ಯುಟಾಹ್: ಅಮೆರಿಕಾದ ರಾಜಕೀಯ ಚಟುವಟಿಕೆಗಾರ ಚಾರ್ಲಿ ಕಿರ್ಕ್ ಹತ್ಯೆ ಪ್ರಕರಣದಲ್ಲಿ ಶಂಕಿತನಾಗಿರುವ 22 ವರ್ಷದ ಟೈಲರ್ ರಾಬಿನ್ಸನ್ ಬಗ್ಗೆ ಹೊಸ ಮಾಹಿತಿಗಳು ಹೊರಬಿದ್ದಿದ್ದು, ಈತ ವಿಚಿತ್ರವಾಗಿ ವರ್ತಿಸುತ್ತಿದ್ದಾನೆ ಎಂದು ವರದಿಯಾಗಿದೆ.
FBI ಬಿಡುಗಡೆ ಮಾಡಿದ ಮಾಹಿತಿಯ ಪ್ರಕಾರ, ರಾಬಿನ್ಸನ್ ಬಳಕೆ ಮಾಡಿದ ರೈಫಲ್‌ನ ಕೊಠಡಿಯಲ್ಲಿ ಪತ್ತೆಯಾದ ಮೂರು ಹಾರಿಸದ ಗುಂಡುಗಳ ಮೇಲೆ ಹಲವು ರಾಜಕೀಯ ಹಾಗೂ ಆನ್‌ಲೈನ್ ಸಂಸ್ಕೃತಿಯ ಸಂದೇಶಗಳು ಬರೆಯಲ್ಪಟ್ಟಿದ್ದವು. “ಹೇ ಫ್ಯಾಸಿಸ್ಟ್! ಹಿಡಿಯಿರಿ!”, “ಓಹ್ ಬೆಲ್ಲಾ ಸಿಯಾವೊ”(ದ್ವಿತೀಯ ವಿಶ್ವಯುದ್ಧದ ಇಟಾಲಿಯನ್ ಫ್ಯಾಸಿಸ್ಟ್ ವಿರೋಧಿ ಹಾಡಿನ ಪದ್ಯ) ಎಂಬ ಫ್ಯಾಸಿಸ್ಟ್ ವಿರೋಧಿ ಘೋಷಣೆಗಳ ಜೊತೆಗೆ, ಗೇಮಿಂಗ್ ಉಲ್ಲೇಖಗಳು ಹಾಗೂ ಇಂಟರ್ನೆಟ್ ಮೀಮ್‌ಗಳನ್ನೂ ಒಳಗೊಂಡಿದ್ದವು.
ಟೈಲರ್ ರಾಬಿನ್ಸನ್ ಯುಟಾಹ್‌ನ ವಾಷಿಂಗ್ಟನ್ ನಗರದಲ್ಲಿ ಪೋಷಕರಾದ ಅಂಬರ್ ಮತ್ತು ಮ್ಯಾಟ್ ರಾಬಿನ್ಸನ್ ಅವರೊಂದಿಗೆ ವಾಸಿಸುತ್ತಿದ್ದನು. ಅವನ ತಂದೆ ಮ್ಯಾಟ್ ರಾಬಿನ್ಸನ್ 27 ವರ್ಷಗಳ ಅನುಭವ ಹೊಂದಿದ ಶೆರಿಫ್ ಇಲಾಖೆಯ ಅಧಿಕಾರಿಯಾಗಿದ್ದಾರೆ. ಘಟನೆ ನಂತರ ಟೈಲರ್ ಆತ್ಮಹತ್ಯೆ ಬೆದರಿಕೆ ಹಾಕಿದ್ದರೂ, ಪೋಷಕರ ಮನವೊಲಿಕೆಯಿಂದ ಶರಣಾಗಲು ಒಪ್ಪಿಕೊಂಡನು. ನಂತರ ತಂದೆಯೇ ಅವನನ್ನು ಒರೆಮ್‌ನಲ್ಲಿ ಅಧಿಕಾರಿಗಳಿಗೆ ಒಪ್ಪಿಸಿದರು.
ಉತಾಹ್ ಸ್ಟೇಟ್ ಯೂನಿವರ್ಸಿಟಿ ಪ್ರಕಟಿಸಿದ ಮಾಹಿತಿಯ ಪ್ರಕಾರ, ರಾಬಿನ್ಸನ್ 2021ರಲ್ಲಿ ಕೇವಲ ಒಂದು ಸೆಮಿಸ್ಟರ್ ವ್ಯಾಸಂಗ ಮಾಡಿದ್ದಾನೆ. UVUಗೆ ಸೇರ್ಪಡೆಗೊಂಡ ದಾಖಲೆಗಳು ಇಲ್ಲವೆಂದು ವಿಶ್ವವಿದ್ಯಾಲಯ ಸ್ಪಷ್ಟಪಡಿಸಿದೆ.