ಮಂಗಳೂರು: ಕನ್ನಡ ಮತ್ತು ತೆಲುಗು ಚಿತ್ರರಂಗಗಳಲ್ಲಿ ಸಕ್ರಿಯವಾಗಿ ನಟಿಸುತ್ತಿರುವ ಶಾನ್ವಿ ಶ್ರೀವಾತ್ಸವ್ ಮಂಗಳೂರಿನ ಬೆಂದೂರ್‌ವೆಲ್‌ನಲ್ಲಿ ಆದಿತ್ಯ ಬಿರ್ಲಾ ಗುಂಪಿನ ಇಂದ್ರಿಯಾ ಗೋಲ್ಡ್ ಚಿನ್ನದ ಮಳಿಗೆಯ ಹೊಸ ಶಾಖೆಯನ್ನು ಭಾನುವಾರ ಉದ್ಘಾಟಿಸಿದರು. ಮಳಿಗೆಯ ಉದ್ಘಾಟನಾ ಸಮಾರಂಭಕ್ಕೆ ಅಭಿಮಾನಿಗಳು ಹಾಗೂ ಸ್ಥಳೀಯರು ಹೆಚ್ಚಿನ ಸಂಖ್ಯೆಯಲ್ಲಿ ಹಾಜರಿದ್ದರು.
ಈ ವೇಳೆ ಮಂಗಳೂರಿನ ಜನತೆಯನ್ನು ಹೊಗಳಿದರಲ್ಲದೆ, ಇಲ್ಲಿನ ಜನರು ಆಭರಣ ಪ್ರಿಯರು ಅವರ ಮನಸ್ಸು ಚಿನ್ನದಂತೆ ಎಂದು ನುಡಿದರು.
1992 ಡಿಸೆಂಬರ್ 8ರಂದು ವಾರಣಾಸಿಯಲ್ಲಿ ಜನಿಸಿದ ಶಾನ್ವಿ ಶ್ರೀವಾತ್ಸವ್ ಅವರ ಮೂಲ ಹೆಸರು ಶಾನ್ವಿ ನಾಯರ್. ಕೇರಳ ಮೂಲದ ಇವರ ಬಾಲ್ಯದ ಶಿಕ್ಷಣ ಉತ್ತರ ಪ್ರದೇಶದ ಆಜಂಘಡಿನಲ್ಲಿ ನಡೆದಿದ್ದು, ನಂತರ ಮುಂಬೈನ ಠಾಕೂರ್ ಕಾಲೇಜಿನಲ್ಲಿ ಬಿಕಾಂ ಪದವಿ ಪೂರ್ಣಗೊಳಿಸಿದ್ದಾರೆ. ರೂಪದರ್ಶಿಯಾಗಿ ವೃತ್ತಿ ಜೀವನ ಆರಂಭಿಸಿದ ಅವರು, ನಂತರ ಸಿನಿರಂಗಕ್ಕೆ ಪ್ರವೇಶಿಸಿದರು.
2012ರಲ್ಲಿ ತೆಲುಗು ಚಿತ್ರದ ಲವ್ಲಿ ಮೂಲಕ ಬೆಳ್ಳಿ ಪರದೆಗೆ ಪ್ರವೇಶಿಸಿದ ಶಾನ್ವಿ, ಮೊದಲ ಸಿನಿಮಾದಲ್ಲೇ ಪ್ರೇಕ್ಷಕರ ಮೆಚ್ಚುಗೆ ಪಡೆದರು. ಬಳಿಕ ಅಡ್ಡಾ ಮತ್ತು ರೌಡಿ ಚಿತ್ರಗಳಲ್ಲಿ ನಟಿಸಿ ತೆಲುಗು ಚಿತ್ರರಂಗದಲ್ಲಿ ತಮ್ಮ ಸ್ಥಾನವನ್ನು ಬಲಪಡಿಸಿದರು.
ಕನ್ನಡ ಚಿತ್ರರಂಗಕ್ಕೆ 2014ರಲ್ಲಿ ಬಿಡುಗಡೆಯಾದ ಚಂದ್ರಲೇಖಾ ಚಿತ್ರದ ಮೂಲಕ ಪಾದಾರ್ಪಣೆ ಮಾಡಿದ ಅವರು, ನಂತರ ಮಾಸ್ಟರ್ ಪೀಸ್, ಭಲೇ ಜೋಡಿ, ಸುಂದರಾಂಗ ಜಾಣ, ಸಾಹೇಭ, ತಾರಕ್ ಮತ್ತು ಮಫ್ಟಿ ಚಿತ್ರಗಳಲ್ಲಿ ಅಭಿನಯಿಸಿ ಕನ್ನಡ ಪ್ರೇಕ್ಷಕರ ಮನಗೆದ್ದರು. ತನ್ನ ಅಭಿನಯ ವೈಶಿಷ್ಟ್ಯ, ಪಾತ್ರಗಳಿಗೆ ತಕ್ಕ ವ್ಯಕ್ತಿತ್ವ ಮತ್ತು ಸೊಬಗಿನ ರೂಪದೊಂದಿಗೆ ದಕ್ಷಿಣ ಭಾರತೀಯ ಚಿತ್ರರಂಗದ ಗಮನಾರ್ಹ ನಟಿಯಾಗಿ ಶಾನ್ವಿ ಗುರುತಿಸಿಕೊಂಡಿದ್ದಾರೆ.
ಉದ್ಘಾಟನಾ ಸಮಾರಂಭದಲ್ಲಿ ಶಾನ್ವಿಯ ಹಾಜರಾತಿ ಮಳಿಗೆಯ ಉದ್ಘಾಟನೆಗೆ ವಿಶೇಷ ಮೆರಗು ನೀಡಿದ್ದು, ಮಂಗಳೂರಿನ ಅಭಿಮಾನಿಗಳು ಅವರೊಂದಿಗೆ ಕ್ಷಣಗಳನ್ನು ಹಂಚಿಕೊಳ್ಳಲು ಉತ್ಸಾಹಭರಿತರಾಗಿದ್ದರು.