ಟೆಹ್ರಾನ್: ಇರಾನ್ ರಾಜಕಾರಣದಲ್ಲಿ ಭಾರಿ ಸಂಚಲನ ಮೂಡಿಸುವಂತಹ ವಿದ್ಯಮಾನವೊಂದು ವರದಿಯಾಗಿದ್ದು, ಇರಾನ್ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯಾನ್ ಅವರು ತಮ್ಮ ರಾಜೀನಾಮೆ ಪತ್ರವನ್ನು ದೇಶದ ಪರಮೋಚ್ಚ ನಾಯಕ (ಸುಪ್ರೀಂ ಲೀಡರ್) ಮೊಜ್ಟಬಾ ಖಮೇನಿ ಅವರ ಕಚೇರಿಗೆ ಸಲ್ಲಿಸಿದ್ದಾರೆ ಎಂದು ʻಇರಾನ್ ಇಂಟರ್ನ್ಯಾಷನಲ್’ ವರದಿ ಮಾಡಿದೆ. ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಸರ್ಕಾರದ ಪ್ರಮುಖ ನಿರ್ಧಾರಗಳಲ್ಲಿ ಅತಿಯಾದ ಹಸ್ತಕ್ಷೇಪ ಮಾಡುತ್ತಿರುವುದೇ ಇದಕ್ಕೆ ಪ್ರಮುಖ ಕಾರಣ ಎಂದು ಹೇಳಲಾಗಿದೆ.
ರಾಜೀನಾಮೆಗೆ ಮುಖ್ಯ ಕಾರಣಗಳೇನು?
ಇರಾನ್ನ ಉನ್ನತ ಅಧಿಕಾರಿಯೊಬ್ಬರನ್ನು ಉಲ್ಲೇಖಿಸಿ ಮಾಧ್ಯಮಗಳು ವರದಿ ಮಾಡಿರುವ ಪ್ರಕಾರ, ದೇಶದ ಆಡಳಿತ ಮತ್ತು ಪ್ರಮುಖ ನಿರ್ಧಾರಗಳ ಮೇಲಿನ ಸಂಪೂರ್ಣ ನಿಯಂತ್ರಣವನ್ನು ಸೇನಾ ಪಡೆಯಾದ ʻಐಆರ್ಜಿಸಿ’ (IRGC) ತನ್ನ ಕೈಗೆತ್ತಿಕೊಂಡಿದೆ. ಇದರಿಂದಾಗಿ ಅಧ್ಯಕ್ಷರು ಮತ್ತು ಇತರ ಹಿರಿಯ ನಾಗರಿಕ ಅಧಿಕಾರಿಗಳನ್ನು ಪ್ರಮುಖ ಚರ್ಚೆ ಹಾಗೂ ನಿರ್ಧಾರಗಳಿಂದ ದೂರ ಇಡಲಾಗುತ್ತಿದೆ. ಪ್ರಸ್ತುತ ಪರಿಸ್ಥಿತಿಯಲ್ಲಿ ತಮಗೆ ಸಂವಿಧಾನಬದ್ಧ ಜವಾಬ್ದಾರಿಗಳನ್ನು ನಿಭಾಯಿಸಲು ಅಥವಾ ಪರಿಣಾಮಕಾರಿಯಾಗಿ ಆಡಳಿತ ನಡೆಸಲು ಸಾಧ್ಯವಾಗುತ್ತಿಲ್ಲ, ಹೀಗಾಗಿ ತಮಗೆ ಅಧಿಕಾರದಿಂದ ಕೆಳಗಿಳಿಯಲು ಅನುಮತಿ ನೀಡಬೇಕು ಎಂದು ಪೆಜೆಶ್ಕಿಯಾನ್ ಪತ್ರದಲ್ಲಿ ವಿನಂತಿಸಿದ್ದಾರೆ ಎನ್ನಲಾಗಿದೆ.
