ಭಟ್ಕಳ: ಮೊಮ್ಮಗ ಮಹಾಶಯನೋರ್ವ ಕಳ್ಳನಂತೆ ಮುಖವಾಡ ಧರಿಸಿ ಅಜ್ಜಿಯನ್ನೇ ದರೋಡೆಗೈದು ಪರಾರಿಯಾಗಿ ಇದೀಗ ಸಿಕ್ಕಿಬಿದ್ದ ಘಟನೆ ಭಟ್ಕಳದಲ್ಲಿ ನಡೆದಿದೆ. ಸಂತ್ರಸ್ತೆಯ ಮೊಮ್ಮಗ ತಾಜಮ್ಮುಲ್ ಹಸನ್ ಅಸ್ಕೇರಿ(46) ಅತಿಬುದ್ಧಿವಂತಿಕೆ ತೋರಿ ಸಿಕ್ಕಿಬಿದ್ದವನು.
ಮಾರ್ಚ್ 17ರಂದು ರಮಝಾನ್ ಉಪವಾಸ ಮುಗಿಸಿ ಮನೆಯವರೆಲ್ಲಾ ಜೊತೆಯಾಗಿ ಉಪಹಾರ ಸೇವಿಸಿದರು. ಆ ಬಳಿಕ ಪುರುಷರು ಬೆಳಗ್ಗಿನ ನಮಾಝ್‌ಗೆಂದು ಮಸೀದಿಗೆ ತೆರಳಿದರೆ, ಮಹಿಳೆಯರು ಪ್ರಾರ್ಥನೆಯಲ್ಲಿ ನಿರತರಾದರು. ಇದೇ ಸಮಯವನ್ನು ಉಪಯೋಗಿಸಿಕೊಂಡು ಮುಖವಾಡವನ್ನು ಮುಚ್ಚಿಕೊಂಡಿದ್ದ ಅಪರಿಚಿತ ವ್ಯಕ್ತಿಯೋರ್ವ ಮನೆಗೆ ನುಗ್ಗಿ ವಯೋವೃದ್ಧೆಯ ಬಾಯಿಯನ್ನು ಮುಚ್ಚಿ, ಕತ್ತು ಹಿಸುಕಿ ಚಿನ್ನಾಭರಣಗಳನ್ನು ದೋಚಿ ಪರಾರಿಯಾಗಿದ್ದ.
ದರೋಡೆ ಬಗ್ಗೆ ಮಾಹಿತಿ ತಿಳಿದ ತಕ್ಷಣ ಸ್ಥಳಕ್ಕೆ ಬಂದು ಪರಿಶೀಲನೆ ನಡೆಸಿದ ಭಟ್ಕಳ ನಗರ ಠಾಣೆ ಪೊಲೀಸ್ ಉಪನಿರೀಕ್ಷಕ ನವೀನ್ ನಾಯ್ಕ್ ನೇತೃತ್ವದ ಪೊಲೀಸರ ತಂಡ ಆರೋಪಿಯ ಪತ್ತೆಗೆ ಬಲೆ ಬೀಸಿದರು. ಮನೆಯಲ್ಲಿದ್ದ ಸಿಸಿಟಿವಿಯನ್ನು ಪರಿಶೀಲನೆಯನ್ನು ನಡೆಸಿದರು. ಈ ಕೃತ್ಯವು ಕೇವಲ 4 ನಿಮಿಷಗಳ ಅಂತದರಲ್ಲಿ ನಡೆದಿದೆ ಎಂಬುವುದನ್ನು ಪತ್ತೆ ಹೆಚ್ಚಿದರು.
ದರೋಡೆಯ ಹಿನ್ನೆಲೆ ಸಂತ್ರಸ್ತೆಯ ಮೊಮ್ಮಗ ತಾಜಮ್ಮುಲ್ ಹಸನ್ ಅಸ್ಕೇರಿ ಅಜ್ಜಿಯ ಪರವಾಗಿ ಪೊಲೀಸ್ ದೂರು ನೀಡಿದನು. ಅಪರಾಧಿಯನ್ನು ಪತ್ತೆಹಚ್ಚಲು ಆತ ಪೊಲೀಸ್ ಅಧಿಕಾರಿಗಳಿಗೆ ಸಹಾಯ ಮಾಡುವಂತೆ ನಟಿಸಿದನು. ಆದರೆ, ತನಿಖೆ ಮುಂದುವರಿದಂತೆ ಪೊಲೀಸರು ಆತನನ್ನೇ ಬಂಧಿಸಿದರು. ಅಪರಾಧ ಕೃತ್ಯದ ನಂತರ, ಆರೋಪಿಯು ಆರಂಭದಲ್ಲಿ ಮನೆಯಲ್ಲಿಯೇ ಇದ್ದನು. ಆದರೆ, ಎರಡು ದಿನಗಳ ನಂತರ ಮನೆಯಿಂದ ಪರಾರಿಯಾದನು. ಈ ಮೊದಲು ಕೂಡ ಆತ ಇಂತಹದ್ದೇ ಕೃತ್ಯವನ್ನು ಎಸಗಿದ್ದ. ಈ ವೇಳೆ ಕುಟುಂಬವು ಮಧ್ಯಪ್ರವೇಶಿಸಿ ಇತ್ಯರ್ಥ ಮಾಡಿದೆ ಎಂದು ಕುಟುಂಬದ ಮೂಲಗಳು ತಿಳಿಸಿದೆ.