ಬೆಂಗಳೂರು: ಐಪಿಎಲ್ 2026ರ (IPL 2026) ಸೀಸನ್ನಲ್ಲಿ ರಾಜಸ್ಥಾನ್ ರಾಯಲ್ಸ್ ಪರ ಅಬ್ಬರದ ಬ್ಯಾಟಿಂಗ್ ನಡೆಸಿ ಹಲವು ದಾಖಲೆಗಳನ್ನು ಧೂಳೀಪಟ ಮಾಡಿದ್ದ 15 ವರ್ಷದ ಯುವ ಆಟಗಾರ ವೈಭವ್ ಸೂರ್ಯವಂಶಿ, ಎರಡನೇ ಕ್ವಾಲಿಫೈಯರ್ ಪಂದ್ಯದಲ್ಲಿ ತಂಡ ಸೋಲುತ್ತಿದ್ದಂತೆ ಕಣ್ಣೀರಿಟ್ಟ ದೃಶ್ಯ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಮುಲ್ಲನ್ಪುರದ ಕಠಿಣ ಪಿಚ್ನಲ್ಲಿ ಗುಜರಾತ್ ಟೈಟಾನ್ಸ್ ವಿರುದ್ಧ ಕೇವಲ 47 ಎಸೆತಗಳಲ್ಲಿ 96 ರನ್ಗಳ ಅದ್ಭುತ ಇನಿಂಗ್ಸ್ ಆಡಿದ ಹೊರತಾಗಿಯೂ, ರಾಜಸ್ಥಾನ್ ರಾಯಲ್ಸ್ ತಂಡ ಸೋಲನ್ನು ಅನುಭವಿಸಿತು.
)
ಶುಭ್ಮನ್ ಗಿಲ್ ಅವರ ಆಕರ್ಷಕ ಶತಕದ ನೆರವಿನಿಂದ ಗುಜರಾತ್ ಟೈಟಾನ್ಸ್ ಗೆದ್ದು ಫೈನಲ್ ತಲುಪಿತು. ಇತ್ತ ರಾಯಲ್ಸ್ ಟೂರ್ನಿಯಿಂದ ಹೊರಬೀಳುತ್ತಿದ್ದಂತೆ ತೀವ್ರ ಭಾವುಕರಾದ ವೈಭವ್, ಡಗೌಟ್ನಲ್ಲಿ ಕುಳಿತು ಟವೆಲ್ನಿಂದ ಕಣ್ಣೀರು ಒರೆಸಿಕೊಳ್ಳುತ್ತಿದ್ದ ದೃಶ್ಯ ಅಭಿಮಾನಿಗಳ ಮನಕಲಕುವಂತಿತ್ತು. ಈ ಸೋಲಿನ ಹೊರತಾಗಿಯೂ ವೈಭವ್ ಸೂರ್ಯವಂಶಿ ಈ ಸೀಸನ್ನಲ್ಲಿ ಸೃಷ್ಟಿಸಿದ ಐತಿಹಾಸಿಕ ದಾಖಲೆಗಳ ವಿವರ ಇಲ್ಲಿದೆ:
ವೈಭವ್ ಸೂರ್ಯವಂಶಿ ಬರೆದ ಐತಿಹಾಸಿಕ ದಾಖಲೆಗಳು:
-
ಅನ್ಕ್ಯಾಪ್ಡ್ ಆಟಗಾರನ ಗರಿಷ್ಠ ರನ್: ಐಪಿಎಲ್ ಇತಿಹಾಸದಲ್ಲೇ ಅಂತರರಾಷ್ಟ್ರೀಯ ಪಂದ್ಯ ಆಡದ (Uncapped) ಆಟಗಾರನೊಬ್ಬ ಗಳಿಸಿದ ಗರಿಷ್ಠ ರನ್ ದಾಖಲೆ ಇದಾಗಿದ್ದು, ವೈಭವ್ 16 ಇನಿಂಗ್ಸ್ಗಳಲ್ಲಿ 48.5 ಸರಾಸರಿಯಲ್ಲಿ 776 ರನ್ ಚಚ್ಚಿದ್ದಾರೆ.
-
ಅತಿ ಹೆಚ್ಚು ಸಿಕ್ಸರ್ಗಳು: ಒಂದೇ ಐಪಿಎಲ್ ಸೀಸನ್ನಲ್ಲಿ ಬರೋಬ್ಬರಿ 72 ಸಿಕ್ಸರ್ ಸಿಡಿಸುವ ಮೂಲಕ ಐಪಿಎಲ್ ಇತಿಹಾಸದಲ್ಲೇ ಹೊಸ ಮೈಲಿಗಲ್ಲು ಸ್ಥಾಪಿಸಿದ್ದಾರೆ.