ಇತ್ತೀಚೆಗೆ ಇರಾನ್ ಭಾಗಿಯಾಗಿದ್ದ ಪ್ರಾದೇಶಿಕ ಸಂಘರ್ಷಗಳು ಮತ್ತು ಅದರ ಪರಿಣಾಮವಾಗಿ ದೇಶ ಎದುರಿಸುತ್ತಿರುವ ಆರ್ಥಿಕ ಬಿಕ್ಕಟ್ಟಿನ ನಿರ್ವಹಣೆಯ ವಿಚಾರದಲ್ಲಿ ಅಧ್ಯಕ್ಷರು ಹಾಗೂ IRGC ನಾಯಕರ ನಡುವಿನ ಭಿನ್ನಾಭಿಪ್ರಾಯ ತಾರಕಕ್ಕೇರಿತ್ತು. ಪ್ರಮುಖವಾಗಿ ಯುದ್ಧವನ್ನು ನಿರ್ವಹಿಸಿದ ರೀತಿ ಮತ್ತು ಅದರಿಂದಾಗಿ ದೇಶದ ಜನರ ಜೀವನೋಪಾಯ ಹಾಗೂ ಆರ್ಥಿಕತೆಯ ಮೇಲಾದ ವಿನಾಶಕಾರಿ ಪರಿಣಾಮಗಳ ಕುರಿತೇ ಅಧ್ಯಕ್ಷರು ಮತ್ತು ಸೇನಾ ನಾಯಕರ ನಡುವೆ ತೀವ್ರ ಘರ್ಷಣೆ ನಡೆದಿತ್ತು ಎಂದು ಮೂಲಗಳು ತಿಳಿಸಿವೆ.
ನಿಮ್ಮ ಮನೆ/ಆಸ್ತಿ ಮಾರಾಟ ಮತ್ತು ಖರೀದಿಗೆ ಇಲ್ಲಿದೆ ಸುವರ್ಣ ಅವಕಾಶ! ಈಗಲೇ ಈ ಲಿಂಕ್ ಕ್ಲಿಕ್ ಮಾಡಿ ಗುಂಪಿಗೆ ಸೇರಿಕೊಳ್ಳಿ
.
ವರದಿಯನ್ನು ನಿರಾಕರಿಸಿದ ಇರಾನ್ ಸರ್ಕಾರ
ಮತ್ತೊಂದೆಡೆ, ಅಧ್ಯಕ್ಷೀಯ ಕಚೇರಿಯ ಸಂವಹನ ವಿಭಾಗದ ಉಪ ಮುಖ್ಯಸ್ಥ ಮೆಹ್ದಿ ತಬಾತಬಾಯಿ ಅವರು ಈ ವರದಿಯನ್ನು ಸಂಪೂರ್ಣವಾಗಿ ತಳ್ಳಿಹಾಕಿದ್ದಾರೆ. ಎಕ್ಸ್ (ಟ್ವಿಟರ್) ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿರುವ ಅವರು, “ಇರಾನ್ ಇಂಟರ್ನ್ಯಾಷನಲ್ ವರದಿಯು ಸಂಪೂರ್ಣ ಸುಳ್ಳು. ಸದ್ಯ ಅಮೆರಿಕ ಹಾಗೂ ಇರಾನ್ ನಡುವೆ ಕದನ ವಿರಾಮಕ್ಕಾಗಿ ನಡೆಯುತ್ತಿರುವ ಮಾತುಕತೆಗಳನ್ನು ಹಳಿತಪ್ಪಿಸಲು ನಡೆಯುತ್ತಿರುವ ಮಾಧ್ಯಮಗಳ ಆಟದ ಭಾಗವಿದು” ಎಂದು ಸ್ಪಷ್ಟನೆ ನೀಡಿದ್ದಾರೆ.
