ಬೆಂಗಳೂರು: ವಿಧಾನಸೌಧದ ಕಾರಿಡಾರ್ಗಳಲ್ಲಿ ಈಗ ಹಬ್ಬಿರೋದು ಬಜೆಟ್ ತಯಾರಿಯ ವಾಸನೆಯಲ್ಲ, ಬದಲಿಗೆ ಹಳೇ ಸೇಡಿನ ಮತ್ತು ಹೊಸ ಕುರ್ಚಿಯ ಹಪಹಪಿಯ ಗಂಧ! ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಮಾರ್ಚ್ 6ರಂದು ತಮ್ಮ ದಾಖಲೆಯ 17ನೇ ಬಜೆಟ್ ಮಂಡಿಸಲು ಫೈಲ್ ರೆಡಿ ಮಾಡ್ತಿದ್ದರೆ, ಇತ್ತ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ದೆಹಲಿಯ ಚಳಿಯಲ್ಲಿ ಬೆವರು ಇಳಿಸುತ್ತಿದ್ದಾರೆ.
ಅದು ಬರೀ ಅಸ್ಸಾಂ ಚುನಾವಣೆಯ ಮೀಟಿಂಗ್ ಅಂದುಕೊಂಡರೆ ನೀವು ತಪ್ಪು ಮಾಡಿದಂತೆ. ಆ ದೆಹಲಿ ಪ್ರವಾಸದ ಅಸಲಿ ಉದ್ದೇಶ ‘ಅಧಿಕಾರ ಹಂಚಿಕೆ’ ಅನ್ನೋ ಆ ಹಳೇ ಒಪ್ಪಂದದ ಧೂಳು ಕೊಡವೋದು. ಡಿಕೆಶಿ ಅಲ್ಲಿ ಕೆ.ಸಿ. ವೇಣುಗೋಪಾಲ್ ಮತ್ತು ಖರ್ಗೆ ಮನೆಯ ಬಾಗಿಲು ತಟ್ಟುತ್ತಿದ್ದಾರೆ. ಆದರೆ, ರಾಹುಲ್ ಗಾಂಧಿಯವರ ದರ್ಶನ ಮಾತ್ರ ಮರೀಚಿಕೆಯಾಗಿದೆ. ‘ಸಮಯವೇ ಎಲ್ಲದಕ್ಕೂ ಉತ್ತರ ನೀಡುತ್ತೆ’ ಅಂತ ಡಿಕೆ ಬ್ರದರ್ಸ್ ಹೇಳ್ತಿರೋದನ್ನ ಕೇಳಿಸಿಕೊಂಡರೆ, ಫೆಬ್ರವರಿ 16ರ ನಂತರ ಕರ್ನಾಟಕ ರಾಜಕಾರಣದಲ್ಲಿ ಹೈಡ್ರಾಮಾ ಗ್ಯಾರಂಟಿ ಅನ್ನೋದು ಪಕ್ಕಾ!
ಸಿದ್ದು ಪಾಳಯದ ಸೈಲೆಂಟ್ ಆಟ!
ಇತ್ತ ಸಿದ್ದರಾಮಯ್ಯನವರು ‘ಹೈಕಮಾಂಡ್ ಹೇಳಿದ್ದೇ ವೇದವಾಕ್ಯ’ ಅಂತ ಸೌಮ್ಯವಾಗಿ ನಗುತ್ತಲೇ ತಮ್ಮ ದಾಳ ಉರುಳಿಸುತ್ತಿದ್ದಾರೆ. ಇತ್ತೀಚೆಗಷ್ಟೇ 54 ಮಂದಿ ಬೋರ್ಡ್-ನಿಗಮಗಳ ಅಧ್ಯಕ್ಷರಿಗೆ ಕ್ಯಾಬಿನೆಟ್ ದರ್ಜೆ ಸ್ಥಾನಮಾನ ಕೊಟ್ಟ ಸಿದ್ದು, ತಮ್ಮ ಬೆಂಬಲಿಗರನ್ನ ಗಟ್ಟಿಯಾಗಿ ಹಿಡಿದಿಟ್ಟುಕೊಂಡಿದ್ದಾರೆ. ಇನ್ನು ಸಿದ್ದು ಪಾಳಯದ 25 ಶಾಸಕರು ಸದ್ದಿಲ್ಲದೆ ವಿದೇಶ ಪ್ರವಾಸಕ್ಕೆ ಹಾರಿರುವುದು ಹಲವು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ. ಅದು ಪ್ರವಾಸವೋ ಅಥವಾ ‘ರೆಸಾರ್ಟ್ ರಾಜಕೀಯ’ದ ಹೊಸ ಮಾದರಿಯೋ?
ಸಚಿವ ಕೆ.ಎನ್. ರಾಜಣ್ಣ ಮುನಿಸಿಕೊಂಡು ರಾಜನಹಳ್ಳಿ ಮಠದ ಕಾರ್ಯಕ್ರಮಕ್ಕೆ ಗೈರಾಗಿರೋದು, ಸತೀಶ್ ಜಾರಕಿಹೊಳಿ ಅವರು ‘ಎಲ್ಲವೂ ಹೈಕಮಾಂಡ್ ಕೈಯಲ್ಲಿದೆ’ ಅಂತ ಅಡ್ಡಗೋಡೆಯ ಮೇಲೆ ದೀಪ ಇಟ್ಟಂತೆ ಮಾತನಾಡುತ್ತಿರೋದು ನೋಡಿದರೆ, ಕಾಂಗ್ರೆಸ್ ಹಡಗಿನ ಒಳಗೆ ಏನೋ ದೊಡ್ಡದಾಗಿ ಹೊಗೆಯಾಡುತ್ತಿದೆ. ಬಜೆಟ್ ಮುಗಿಯುವವರೆಗೆ ಸಿದ್ದು ಸೇಫ್ ಇರಬಹುದು, ಆದರೆ ಆಮೇಲೆ ನಡೆಯುವ ಸಂಪುಟ ಪುನಾರಚನೆಯ ಸರ್ಕಸ್ನಲ್ಲಿ ಯಾರ ತಲೆ ಉರುಳುತ್ತೆ? ಯಾರಿಗೆ ಪಟ್ಟ ಸಿಗುತ್ತೆ? ಇದುವೇ ಈಗಿನ ಬಿಲಿಯನ್ ಡಾಲರ್ ಪ್ರಶ್ನೆ!
