ಬೆಂಗಳೂರು: ರಾಜ್ಯ ರಾಜಕಾರಣದ ಪಡಸಾಲೆಯಲ್ಲಿ ಕೇಳಿಬರುತ್ತಿದ್ದ ‘ನಾಯಕತ್ವ ಬದಲಾವಣೆ’ಯ ಗುಸುಗುಸು ಈಗ ದೆಹಲಿ ಮಟ್ಟಕ್ಕೆ ತಲುಪಿದ್ದು, ಬಹುಕಾಲದ ಕುತೂಹಲಕ್ಕೆ ಮಾರ್ಚ್ ಅಂತ್ಯದೊಳಗೆ ತೆರೆಬೀಳುವ ಲಕ್ಷಣಗಳು ದಟ್ಟವಾಗಿವೆ. ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರಿಗೆ ಹೈಕಮಾಂಡ್ ನೀಡಿರುವ ತುರ್ತು ಕರೆಯು, ಅವರು ಶೀಘ್ರದಲ್ಲೇ ರಾಜ್ಯದ ಚುಕ್ಕಾಣಿ ಹಿಡಿಯಲಿದ್ದಾರೆ ಎಂಬ ಚರ್ಚೆಗೆ ಭರ್ಜರಿ ತುಪ್ಪ ಸುರಿದಿದೆ.
ದೆಹಲಿ ದರ್ಬಾರ್ ಮತ್ತು ವೇಣುಗೋಪಾಲ್ ಭೇಟಿ:
ಕಳೆದ ಎರಡು ದಿನಗಳಿಂದ ದೆಹಲಿಯಲ್ಲೇ ಬೀಡುಬಿಟ್ಟಿದ್ದ ಡಿಕೆಶಿ, ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಮತ್ತು ಕೆ.ಸಿ. ವೇಣುಗೋಪಾಲ್ ಅವರೊಂದಿಗೆ ಸುದೀರ್ಘ ಮ್ಯಾರಥಾನ್ ಚರ್ಚೆ ನಡೆಸಿದ್ದಾರೆ. ಅಧಿಕಾರ ಹಂಚಿಕೆಯ ಸೂತ್ರದಂತೆ ಈಗ ಡಿಕೆಶಿಗೆ ಪಟ್ಟ ಕಟ್ಟುವ ಸಮಯ ಬಂದಿದೆ ಎಂಬ ಸಂದೇಶ ಅಧಿನಾಯಕರಿಂದ ರವಾನೆಯಾದ ಬೆನ್ನಲ್ಲೇ, ಈ ತಿಂಗಳ 12ರಂದು ಸುರ್ಜೇವಾಲ ಅವರು ಮತ್ತೊಮ್ಮೆ ದೆಹಲಿಗೆ ಬರುವಂತೆ ಅಧಿಕೃತ ಆಹ್ವಾನ ನೀಡಿದ್ದಾರೆ.
ನಾಲ್ಕು ಪುಟಗಳ ʻಪ್ರೊಫೈಲ್’ ಹಿಂದಿನ ಗುಟ್ಟೇನು?
ಸೋಮವಾರವಷ್ಟೇ ಡಿಕೆಶಿ ಸಚಿವಾಲಯವು ಅವರ ರಾಜಕೀಯ ಜೀವನದ ಸಾಧನೆಗಳನ್ನೊಳಗೊಂಡ ನಾಲ್ಕು ಪುಟಗಳ ಸುದೀರ್ಘ ವ್ಯಕ್ತಿ ಪರಿಚಯವನ್ನ ಮಾಧ್ಯಮಗಳಿಗೆ ಬಿಡುಗಡೆ ಮಾಡಿದೆ. ಸಾಮಾನ್ಯವಾಗಿ ಇಂತಹ ನಡೆಗಳು ದೊಡ್ಡ ಹುದ್ದೆಯ ಅಲಂಕಾರಕ್ಕೆ ಮುನ್ನ ನಡೆಯುವ ಸಿದ್ಧತೆಗಳಾಗಿವೆ. ಬಜೆಟ್ ಅಧಿವೇಶನ ಮುಗಿಯುತ್ತಿದ್ದಂತೆ ಹೈಕಮಾಂಡ್ ಕೊಟ್ಟ ಮಾತು ಉಳಿಸಿಕೊಳ್ಳಲಿದೆ ಎಂದು ಅವರ ಬೆಂಬಲಿಗ ಶಾಸಕರು ಈಗಾಗಲೇ ವಿಧಾನಸಭೆಯ ಮೊಗಸಾಲೆಯಲ್ಲಿ ಸಂಭ್ರಮಿಸುತ್ತಿರುವುದು ಕಂಡುಬಂದಿದೆ.
ಶಾಸಕರ ಔತಣಕೂಟ: ಸಂಭ್ರಮವೋ ಅಥವಾ ಶಕ್ತಿ ಪ್ರದರ್ಶನವೋ?
ಕೆಪಿಸಿಸಿ ಅಧ್ಯಕ್ಷರಾಗಿ ಯಶಸ್ವಿ ಆರು ವರ್ಷ ಪೂರೈಸಿದ ಹಿನ್ನೆಲೆಯಲ್ಲಿ ಇಂದು ರಾತ್ರಿ ಬೆಂಗಳೂರಿನ ಪಂಚತಾರಾ ಹೋಟೆಲ್ನಲ್ಲಿ ಡಿ.ಕೆ. ಶಿವಕುಮಾರ್ ಅವರು ಶಾಸಕರಿಗೆ ಮತ್ತು ಸಚಿವರಿಗೆ ಭರ್ಜರಿ ಔತಣಕೂಟ ಏರ್ಪಡಿಸಿದ್ದಾರೆ. ಸದನದಲ್ಲೇ ಶಾಸಕರನ್ನು ಖುದ್ದಾಗಿ ಭೇಟಿ ಮಾಡಿ ಆಹ್ವಾನಿಸಿರುವ ರೀತಿ ನೋಡಿದರೆ, ಇದು ಕೇವಲ ಅಭಿನಂದನಾ ಕೂಟವಲ್ಲ, ಬದಲಾಗಿ ಮುಂದಿನ ‘ಸಿಎಂ’ ಆಗುವ ಮುನ್ನ ತಮ್ಮ ಸೈನ್ಯವನ್ನು ಒಗ್ಗೂಡಿಸುವ ತಂತ್ರವೆಂದೇ ವಿಶ್ಲೇಷಿಸಲಾಗುತ್ತಿದೆ.
“ಮಾರ್ಚ್ ಕೊನೆಯಲ್ಲಿ ಗುಡ್ ನ್ಯೂಸ್ ಸಿಗಲಿದೆ” ಎಂದು ಶಾಸಕರು ಹೇಳಿಕೊಳ್ಳುತ್ತಿರುವುದು ರಾಜ್ಯ ರಾಜಕಾರಣದಲ್ಲಿ ದೊಡ್ಡ ಮಟ್ಟದ ಬದಲಾವಣೆಯ ಮುನ್ಸೂಚನೆ ನೀಡುತ್ತಿದೆ. ಹೈಕಮಾಂಡ್ನ ಅಂತಿಮ ನಿರ್ಧಾರ ಏನಿರಲಿದೆ ಎಂಬುದು ಇಡೀ ರಾಜ್ಯದ ಕಣ್ಣು ನೆಟ್ಟಿರುವ ಮಹತ್ವದ ಪ್ರಶ್ನೆಯಾಗಿದೆ.