ಕಾಸರಗೋಡು: ಕೇರಳದ ಗಡಿ ಜಿಲ್ಲೆಯ ಹೈವೋಲ್ಟೇಜ್ ಕ್ಷೇತ್ರ ಮಂಜೇಶ್ವರದಲ್ಲಿ ಈ ಬಾರಿ ಚುನಾವಣಾ ಚಿತ್ರಣ ಸಂಪೂರ್ಣ ಬದಲಾಗಿದೆ. ನಾಮಪತ್ರ ಸಲ್ಲಿಕೆಯ ಕೊನೆಯ ದಿನವಾದ ಸೋಮವಾರ, ಎಸ್ಡಿಪಿಐ ತನ್ನ ಜಿಲ್ಲಾ ಸಮಿತಿ ಸದಸ್ಯ ಅಶ್ರಫ್ ಕೆ.ಎಂ. ಅವರನ್ನು ಕಣಕ್ಕಿಳಿಸುವ ಮೂಲಕ ಯುಡಿಎಫ್ಗೆ ಶಾಕ್ ನೀಡಿದೆ. ವಿಶೇಷವೆಂದರೆ, ಯುಡಿಎಫ್ ಅಭ್ಯರ್ಥಿ ಮತ್ತು ಹಾಲಿ ಶಾಸಕ ಎ.ಕೆ.ಎಂ. ಅಶ್ರಫ್ ಅವರ ಹೆಸರನ್ನೇ ಹೋಲುವ ಅಭ್ಯರ್ಥಿಯನ್ನು ಕಣಕ್ಕಿಳಿಸಿರುವುದು ಮತದಾರರಲ್ಲಿ ಗೊಂದಲ ಮೂಡಿಸುವ ತಂತ್ರ ಎಂದೇ ವಿಶ್ಲೇಷಿಸಲಾಗುತ್ತಿದೆ.
ಮಂಜೇಶ್ವರ ಕ್ಷೇತ್ರದಲ್ಲಿ ಯುಡಿಎಫ್ ಮತ್ತು ಬಿಜೆಪಿ ನಡುವೆ ಯಾವಾಗಲೂ ತುರುಸಿನ ಪೈಪೋಟಿ ಇರುತ್ತದೆ. 2016ರಲ್ಲಿ ಯುಡಿಎಫ್ ಕೇವಲ 89 ಮತಗಳಿಂದ ಮತ್ತು 2021ರಲ್ಲಿ 745 ಮತಗಳಿಂದಷ್ಟೇ ಗೆಲುವು ಸಾಧಿಸಿತ್ತು. ಇಂತಹ ಕಡಿಮೆ ಅಂತರದ ಗೆಲುವಿನ ಇತಿಹಾಸವಿರುವ ಕ್ಷೇತ್ರದಲ್ಲಿ, ಎಸ್ಡಿಪಿಐ ಸುಮಾರು 6,000 ದಿಂದ 7,000 ಮತಗಳನ್ನು ಹೊಂದುವ ಸಾಮರ್ಥ್ಯ ಹೊಂದಿದೆ. ಈಗ ಈ ಮತಗಳು ವಿಭಜನೆಯಾದರೆ, ಅದು ನೇರವಾಗಿ ಯುಡಿಎಫ್ಗೆ ಹೊಡೆತ ನೀಡಲಿದ್ದು, ಬಿಜೆಪಿಯ ಬಲಿಷ್ಠ ಅಭ್ಯರ್ಥಿ ಕೆ. ಸುರೇಂದ್ರನ್ ಅವರಿಗೆ ಹಾದಿ ಸುಗಮವಾಗುವ ಸಾಧ್ಯತೆಯಿದೆ.
ಎಸ್ಡಿಪಿಐ ಅಸಮಾಧಾನಕ್ಕೆ ಕಾರಣವೇನು?
