ಮಂಗಳೂರು: ಇದು ನಮ್ಮ ನಾಡಿನ ವಿಚಿತ್ರ ಶೋಕಿ. ಒಬ್ಬ ನಟ ಬಿಗ್ಬಾಸ್ ಗೆದ್ದು ಹೊರಗೆ ಬಂದ ತಕ್ಷಣ ಆತ ಎಲ್ಲರ ಮನೆಗೆ ಬಂದು ಕಾಫಿ ಕುಡಿಯಬೇಕು, ಕೇಳಿದವರ ಜೊತೆ ಹಲ್ಲು ಬಿಟ್ಟುಕೊಂಡು ಫೋಟೋ ಕೊಡಬೇಕು, ಇಲ್ಲದಿದ್ದರೆ ಆತ ‘ಅಹಂಕಾರಿ’! ಇದ್ಯಾವ ಸೀಮೆ ನ್ಯಾಯ ಸ್ವಾಮಿ?
ವೋಟ್ ಹಾಕಿದ್ರೆ ಆತನನ್ನು ಕೊಂಡುಕೊಂಡಂತೆಯೇ?
ಬಹಳ ಜನ ಅಭಿಮಾನಿಗಳು “ನಾವು ವೋಟ್ ಹಾಕಿದ್ದಕ್ಕೆ ನೀನು ಗೆದ್ದೆ” ಅಂತ ಹಕ್ಕು ಚಲಾಯಿಸ್ತಾರೆ. ಹೌದು, ನೀವು ಪ್ರೀತಿಯಿಂದ ವೋಟ್ ಹಾಕಿದ್ದೀರಿ, ಅದಕ್ಕೆ ಆತ ಕಿರೀಟ ತೊಟ್ಟಿದ್ದಾನೆ. ಆದರೆ ವೋಟ್ ಹಾಕಿದ ತಕ್ಷಣ ಆ ಮನುಷ್ಯ ನಿಮ್ಮ ಜೀತದಾಳು ಅಂತ ಅರ್ಥವೇ? ಆ ಗಿಲ್ಲಿ ಅನ್ನೋ ಜೀವ ನೂರು ದಿನಗಳ ಕಾಲ ಒಂದು ಕತ್ತಲ ಕೋಣೆಯಂತಿರೋ ಮನೆಯಲ್ಲಿ ನರಳಿ ಹೊರಬಂದಿದ್ದಾನೆ. ಆತನ ಮೆದುಳು ಇನ್ನೂ ಹೊರಗಿನ ಜಗತ್ತಿನ ಈ ಕರ್ಕಶ ಶಬ್ದಕ್ಕೆ ಅಡ್ಜಸ್ಟ್ ಆಗಿಲ್ಲ. ಆ ಮನುಷ್ಯನಿಗೆ ಸ್ವಲ್ಪ ಉಸಿರಾಡಲು ಬಿಡಿ ಅಂದ್ರೆ, ಈ ಹುಚ್ಚು ಅಭಿಮಾನಿಗಳು ಆತನ ಕೊರಪಟ್ಟಿ ಹಿಡಿಯೋಕೆ ಹೋಗ್ತಿದ್ದಾರೆ!
ಸಾಧು ಕೋಕಿಲ ಹೇಳಿದ್ದು ಸರಿ ಇದೆ!
ನಮ್ಮ ಸಾಧು ಕೋಕಿಲ ಅವರು ಬಹಳ ಮಾರ್ಮಿಕವಾಗಿ ಹೇಳಿದ್ದಾರೆ—”ಅವನು ಅಷ್ಟೊಂದು ದಿನ ಹೊರಗಿನ ಪ್ರಪಂಚ ನೋಡಿಲ್ಲ, ಅವನಿಗೆ ಸ್ವಲ್ಪ ಸಮಯ ಕೊಡಿ” ಅಂತ. ಆದರೆ ಈ ಶೋಕಿ ಅಭಿಮಾನಿಗಳಿಗೆ ಅದು ಅರ್ಥವಾಗ್ತಿಲ್ಲ. ಗಿಲ್ಲಿ ಸೈಲೆಂಟ್ ಆಗಿದ್ದಾನೆ ಅಂದ್ರೆ ಅದು ಆತನ ಮಾನಸಿಕ ಸ್ಥಿತಿ, ಅಹಂಕಾರವಲ್ಲ. ಹಗಲು ರಾತ್ರಿ ಫೋನಿನ ಮೇಲೆ ಫೋನು ಮಾಡಿ, ದಾರಿಯಲ್ಲಿ ಅಡ್ಡಗಟ್ಟಿ ಸೆಲ್ಫಿಗಾಗಿ ಪೀಡಿಸೋದು ಅಭಿಮಾನ ಅಲ್ಲ, ಅದು ಶುದ್ಧ ‘ಮಾನಸಿಕ ಹಿಂಸೆ’.
ನಟರೂ ಮನುಷ್ಯರೇ, ರೋಬೋಟ್ ಅಲ್ಲ!
ಪ್ರತಿ ಹಂತದಲ್ಲೂ ಆತ ಕ್ಷಮೆ ಕೇಳಬೇಕು, ಪ್ರತಿ ಫೋಟೋವನ್ನೂ ಸಾಮಾಜಿಕ ಜಾಲತಾಣದಲ್ಲಿ ಹಾಕಬೇಕು ಅಂದ್ರೆ ಆತ ನಟನಾ ಅಥವಾ ನಿಮ್ಮ ಮನೆಯ ಆಟದ ಬೊಂಬೆಯಾ? ಸೆಲೆಬ್ರಿಟಿ ಅಂದ ತಕ್ಷಣ ಆತನಿಗೆ ಖಾಸಗಿ ಬದುಕು ಇರಬಾರದಾ? ಈ ರೀತಿಯ ಅತಿರೇಕದ ವರ್ತನೆಯಿಂದಲೇ ಎಷ್ಟೋ ಕಲಾವಿದರು ಸಮಾಜದಿಂದ ದೂರ ಉಳಿಯೋಕೆ ಬಯಸ್ತಾರೆ.
ಅಭಿಮಾನ ಇರಲಿ, ಅದಕ್ಕೆ ಒಂದು ಗೌರವ ಇರಲಿ. ಪ್ರೀತಿ ಅನ್ನೋ ಹೆಸರಲ್ಲಿ ಆ ಗಿಲ್ಲಿ ನಟನ ಉಸಿರು ಕಟ್ಟಿಸಬೇಡಿ. ನೆನಪಿರಲಿ, ಆತನಿಗೂ ಒಂದು ಕುಟುಂಬ ಇದೆ, ಆತನಿಗೂ ಸುಸ್ತಾಗುತ್ತೆ. ಈ ಹುಚ್ಚು ಶೋಕಿ ಹೀಗೆಯೇ ಮುಂದುವರಿದರೆ, ಮುಂದೆ ಯಾವ ಕಲಾವಿದನೂ ನಿಮ್ಮ ಹತ್ತಿರ ಸುಳಿಯಲ್ಲ. ಕನ್ನಡಿ ಮುಂದೆ ನಿಂತು ಒಮ್ಮೆ ನಿಮ್ಮನ್ನು ನೀವೇ ಕೇಳಿಕೊಳ್ಳಿ—ಇದು ಅಭಿಮಾನವೋ ಅಥವಾ ಹಸಿಬಿಸಿ ಅವಿವೇಕವೋ?
