ನವದೆಹಲಿ: ಭಾರತೀಯ ಕ್ರಿಕೆಟ್ ತಂಡದ ಸ್ಟಾರ್ ಆಟಗಾರ ಶಿಖರ್ ಧವನ್ ತಮ್ಮ ಮಾಜಿ ಪತ್ನಿ ಆಯೇಷಾ ಮುಖರ್ಜಿ ವಿರುದ್ಧದ ಕಾನೂನು ಸಮರದಲ್ಲಿ ಮಹತ್ವದ ಜಯ ಸಾಧಿಸಿದ್ದಾರೆ.
ನವದೆಹಲಿಯ ಪಟಿಯಾಲ ಹೌಸ್ ಕೋರ್ಟ್ನ ಕೌಟುಂಬಿಕ ನ್ಯಾಯಾಲಯವು ಶಿಖರ್ ಧವನ್ ಪರವಾಗಿ ತೀರ್ಪು ನೀಡಿದ್ದು, ಆಸ್ತಿ ಹಂಚಿಕೆಗೆ ಸಂಬಂಧಿಸಿದಂತೆ ಆಸ್ಟ್ರೇಲಿಯಾದ ನ್ಯಾಯಾಲಯವು ಈ ಹಿಂದೆ ನೀಡಿದ್ದ ಆದೇಶಗಳು ಭಾರತದಲ್ಲಿ ಧವನ್ ಮೇಲೆ ಯಾವುದೇ ರೀತಿಯಲ್ಲಿ ಬದ್ಧವಾಗಿರುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ. ಆಸ್ತಿ ಸೆಟಲ್ಮೆಂಟ್ ವಿಚಾರದಲ್ಲಿ ವಿದೇಶಿ ನ್ಯಾಯಾಲಯದ ತೀರ್ಪುಗಳನ್ನು ರದ್ದುಗೊಳಿಸಿರುವ ಕೋರ್ಟ್, ಧವನ್ ಅವರಿಗೆ ದೊಡ್ಡ ಮಟ್ಟದ ಕಾನೂನು ರಕ್ಷಣೆ ನೀಡಿದೆ.
ಈ ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಾಧೀಶರು, ಶಿಖರ್ ಧವನ್ ಅವರಿಂದ ಸಹಿ ಹಾಕಿಸಿಕೊಳ್ಳಲಾದ ಹಣಕಾಸಿನ ಒಪ್ಪಂದಗಳು ಮತ್ತು ಸಂಬಂಧಿತ ದಾಖಲೆಗಳು ಕಾನೂನುಬದ್ಧವಾಗಿ ಅನೂರ್ಜಿತ ಎಂದು ಘೋಷಿಸಿದ್ದಾರೆ. ಈ ದಾಖಲೆಗಳನ್ನು ಬೆದರಿಕೆ, ಒತ್ತಡ ಮತ್ತು ವಂಚನೆಯ ಮೂಲಕ ಮಾಡಿಸಿಕೊಳ್ಳಲಾಗಿತ್ತು ಎಂಬ ಧವನ್ ಅವರ ವಾದವನ್ನು ನ್ಯಾಯಾಲಯ ಪುರಸ್ಕರಿಸಿದೆ. ಇದರಿಂದಾಗಿ ಈ ಹಿಂದೆ ಧವನ್ ಅನುಭವಿಸಿದ್ದ ಮಾನಸಿಕ ಮತ್ತು ಆರ್ಥಿಕ ಒತ್ತಡಕ್ಕೆ ನ್ಯಾಯಾಲಯದಿಂದ ಮನ್ನಣೆ ಸಿಕ್ಕಂತಾಗಿದೆ.
ಹಣಕಾಸಿನ ವ್ಯವಹಾರಕ್ಕೆ ಸಂಬಂಧಿಸಿದಂತೆ ನ್ಯಾಯಾಲಯವು ಆಯೇಷಾ ಮುಖರ್ಜಿಗೆ ಕಠಿಣ ನಿರ್ದೇಶನ ನೀಡಿದ್ದು, ಆಸ್ಟ್ರೇಲಿಯಾದಲ್ಲಿ ಮಾರಾಟ ಮಾಡಲಾದ ಆಸ್ತಿಗಳಿಂದ ಬಂದ ಹಣವನ್ನು ಧವನ್ ಅವರಿಗೆ ಮರಳಿಸುವಂತೆ ಆದೇಶಿಸಿದೆ. ಬೆರ್ವಿಕ್ ಆಸ್ತಿಯ ಮಾರಾಟದಿಂದ ಬಂದ ಸುಮಾರು ₹5.7 ಕೋಟಿ (AU $812,397.50) ಮತ್ತು ಕ್ಲೈಡ್ ನಾರ್ತ್ ಆಸ್ತಿಯ ಮಾರಾಟದ ಮೊತ್ತದಲ್ಲಿ ಉಳಿಸಿಕೊಂಡಿದ್ದ AU $82,000 ಹಣವನ್ನು ಹಿಂದಿರುಗಿಸಲು ಸೂಚಿಸಲಾಗಿದೆ. ಈ ಮೊತ್ತಕ್ಕೆ ದಾವೆ ಹೂಡಿದ ದಿನಾಂಕದಿಂದ ಪೂರ್ಣ ಪಾವತಿಯವರೆಗೆ ವಾರ್ಷಿಕ ಶೇಕಡಾ 9 ರಷ್ಟು ಬಡ್ಡಿಯನ್ನು ನೀಡಬೇಕೆಂದು ಕೋರ್ಟ್ ಆದೇಶಿಸಿದೆ.
ಪ್ರತಿವಾದಿ ಆಯೇಷಾ ಮುಖರ್ಜಿ ಅವರು ವಿಚಾರಣೆಯ ಸಮಯದಲ್ಲಿ ಗೈರುಹಾಜರಾಗಿದ್ದ ಕಾರಣ, ನ್ಯಾಯಾಲಯವು ಲಭ್ಯವಿರುವ ಸಾಕ್ಷ್ಯಾಧಾರಗಳ ಆಧಾರದ ಮೇಲೆ ಏಕಪಕ್ಷೀಯವಾಗಿ (Ex-parte) ಈ ಆದೇಶವನ್ನು ಹೊರಡಿಸಿದೆ.