ರಹಸ್ಯ ಸ್ಥಳದಿಂದಲೇ ಕದನ ವಿರಾಮ ಮಾತುಕತೆ ನಡೆಸುತ್ತಿರುವ ಸುಪ್ರೀಂ ಲೀಡರ್?
ಈ ಎಲ್ಲಾ ರಾಜಕೀಯ ಆಟಗಳ ನಡುವೆ, ಇರಾನ್ನ ಪರಮೋಚ್ಚ ನಾಯಕ (ಸುಪ್ರೀಂ ಲೀಡರ್) ರಹಸ್ಯ ಸ್ಥಳವೊಂದರಿಂದ ಕಾರ್ಯಾಚರಣೆ ನಡೆಸುತ್ತಿದ್ದಾರೆ ಎಂದು ಅಮೆರಿಕದ ಅಧಿಕಾರಿಗಳು ತಿಳಿಸಿದ್ದಾರೆ. ಅವರು ಬಾಹ್ಯ ಪ್ರಪಂಚದೊಂದಿಗೆ ಸೀಮಿತ ಸಂಪರ್ಕ ಹೊಂದಿದ್ದು, ಕೇವಲ ನಂಬಿಕಸ್ಥ ರಹಸ್ಯ ಸಂದೇಶವಾಹಕರ (couriers) ಮೂಲಕ ಮಾತ್ರ ಅವರನ್ನು ಸಂಪರ್ಕಿಸಬಹುದಾಗಿದೆ. ಇರಾನ್ ಸರ್ಕಾರದ ಹಿರಿಯ ಅಧಿಕಾರಿಗಳಿಗೂ ಅವರ ನಿಖರವಾದ ಸ್ಥಳದ ಮಾಹಿತಿ ಇಲ್ಲ ಎನ್ನಲಾಗಿದೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಪ್ರತಿಕ್ರಿಯೆ
ಇದೇ ವೇಳೆ ವಾಷಿಂಗ್ಟನ್ ಮತ್ತು ಟೆಹ್ರಾನ್ ನಡುವೆ ಬೃಹತ್ ಒಪ್ಪಂದವೊಂದಕ್ಕೆ ಮಾತುಕತೆ ಮುಂದುವರಿದಿದ್ದು, ಇರಾನ್ ಅಧಿಕಾರಿಗಳು “ಅತ್ಯಂತ ಕಠಿಣ ಸಂಧಾನಕಾರರು” ಎಂದು ಯುಎಸ್ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿದ್ದಾರೆ. ಇರಾನ್ ನಾಯಕತ್ವವು ಆಂತರಿಕವಾಗಿ ತೀವ್ರವಾಗಿ ಸೀಳಾಗಿದೆ ಎಂದು ಬಣ್ಣಿಸಿರುವ ಟ್ರಂಪ್, ಒಪ್ಪಂದಕ್ಕೆ ತಮಗೆ ಯಾವುದೇ ಆತುರವಿಲ್ಲ ಮತ್ತು ತಾಳ್ಮೆಯ ಹಾದಿಯನ್ನು ಅನುಸರಿಸುತ್ತಿರುವುದಾಗಿ ತಿಳಿಸಿದ್ದಾರೆ. ಸದ್ಯ ಪಾಕಿಸ್ತಾನವು ಉಭಯ ದೇಶಗಳ ನಡುವೆ ಪ್ರಮುಖ ಮಧ್ಯಸ್ಥಿಕೆ ವಹಿಸುತ್ತಿದ್ದು, ಹಾರ್ಮುಜ್ ಜಲಸಂಧಿಯ ಮುಕ್ತ ಸಂಚಾರ ಮತ್ತು ಇರಾನ್ನ ಯುರೇನಿಯಂ ದಾಸ್ತಾನುಗಳ ನಿಯಂತ್ರಣದ ಕುರಿತು ಪ್ರಮುಖ ಚರ್ಚೆಗಳು ನಡೆಯುತ್ತಿವೆ.