪ್ರತಿಕ್ರಿಯಿಸಿದ ಪುಟಿನ್, ಭಾರತದ ಸಮತೋಲಿತ ವಿದೇಶಾಂಗ ನಿಲುವಿಗೆ ಮೆಚ್ಚುಗೆಯನ್ನರ್ಪಿಸಿದರು. “ಉಕ್ರೇನ್ನ ಘಟನೆಗಳಲ್ಲಿ ರಷ್ಯಾ ಕಡೆಗೂ ಶಾಂತಿಯುತ ಪರಿಹಾರವೇ ಗುರಿ,” ಎಂದು ಹೇಳಿದರು.
“ಭಾರತ–ರಷ್ಯಾ ಸಂಬಂಧಗಳು ಇತಿಹಾಸದಲ್ಲಿ ಆಳವಾಗಿ ಬೇರುಹಾಕಿವೆ. ಕೃತಕ ಬುದ್ಧಿಮತ್ತೆ, ಬಾಹ್ಯಾಕಾಶ, ಹೈಟೆಕ್, ವಾಯುಯಾನ—ಸಹಕಾರಕ್ಕೆ ಹೊಸ ದಿಕ್ಕುಗಳು ತೆರೆದಿವೆ,” ಎಂದು ಪುಟಿನ್ ತಿಳಿಸಿದ್ದಾರೆ.
ಇಬ್ಬರು ನಾಯಕರು ವಿಶ್ವಾಸ, ಶಾಂತಿ ಮತ್ತು ತಾಂತ್ರಿಕ–ಆರ್ಥಿಕ ಸಹಕಾರವನ್ನು ಕೇಂದ್ರಬಿಂದು ಮಾಡಿಕೊಂಡು, ಮುಂದಿನ ದಶಕದ ಭಾರತ–ರಷ್ಯಾ ಸಂಬಂಧದ ಭವಿಷ್ಯ ರೂಪರೇಖೆಯನ್ನು ಚರ್ಚಿಸಿದ್ದು, “ಫಲಪ್ರದ ಹಾಗೂ ನಿರ್ಣಾಯಕ ಸಭೆಯಾಗಲಿದೆ” ಎಂದು ಎರಡೂ ಕಡೆಯೂ ಅಭಿಪ್ರಾಯಪಟ್ಟಿವೆ.
