ಮಂಗಳೂರು: ಭಾರತದಲ್ಲಿ ಹೃದಯ ವೈಫಲ್ಯದಿಂದ (Heart Failure) ಬಳಲುತ್ತಿರುವ ರೋಗಿಗಳ ಸ್ಥಿತಿ ಕೇವಲ ಆರೋಗ್ಯದ ದೃಷ್ಟಿಯಿಂದಷ್ಟೇ ಅಲ್ಲದೆ, ಆರ್ಥಿಕವಾಗಿಯೂ ಶೋಚನೀಯವಾಗಿದೆ. ಇತ್ತೀಚಿನ ಸಂಶೋಧನೆಯೊಂದರ ಪ್ರಕಾರ, ದೇಶದ ಶೇ. 70 ರಷ್ಟು ಹೃದಯ ವೈಫಲ್ಯದ ರೋಗಿಗಳಿಗೆ ಯಾವುದೇ ರೀತಿಯ ಆರೋಗ್ಯ ವಿಮೆಯ ರಕ್ಷಣೆ ಇಲ್ಲದಿರುವುದು ಬೆಳಕಿಗೆ ಬಂದಿದೆ. ಇದು ಮಧ್ಯಮ ಮತ್ತು ಕೆಳವರ್ಗದ ಕುಟುಂಬಗಳನ್ನು ಸಾಲದ ಸುಳಿಗೆ ದೂಡುತ್ತಿದೆ.
ತಿರುವನಂತಪುರದ ಶ್ರೀ ಚಿತ್ರ ತಿರುನಾಳ್ ಇನ್ಸ್ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸಸ್ ಆಂಡ್ ಟೆಕ್ನಾಲಜಿಯ ಡಾ. ಪನ್ನಿಯಮ್ಮಕಲ್ ಜೀಮನ್ ನೇತೃತ್ವದಲ್ಲಿ ನಡೆದ ಈ ಅಧ್ಯಯನವು ಆಘಾತಕಾರಿ ಅಂಕಿಅಂಶಗಳನ್ನು ನೀಡಿದೆ:
ಒಬ್ಬ ರೋಗಿ ವರ್ಷಕ್ಕೆ ಸರಾಸರಿ 1,06,566 ರೂಪಾಯಿಗಳನ್ನು ತನ್ನ ಕೈಯಿಂದಲೇ (Out of Pocket) ಖರ್ಚು ಮಾಡುತ್ತಿದ್ದಾನೆ. ಆಸ್ಪತ್ರೆಗೆ ದಾಖಲಾದರೆ ಅದರ ಸರಾಸರಿ ವೆಚ್ಚ 1.19 ಲಕ್ಷ ರೂಪಾಯಿಗಳಾಗುತ್ತಿದೆ. ಕಾಯಿಲೆಯ ಕಾರಣದಿಂದಾಗಿ ಶೇ. 32 ರಷ್ಟು ವ್ಯಕ್ತಿಗಳ ಮಾಸಿಕ ಆದಾಯದಲ್ಲಿ ಗಣನೀಯ ಕುಸಿತ ಕಂಡುಬಂದಿದೆ.
ಪಾಶ್ಚಿಮಾತ್ಯ ದೇಶಗಳಲ್ಲಿ ಹೃದಯ ವೈಫಲ್ಯವು ಸಾಮಾನ್ಯವಾಗಿ 65-70 ವರ್ಷದ ನಂತರ ಕಂಡುಬಂದರೆ, ಭಾರತದಲ್ಲಿ ಇದರ ಸರಾಸರಿ ವಯಸ್ಸು ಕೇವಲ 55 ವರ್ಷ. ಅಂದರೆ, ವ್ಯಕ್ತಿಯು ತನ್ನ ಕುಟುಂಬದ ಆಧಾರಸ್ತಂಭವಾಗಿರುವಾಗಲೇ ಈ ಕಾಯಿಲೆಗೆ ತುತ್ತಾಗುತ್ತಿರುವುದು ಸಾಮಾಜಿಕ ಮತ್ತು ಆರ್ಥಿಕ ದುರಂತಕ್ಕೆ ನಾಂದಿ ಹಾಡುತ್ತಿದೆ.