2009ರಲ್ಲಿ ಸ್ಥಾಪನೆಯಾದ ನಂತರ ಎಸ್ಡಿಪಿಐ ಮಂಜೇಶ್ವರದಲ್ಲಿ ಬಿಜೆಪಿ ಗೆಲ್ಲಬಾರದು ಎಂಬ ಕಾರಣಕ್ಕೆ ಸ್ಪರ್ಧೆಯಿಂದ ದೂರವಿತ್ತು. ಆದರೆ ಈ ಬಾರಿ ಯುಡಿಎಫ್ ನಾಯಕರ ವರ್ತನೆ ಮತ್ತು ಮುಸ್ಲಿಂ ಲೀಗ್ನ ಏಕಪಕ್ಷೀಯ ಧೋರಣೆಯಿಂದ ಬೇಸತ್ತು ಸ್ಪರ್ಧೆಗೆ ಇಳಿದಿದೆ.
ಸೋಲಿನ ಸೇಡು: ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ಯುಡಿಎಫ್ ನಾಯಕ ವಿ.ಡಿ. ಸತೀಶನ್ ಅವರು ಎಸ್ಡಿಪಿಐ ವಿರುದ್ಧ ನೀಡಿದ್ದ ಸಾರ್ವಜನಿಕ ಹೇಳಿಕೆಗಳು ಮತ್ತು ಮೈತ್ರಿ ನಿರಾಕರಣೆಯು ಈ ನಿರ್ಧಾರಕ್ಕೆ ಮುಖ್ಯ ಕಾರಣ ಎನ್ನಲಾಗಿದೆ.
ಎಲ್ಡಿಎಫ್ ತಿರಸ್ಕಾರ: ಎಸ್ಡಿಪಿಐ ಈ ಹಿಂದೆ ಎಲ್ಡಿಎಫ್ಗೆ ಬೆಂಬಲ ನೀಡಲು ಮುಂದಾಗಿತ್ತು, ಆದರೆ ಸಿಪಿಎಂ ಅದನ್ನು ನಿರಾಕರಿಸಿ ತನ್ನದೇ ಅಭ್ಯರ್ಥಿಯನ್ನು ಕಣಕ್ಕಿಳಿಸಿದೆ. ಇದರಿಂದ ಅನಿವಾರ್ಯವಾಗಿ ಎಸ್ಡಿಪಿಐ ಸ್ವತಂತ್ರವಾಗಿ ಕಣಕ್ಕಿಳಿಯುವಂತಾಗಿದೆ.
ಹೆಸರಿನ ಗೊಂದಲದ ‘ರಾಜಕೀಯ’
ಯುಡಿಎಫ್ ಅಭ್ಯರ್ಥಿ ಎ.ಕೆ.ಎಂ. ಅಶ್ರಫ್ ಮತ್ತು ಎಸ್ಡಿಪಿಐ ಅಭ್ಯರ್ಥಿ ಅಶ್ರಫ್ ಕೆ.ಎಂ. ಅವರ ಹೆಸರುಗಳು ಹೆಚ್ಚು ಕಡಿಮೆ ಒಂದೇ ಆಗಿರುವುದು ಮತದಾರರಲ್ಲಿ ಗೊಂದಲ ಸೃಷ್ಟಿಸಬಹುದು. ಈ ಹಿಂದೆ ಹಲವು ಚುನಾವಣೆಗಳಲ್ಲಿ ಇಂತಹ “ಹೆಸರಿನ ರಾಜಕೀಯ”ದಿಂದಾಗಿ ಪ್ರಬಲ ಅಭ್ಯರ್ಥಿಗಳು ಅಲ್ಪ ಮತಗಳ ಅಂತರದಲ್ಲಿ ಸೋತ ಉದಾಹರಣೆಗಳಿವೆ. ಮಂಜೇಶ್ವರದಂತಹ ಕನಿಷ್ಠ ಮತಗಳ ಅಂತರದ ಕ್ಷೇತ್ರದಲ್ಲಿ ಈ ಪ್ರಕ್ರಿಯೆ ನಿರ್ಣಾಯಕವಾಗಲಿದೆ.
