ಕಾಸರಗೋಡು: ಅನಿವಾಸಿ ಭಾರತೀಯನೊಬ್ಬನಿಂದ ಬರೋಬ್ಬರಿ ₹1.175 ಕೋಟಿ ನಗದನ್ನು ಬೇಕಲ ಪೊಲೀಸರು ಬೇಕಲ್ ಬಳಿಯ ತ್ರಿಕ್ಕನ್ನಾಡ್‌ನಲ್ಲಿ ವಶಪಡಿಸಿಕೊಂಡಿದ್ದಾರೆ. ಬೇಕಲ್ ಬಳಿಯ ಮೇಲ್ಪರಂಬದ ಅಬ್ದುಲ್ ಖಾದರ್ (46) ಎಂಬಾತ ಈ ಹಣವನ್ನು ತನ್ನ ವ್ಯಾಗನರ್‌ ಕಾರಿನಲ್ಲಿ ಸಾಗಿಸುತ್ತಿದ್ದು, ಇಂದು ಬೆಳಿಗ್ಗೆ ಪತ್ತೆಹಚ್ಚಲಾಗಿದೆ.
ಈ ಹಣವನ್ನು ಕಾಞಂಗಾಡ್ ಬಳಿಯ ಚಿತ್ತಾರಿಯಲ್ಲಿರುವ ತನ್ನ ಬಿಸ್‌ನೆಟ್‌ ಪಾರ್ಟ್ನರ್‌ಗೆ ಈ ಹಣವನ್ನು ತಲುಪಿಸುತ್ತಿರುವುದಾಗಿ ಖಾದರ್ ಹೇಳಿಕೊಂಡರೂ, ಹಣದ ಮೂಲವನ್ನು ವಿವರಿಸಲು ಸಾಧ್ಯವಾಗಲಿಲ್ಲ ಎಂದು ಬೇಕಲ್ ಡಿವೈಎಸ್‌ಪಿ ಮನೋಜ್ ವಿ.ವಿ ಹೇಳಿದ್ದಾರೆ. “ಅವರು ಕಳೆದ ಐದು ತಿಂಗಳಿನಿಂದ ಕೇರಳದಲ್ಲಿದ್ದಾರೆ ಮತ್ತು ಇಲ್ಲಿ ಯಾವುದೇ ವ್ಯವಹಾರವನ್ನು ಹೊಂದಿಲ್ಲ” ಎಂದು ಮನೋಜ್ ಹೇಳಿದರು.
ಪ್ರತಿದಿನ ಬೆಳಿಗ್ಗೆ ವ್ಯಾಗನ್‌ಆರ್ ಕಾರಿನಲ್ಲಿ ಲೆಕ್ಕವಿಲ್ಲದಷ್ಟು ಹಣವನ್ನು ಸಾಗಿಸಲಾಗುತ್ತಿದೆ ಎಂಬ ಸುಳಿವು ಪಡೆದ ನಂತರ ನಮ್ಮ ತಂಡ ಖಾದರ್ ಅವರ ಕಾರನ್ನು ತಡೆಹಿಡಿಯಿತು. ಎಂದು ಅಧಿಕಾರಿ ಹೇಳಿದರು. ಹಿಂದಿನ ಸೀಟಿನ ಕೆಳಗೆ ಅಡಗಿದ್ದ ಕುಳಿಯಲ್ಲಿ 500 ರೂ.ಗಳ 23,500 ನೋಟುಗಳನ್ನು ಮರೆಮಾಡಲಾಗಿತ್ತು ಎಂದು ಬೇಕಲ್ ಇನ್ಸ್‌ಪೆಕ್ಟರ್ ಶೈನ್ ಕೆ ಪಿ ಹೇಳಿದರು.
ಖಾದರ್ ಅವರ ಜೇಬಿನಲ್ಲಿ 40 ಹೆಸರುಗಳ ಪಟ್ಟಿಯನ್ನು ಮತ್ತು ಅವರ ಫೋನ್‌ನಲ್ಲಿ ಅದರ ಪ್ರತಿಯನ್ನು ಪೊಲೀಸರು ಕಂಡುಕೊಂಡರು, ಅನಿವಾಸಿ ಭಾರತೀಯರ ಕುಟುಂಬಗಳಿಗೆ ಹವಾಲಾ ಹಣವನ್ನು ಸಾಗಿಸುತ್ತಿರುವ ಬಗ್ಗೆ ಶಂಕೆ ವ್ಯಕ್ತವಾಗಿದೆ.
ಭಾರತೀಯ ನಾಗರಿಕ ಸುರಕ್ಷಾ ಸಂಹಿತಾ (ಬಿಎನ್‌ಎಸ್‌ಎಸ್) ಸೆಕ್ಷನ್ 106 ರ ಅಡಿಯಲ್ಲಿ ಪೊಲೀಸರು ನಗದು ಮತ್ತು ಕಾರನ್ನು ವಶಪಡಿಸಿಕೊಂಡಿದ್ದಾರೆ. “ನಾವು ಜಾರಿ ನಿರ್ದೇಶನಾಲಯಕ್ಕೆ ವರದಿಯನ್ನು ಸಲ್ಲಿಸುತ್ತೇವೆ. ಹಣದ ಜಾಡನ್ನು ಪತ್ತೆಹಚ್ಚುವುದು ಈಗ ಕೇಂದ್ರ ಸಂಸ್ಥೆಯ ಜವಾಬ್ದಾರಿಯಾಗಿದೆ” ಎಂದು ಡಿವೈಎಸ್‌ಪಿ ಮನೋಜ್ ಹೇಳಿದರು.