ಆರೋಗ್ಯ ವಿಮೆ ಇಲ್ಲದ ಕಾರಣ ಶೇ. 68 ರಷ್ಟು ರೋಗಿಗಳು ತಮ್ಮ ಜೀವನದ ಉಳಿತಾಯವನ್ನು ಚಿಕಿತ್ಸೆಗೆ ವ್ಯಯಿಸುತ್ತಿದ್ದಾರೆ. ಇನ್ನುಳಿದವರು ಸಂಬಂಧಿಕರಿಂದ ಸಾಲ ಪಡೆಯುವುದು (15%) ಅಥವಾ ಕುಟುಂಬದ ನೆರವಿನ ಮೇಲೆ ಅವಲಂಬಿತರಾಗಿದ್ದಾರೆ. ವಿಮೆ ಇಲ್ಲದವರ ಪಾಲಿಗೆ ಚಿಕಿತ್ಸಾ ವೆಚ್ಚದ ಶೇ. 98 ರಷ್ಟು ಭಾಗ ಸ್ವಂತ ಖರ್ಚಿನದ್ದೇ ಆಗಿರುತ್ತದೆ.
ಆಯುಷ್ಮಾನ್ ಭಾರತ್ – ಪ್ರಧಾನ ಮಂತ್ರಿ ಜನ ಆರೋಗ್ಯ ಯೋಜನೆಯಂತಹ (AB-PMJAY) ಯೋಜನೆಗಳು ಜಾರಿಯಲ್ಲಿದ್ದರೂ, ಹೃದಯ ವೈಫಲ್ಯದಂತಹ ದೀರ್ಘಕಾಲದ ಕಾಯಿಲೆಗಳ ನಿರ್ವಹಣೆಯಲ್ಲಿ ಅವುಗಳ ಪ್ರಯೋಜನ ಸೀಮಿತವಾಗಿದೆ. ಕೇವಲ ಆಸ್ಪತ್ರೆಗೆ ದಾಖಲಾದಾಗ ಸಿಗುವ ಸೌಲಭ್ಯವು ಸಾಕಾಗುತ್ತಿಲ್ಲ; ನಿರಂತರ ಔಷಧೋಪಚಾರ ಮತ್ತು ತಪಾಸಣೆಗಳಿಗೆ ರೋಗಿಗಳು ಹಣ ಹೊಂದಿಸಲು ಹೆಣಗಾಡುತ್ತಿದ್ದಾರೆ.
ಗ್ರಾಮೀಣ ಭಾಗದ ಜನತೆ, ಮಹಿಳೆಯರು ಮತ್ತು ಕಡಿಮೆ ಶಿಕ್ಷಣ ಪಡೆದವರಲ್ಲಿ ಈ ಆರ್ಥಿಕ ಹೊರೆ ಅತಿ ಹೆಚ್ಚಾಗಿ ಕಂಡುಬರುತ್ತಿದೆ. ಹೃದಯ ವೈಫಲ್ಯದ ಚಿಕಿತ್ಸೆಯು ಕೇವಲ ವೈದ್ಯಕೀಯ ಸೇವೆಗೆ ಸೀಮಿತವಾಗದೆ, ಸಮಗ್ರ ಆರೋಗ್ಯ ವಿಮೆ ಮತ್ತು ಸುಲಭ ದರದ ಔಷಧಗಳ ಲಭ್ಯತೆಯತ್ತ ಸರ್ಕಾರ ಗಮನ ಹರಿಸಬೇಕಾದ ತುರ್ತು ಅಗತ್ಯವಿದೆ.
