ಶಬರಿಮಲೆ ಯಾತ್ರೆ: ಅರಣ್ಯ ಮಾರ್ಗಗಳಿಂದ ಆಗಮಿಸುವ ಭಕ್ತರ ಸಂಖ್ಯೆ ಗಣನೀಯ ಏರಿಕೆ

ತಿರುವನಂತಪುರಂ: ಶಬರಿಮಲೆಯ ಅಯ್ಯಪ್ಪ ಸ್ವಾಮಿ ದೇವಸ್ಥಾನಕ್ಕೆ ನಡೆಯುತ್ತಿರುವ ಈ ವರ್ಷದ ತೀರ್ಥಯಾತ್ರೆಯ ಋತುವಿನಲ್ಲಿ, ಸಾಂಪ್ರದಾಯಿಕ ಅರಣ್ಯ ಮಾರ್ಗಗಳ ಮೂಲಕ ಪಾದಯಾತ್ರೆ ನಡೆಸಿ ಸನ್ನಿಧಾನ ತಲುಪುವ ಭಕ್ತರ ಸಂಖ್ಯೆ ಗಣನೀಯವಾಗಿ ಹೆಚ್ಚಾಗಿದೆ ಎಂದು ಅಧಿಕಾರಿಗಳು ಭಾನುವಾರ ತಿಳಿಸಿದ್ದಾರೆ.

ತಿರುವಾಂಕೂರು ದೇವಸ್ವಂ ಮಂಡಳಿ (ಟಿಡಿಬಿ) ನೀಡಿರುವ ಮಾಹಿತಿಯಂತೆ, ಇದುವರೆಗೆ ಒಟ್ಟು 1,02,338 ಯಾತ್ರಿಕರು ವಿವಿಧ ಅರಣ್ಯ ಮಾರ್ಗಗಳ ಮೂಲಕ ಶಬರಿಮಲೆ ಸನ್ನಿಧಾನವನ್ನು ತಲುಪಿದ್ದಾರೆ. ಈ ಪೈಕಿ 37,059 ಭಕ್ತರು ಅಳುತಕಡವು–ಪಂಪಾ ಮಾರ್ಗವನ್ನು ಬಳಸಿದ್ದು, ಈ ಮಾರ್ಗದಲ್ಲಿ ಪ್ರತಿದಿನ ಸರಾಸರಿ 1,500 ರಿಂದ 2,500 ಯಾತ್ರಿಕರು ಆಗಮಿಸುತ್ತಿದ್ದಾರೆ ಎಂದು ಟಿಡಿಬಿ ಹೇಳಿಕೆಯಲ್ಲಿ ತಿಳಿಸಿದೆ.

ಇನ್ನೂ 64,776 ಭಕ್ತರು ಸತ್ರಂ ಮಾರ್ಗವನ್ನು ಆಯ್ಕೆ ಮಾಡಿಕೊಂಡಿದ್ದು, ಈ ಮಾರ್ಗದಲ್ಲಿ ದಿನನಿತ್ಯ 4,000 ರಿಂದ 5,000 ಪಾದಯಾತ್ರಿಕರು ಸನ್ನಿಧಾನ ತಲುಪುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ಅರಣ್ಯ ಮಾರ್ಗಗಳನ್ನು ಬಳಸುವ ಭಕ್ತರ ಸಂಖ್ಯೆ ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ ಎಂದು ಅಧಿಕಾರಿಗಳು ನಿರೀಕ್ಷಿಸಿದ್ದಾರೆ.

ಈ ನಡುವೆ, ಈ ಋತುವಿನಲ್ಲಿ ಶಬರಿಮಲೆಗೆ ದರ್ಶನಕ್ಕಾಗಿ ಆಗಮಿಸಿರುವ ಒಟ್ಟು ಯಾತ್ರಿಕರ ಸಂಖ್ಯೆ 24 ಲಕ್ಷವನ್ನು ದಾಟಿದೆ. ಡಿಸೆಂಬರ್ 13ರವರೆಗೆ ಪಂಬಾ–ಶಬರಿಮಲೆ ಮುಖ್ಯ ಮಾರ್ಗದ ಮೂಲಕ ಮಾತ್ರ 23,47,554 ಭಕ್ತರು ಸನ್ನಿಧಾನವನ್ನು ತಲುಪಿದ್ದಾರೆ.

ಅರಣ್ಯ ಮಾರ್ಗಗಳ ಮೂಲಕ ಆಗಮಿಸಿದವರನ್ನೂ ಸೇರಿಸಿಕೊಂಡರೆ, ಒಟ್ಟು ಪಾದಯಾತ್ರಿಕರ ಸಂಖ್ಯೆ 24 ಲಕ್ಷಕ್ಕಿಂತ ಅಧಿಕವಾಗಿದೆ. ಪ್ರಸ್ತುತ ದಿನನಿತ್ಯ ಸರಾಸರಿ 80,000 ಯಾತ್ರಿಕರು ಶಬರಿಮಲೆಗೆ ಆಗಮಿಸುತ್ತಿದ್ದಾರೆ ಎಂದು ಟಿಡಿಬಿ ತಿಳಿಸಿದೆ.

ಈ ಋತುವಿನ ಅತ್ಯಧಿಕ ಪಾದಯಾತ್ರೆ ಡಿಸೆಂಬರ್ 8ರಂದು ದಾಖಲಾಗಿದ್ದು, ಆ ದಿನ 1,01,844 ಭಕ್ತರು ಅಯ್ಯಪ್ಪ ಸ್ವಾಮಿಯ ದರ್ಶನ ಪಡೆದಿದ್ದರು. ಇದಕ್ಕೂ ಮುನ್ನ ನವೆಂಬರ್ 24ರಂದು ಯಾತ್ರಿಕರ ಸಂಖ್ಯೆ 1,00,867ಕ್ಕೆ ತಲುಪಿತ್ತು ಎಂದು ದೇವಸ್ವಂ ಮಂಡಳಿ ಹೇಳಿಕೆಯಲ್ಲಿ ತಿಳಿಸಿದೆ.