ಬೆಂಗಳೂರು/ದೆಹಲಿ: ವಿಜಯಪುರ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್ ಅವರ ಪ್ರಾದೇಶಿಕ ಪಕ್ಷದ ಘೋಷಣೆಯು ಕರ್ನಾಟಕ ಬಿಜೆಪಿಯ ನಿದ್ದೆಗೆಡಿಸಿದೆ. ಹೈಕಮಾಂಡ್ ಮೇಲೆ ಒತ್ತಡ ಹಾಕಿ ಮರಳಿ ಪಕ್ಷಕ್ಕೆ ಸೇರ್ಪಡೆಯಾಗುತ್ತಾರೆ ಎಂಬ ಲೆಕ್ಕಾಚಾರಗಳು ಈಗ ಉಲ್ಟಾ ಆಗಿದ್ದು, ಕಮಲ ಪಾಳೆಯದಲ್ಲಿ ಭಾರಿ ಆತಂಕ ಮೂಡಿಸಿದೆ.
ಬಿಜೆಪಿಗೆ ಚಿಂತೆಗೆ ಕಾರಣಗಳು:
ಯತ್ನಾಳ್ ಅವರು ಪಂಚಮಸಾಲಿ ಲಿಂಗಾಯತ ಸಮುದಾಯದ ಪ್ರಭಾವಿ ನಾಯಕ. ಉತ್ತರ ಕರ್ನಾಟಕದ ಬೆಳಗಾವಿ, ವಿಜಯಪುರ, ಬಾಗಲಕೋಟೆ ಮತ್ತು ಧಾರವಾಡ ಜಿಲ್ಲೆಗಳಲ್ಲಿ ಈ ಸಮುದಾಯದ ಮತಗಳು ನಿರ್ಣಾಯಕ. ಯತ್ನಾಳ್ ಪ್ರತ್ಯೇಕ ಪಕ್ಷ ಕಟ್ಟಿದರೆ ಅದು ನೇರವಾಗಿ ಬಿಜೆಪಿಯ ಭದ್ರಕೋಟೆಯ ಮತಗಳನ್ನು ಸೀಳಲಿದೆ.
ಯಡಿಯೂರಪ್ಪ ಕುಟುಂಬದ ವಿರುದ್ಧ ಬಹಿರಂಗ ಯುದ್ಧ ಸಾರಿರುವ ಯತ್ನಾಳ್, ಬಿವೈ ವಿಜಯೇಂದ್ರ ಅವರ ನಾಯಕತ್ವಕ್ಕೆ ಸವಾಲು ಹಾಕಿದ್ದಾರೆ. ರಾಜ್ಯದ ಇತರ ಭಾಗಗಳಲ್ಲಿಯೂ ಯತ್ನಾಳ್ ಅವರ ಹಿಂದೂತ್ವದ ಭಾಷಣಕ್ಕೆ ಮಾರುಹೋಗುವ ಯುವ ಸಮೂಹವಿದೆ. ಇದು ಬಿಜೆಪಿಯ ಅಧಿಕೃತ ಅಭ್ಯರ್ಥಿಗಳಿಗೆ ಕಂಟಕವಾಗಬಹುದು.
ಯತ್ನಾಳ್ ತಮ್ಮ ಪಕ್ಷಕ್ಕೆ ʻಜೆಸಿಬಿ’ ಚಿಹ್ನೆಯನ್ನು ಬಳಸಬಹುದು ಎಂಬ ಮಾತುಗಳು ಹರಿದಾಡುತ್ತಿವೆ. ಜೆಸಿಬಿ ಎನ್ನುವುದು ಕೇವಲ ಯಂತ್ರವಲ್ಲ, ಅದು ʻಬುಲ್ಡೋಜರ್ ರಾಜಕೀಯ’ದ ಸಂಕೇತ. ಪ್ರಬಲ ಹಿಂದುತ್ವದ ಹೋರಾಟಗಾರ ಎಂಬ ಇಮೇಜ್ ಹೊಂದಿರುವ ಯತ್ನಾಳ್, ಬಿಜೆಪಿಯ ಸಿದ್ಧಾಂತದ ಮತದಾರರನ್ನೇ ತಮ್ಮತ್ತ ಸೆಳೆಯುವ ಸಾಧ್ಯತೆ ಇದೆ.
ಒಂದೆಡೆ ಯತ್ನಾಳ್ ಅವರನ್ನು ಉಚ್ಚಾಟಿಸಿ ನಿರಾಳವಾಗಿದ್ದ ರಾಜ್ಯ ಬಿಜೆಪಿ ನಾಯಕರು, ಈಗ ಅವರ ಹೊಸ ಪಕ್ಷದ ಘೋಷಣೆಯಿಂದ ಕಕ್ಕಾಬಿಕ್ಕಿಯಾಗಿದ್ದಾರೆ. ಬಂಗಾಳ ಅಥವಾ ಬಿಹಾರ ಚುನಾವಣೆಯ ನಂತರವೂ ನಿರ್ಧಾರ ಬದಲಿಸುವುದಿಲ್ಲ ಎಂಬ ಅವರ ಹೇಳಿಕೆಯು, ಹೈಕಮಾಂಡ್ ಸಂಧಾನಕ್ಕೂ ದಾರಿ ಇಲ್ಲ ಎಂಬ ಸಂಕೇತ ನೀಡಿದೆ. ಯತ್ನಾಳ್ ಅವರ ಈ ನಡೆ ಕೇವಲ ಒಂದು ರಾಜಕೀಯ ಘೋಷಣೆಯಲ್ಲ, ಬದಲಿಗೆ ಬಿಜೆಪಿಯೊಳಗಿನ ಆಂತರಿಕ ಅಸಮಾಧಾನದ ಕಟ್ಟೆ ಒಡೆದಂತೆ ಕಾಣುತ್ತಿದೆ. ಇದು ಬಿಜೆಪಿಗೆ ಬಿ-ಟೀಮ್ ಆಗಲಿದೆಯೇ ಅಥವಾ ಮೈತ್ರಿ ಮಾಡಿಕೊಳ್ಳಲಿದೆಯೇ ಎಂಬುದು ಕಾದು ನೋಡಬೇಕಿದೆ.