ಇನ್ನು ಫಹೀಮ್ ಖಾನ್ ನಾಗ್ಪುರದ ಸ್ಥಳೀಯ ಮುಸ್ಲಿಂ ನಾಯಕನಾಗಿದ್ದು, ಅಲ್ಪಸಂಖ್ಯಾತ ಪ್ರಜಾಸತ್ತಾತ್ಮಕ ಪಕ್ಷದ ಅಧ್ಯಕ್ಷನೂ ಆಗಿದ್ದಾನೆ. ಜೊತೆಗೆ ಕೇಂದ್ರ ಸಚಿವ ನಿತಿನ್ ಗಡ್ಕರಿ ವಿರುದ್ಧ ಲೋಕಸಭಾ ಚುನಾವಣೆಯಲ್ಲಿ ಸ್ಪರ್ಧಿಸಿ, ಠೇವಣಿಯನ್ನು ಕಳೆದುಕೊಂಡಿದ್ದ.
ಎಫ್‌ಐಆರ್ ಪ್ರಕಾರ, ವಿಶ್ವ ಹಿಂದೂ ಪರಿಷತ್ ಮತ್ತು ಬಜರಂಗ ದಳದ ಸದಸ್ಯರು ಗಾಂಧಿ ಗೇಟ್ ಬಳಿ ಛತ್ರಪತಿ ಶಿವಾಜಿ ಮಹಾರಾಜರ ಪ್ರತಿಮೆಯ ಮುಂದೆ ಪ್ರತಿಭಟನೆ ನಡೆಸಿದರು. ಈ ವೇಳೆ ಅವರು ಔರಂಗಜೇಬನ ಸಮಾಧಿಯ ವಿರುದ್ಧ ಘೋಷಣೆಗಳನ್ನು ಕೂಗಿ, ಔರಂಗಜೇಬನ ಸಾಂಕೇತಿಕ ಪ್ರತಿಕೃತಿಯನ್ನು ಸುಟ್ಟುಹಾಕಿದರು. ಇದಕ್ಕೆ ಪ್ರತಿಕ್ರಿಯೆಯಾಗಿ, ಅಲ್ಪಸಂಖ್ಯಾತ ಪ್ರಜಾಸತ್ತಾತ್ಮಕ ಪಕ್ಷದ ನಗರ ಅಧ್ಯಕ್ಷ ಫಹೀಮ್ ಶಮೀಮ್ ಖಾನ್ ನೇತೃತ್ವದಲ್ಲಿ 50 ರಿಂದ 60 ಜನರು ಪೊಲೀಸ್ ಠಾಣೆಯಲ್ಲಿ ಅಕ್ರಮವಾಗಿ ಗುಂಪುಗೂಡಿದರು. ಈ ಗುಂಪು ಲಿಖಿತ ಕೋರಿಕೆ ಸಲ್ಲಿಸಿ, ಔರಂಗಜೇಬನನ್ನು ವಿರೋಧಿಸಿದ 9 ಜನರ ವಿರುದ್ಧ ಪ್ರಕರಣ ದಾಖಲಿಸುವಂತೆ ಒತ್ತಾಯಿಸಿತು.
ಮತ್ತೊಂದೆಡೆ ಪೊಲೀಸರ ಪ್ರಕಾರ, ಈ ಸಂದರ್ಭದಲ್ಲಿ ಜನಸಂದಣಿಗೆ ಶಾಂತಿ ಕಾಪಾಡುವಂತೆ ಸೂಚಿಸಲಾಗಿತ್ತು. ಆದರೆ, ಈ ಸೂಚನೆಯನ್ನು ಧಿಕ್ಕರಿಸಿ, ಫಹೀಮ್ ಖಾನ್ ನೇತೃತ್ವದ ಗುಂಪು ಗಲಭೆ ಪ್ರಚೋದಿಸುವ ಉದ್ದೇಶದಿಂದ ಸಂಜೆ 4 ಗಂಟೆ ಸುಮಾರಿಗೆ ಛತ್ರಪತಿ ಶಿವಾಜಿ ಪ್ರತಿಮೆಯ ಬಳಿ ತಮ್ಮ ಧರ್ಮದ 400 ರಿಂದ 500 ಜನರನ್ನು ಒಟ್ಟುಗೂಡಿಸಿತು. ಈ ಜನಸಮೂಹ ಕಾನೂನುಬಾಹಿರವಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ. ಈ ಗುಂಪು ತೊಲಗಿ, ಸುರಕ್ಷಿತವಾಗಿ ಮನೆಗೆ ಹೋಗುವಂತೆ ಭಾಷಣಕಾರರ ಮೂಲಕ ಪದೇ ಪದೇ ಎಚ್ಚರಿಕೆ ನೀಡಲಾಗಿತ್ತು.
ಆದಾಗ್ಯೂ, ಜನರು ಪರಸ್ಪರ ಗಲಭೆಗೆ ಪ್ರಚೋದಿಸುವ ಘೋಷಣೆಗಳನ್ನು ಕೂಗತೊಡಗಿದರು. ಎಫ್‌ಐಆರ್‌ನಲ್ಲಿ ಪೊಲೀಸರು ಉಲ್ಲೇಖಿಸಿರುವಂತೆ, ಗುಂಪಿನಲ್ಲಿ “ಈಗ ಪೊಲೀಸರು ಗೋಚರಿಸುತ್ತಿದ್ದಾರೆ, ನಾವು ಅವರನ್ನು ಅಥವಾ ಯಾವುದೇ ಹಿಂದೂವನ್ನು ಬಿಡಬಾರದು” ಎಂಬ ಮಾತುಗಳು ಕೇಳಿಬಂದವು. ಇದರ ಜೊತೆಗೆ, “ಇಡೀ ಆಟವನ್ನು ಆಡಿದ್ದು ಅವನೇ, ಇದೆಲ್ಲವನ್ನೂ ಮಾಡಿದ್ದು ಅವನೇ” ಎಂಬ ಸುಳ್ಳು ವದಂತಿಗಳನ್ನು ಹರಡುವ ಮೂಲಕ ಪೊಲೀಸರ ವಿರುದ್ಧ ಅಸಮಾಧಾನ ಮೂಡಿಸಲಾಯಿತು. ಇದರಿಂದ ಜನಸಮೂಹ ಹೆಚ್ಚು ಹಿಂಸಾತ್ಮಕವಾಯಿತು ಎನ್ನಲಾಗಿದೆ. ಇದರೊಂದಿಗೆ ಧಾರ್ಮಿಕ ದ್ವೇಷವನ್ನು ಪ್ರಚೋದಿಸುವದರೊಂದಿಗೆ ಜನರಲ್ಲಿ ಭಯ ಸೃಷ್ಟಿಸುವ ಮತ್ತು ಸಾಮಾಜಿಕ ಸಾಮರಸ್ಯವನ್ನು ಕದಡುವ ಉದ್ದೇಶದಿಂದ ಗುಂಪು ಕೊಡಲಿ, ಕಲ್ಲುಗಳು, ಕೋಲುಗಳು ಮತ್ತು ಇತರ ಮಾರಕ ಆಯುಧಗಳನ್ನು ಬೀಸಿತು ಎಂದು ಉಲ್ಲೇಖಿಸಲಾಗಿದೆ.