-
ವೇಗದ 1000 ರನ್: ಎದುರಿಸಿದ ಎಸೆತಗಳ ಆಧಾರದ ಮೇಲೆ ಐಪಿಎಲ್ನಲ್ಲಿ ಅತ್ಯಂತ ವೇಗವಾಗಿ (ಕೇವಲ 440 ಎಸೆತಗಳಲ್ಲಿ) 1,000 ರನ್ ಪೂರೈಸಿದ ಬ್ಯಾಟರ್ ಹಾಗೂ ಇನಿಂಗ್ಸ್ ಆಧಾರದ ಮೇಲೆ (23 ಇನಿಂಗ್ಸ್) ಎರಡನೇ ಅತ್ಯಂತ ವೇಗದ ಬ್ಯಾಟರ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
-
ಪವರ್ಪ್ಲೇನಲ್ಲಿ ಅಧಿಪತ್ಯ: ಟಿ20 ಕ್ರಿಕೆಟ್ ಇತಿಹಾಸದಲ್ಲೇ ಒಂದೇ ಟೂರ್ನಿಯ ಪವರ್ಪ್ಲೇ ಓವರ್ಗಳಲ್ಲಿ 500 ರನ್ ಬಾರಿಸಿದ ಮೊದಲ ಬ್ಯಾಟರ್ ಇವರಾಗಿದ್ದಾರೆ. ಅಷ್ಟೇ ಅಲ್ಲದೆ, ಪವರ್ಪ್ಲೇನಲ್ಲೇ 46 ಸಿಕ್ಸರ್ ಚಚ್ಚಿದ್ದಾರೆ (ಇದು ಪ್ರಸ್ತುತ ಸೀಸನ್ನ ಇತರ ಐದು ತಂಡಗಳು ಹೊಡೆದ ಒಟ್ಟು ಸಿಕ್ಸರ್ಗಳಿಗಿಂತ ಹೆಚ್ಚಾಗಿದೆ).
-
ಮಿಂಚಿನ ಅರ್ಧಶತಕಗಳು: ಕೇವಲ 16 ಅಥವಾ ಅದಕ್ಕಿಂತ ಕಡಿಮೆ ಎಸೆತಗಳಲ್ಲಿ 4 ಅರ್ಧಶತಕಗಳನ್ನು ಬಾರಿಸುವ ಮೂಲಕ, ಐಪಿಎಲ್ ಇತಿಹಾಸದಲ್ಲಿ ಈ ಸಾಧನೆ ಮಾಡಿದ ಮೊದಲ ಆಟಗಾರ ಎನಿಸಿಕೊಂಡಿದ್ದಾರೆ. ಜೊತೆಗೆ ಪವರ್ಪ್ಲೇ ಒಳಗಡೆಯೇ 4 ಬಾರಿ ಅರ್ಧಶತಕದ ಗಡಿ ದಾಟಿದ್ದಾರೆ.
ಟಿ20 ಕ್ರಿಕೆಟ್ನ ಇತಿಹಾಸದಲ್ಲೇ 237.30ರ ಆಘಾತಕಾರಿ ಸ್ಟ್ರೈಕ್ ರೇಟ್ನಲ್ಲಿ 700ಕ್ಕೂ ಅಧಿಕ ರನ್ ಗಳಿಸಿದ ಯಾವುದೇ ಬ್ಯಾಟರ್ ಇಲ್ಲದಿರುವಾಗ, 15 ವರ್ಷದ ಈ ಹದಿಹರೆಯದ ಹುಡುಗ ಜಾಗತಿಕ ಕ್ರಿಕೆಟ್ ಜಗತ್ತೇ ತನ್ನತ್ತ ತಿರುಗಿ ನೋಡುವಂತೆ ಮಾಡಿದ್ದಾನೆ. ಆರ್ ಅಶ್ವಿನ್ ಸೇರಿದಂತೆ ಹಲವು ಹಿರಿಯ ಆಟಗಾರರು ವೈಭವ್ ಅವರ ಈ ಅಪ್ರತಿಮ ಆಟವನ್ನು ಶ್ಲಾಘಿಸಿದ್ದಾರೆ.