ಸುರತ್ಕಲ್: ಕರ್ನಾಟಕ ರಾಜ್ಯದ ಕಡಲತಡಿಯ ಹೆಬ್ಬಾಗಿಲು ಎಂದೇ ಕರೆಯಲ್ಪಡುವ ನವಮಂಗಳೂರು ಬಂದರು ಪ್ರಾಧಿಕಾರವು ಇದೀಗ ಸುವರ್ಣ ಮಹೋತ್ಸವ ಆಚರಿಸುತ್ತಿದೆ. ಆದರೆ ಇದಕ್ಕಾಗಿ ಭೂಮಿ ತ್ಯಾಗ ಮಾಡಿದ ಪಣಂಬೂರು, ಬೈಕಂಪಾಡಿ ಮತ್ತು ಆಸುಪಾಸಿನ ಗ್ರಾಮಸ್ಥರು ಇಂದಿಗೂ ಮೂಲ ಸೌಕರ್ಯದಿಂದ ವಂಚಿತರಾಗಿದ್ದಾರೆ. 65 ವರ್ಷಗಳೂ ಸಂದರೂ ಕಾಟಿಪಳ್ಳ ಪ್ರದೇಶದಲ್ಲಿ ಕನಿಷ್ಠ ಸೌಲಭ್ಯಗಳಿಗೂ ಅಂಗಲಾಚುವ ಪರಿಸ್ಥಿತಿ ಇಂದಿಗೂ ಇದ್ದು ಪರಿಹಾರ ಒದಗಿಸಬೇಕು ಎಂದು ನಿರ್ವಸಿತ ಸರ್ವ ಧರ್ಮಿಯರ ಸಮಿತಿ ಬಂದರು ಪ್ರಾಧಿಕಾರವನ್ನು ಮನವಿ ಮೂಲಕ ಒತ್ತಾಯಿಸಿದೆ.
ಬಂದರು ಪ್ರಾಧಿಕಾರದ ಸಿ ಎಸ್ ಆರ್ ನಿಧಿಗಳು ರಾಜ್ಯದ ಬೇರೆ ಬೇರೆ ಮೂಲಗಳಿಗೆ ಹಾಗೂ ಇತರ ರಾಜ್ಯಗಳಿಗೆ ಹಂಚಿ ಹೋದರೂ ಬಂದರು ನಿರ್ಮಾಣಕ್ಕಾಗಿ ತನ್ನ ಆಸ್ತಿಪಾಸ್ತಿಗಳನ್ನು ಬಿಟ್ಟು ಕಾಟಿಪಳ್ಳ ಗ್ರಾಮದಲ್ಲಿ ನೆಲೆಯೂರಿರುವ ಸಂತ್ರಸ್ತರಿಗೆ ಯಾವುದೇ ಯೋಜನೆಗಳು ಸಿಗುತ್ತಿಲ್ಲ. ಆದುದರಿಂದ ಕಾಟಿಪಳ್ಳ ಗ್ರಾಮದಲ್ಲಿ ನಿರ್ವಾಸಿತರ ಆರೋಗ್ಯ ರಕ್ಷಣೆಗಾಗಿ, ತುರ್ತು ಸೇವೆ ನೀಡಲು ನೂತನ 50 ಹಾಸಿಗೆ ಗಳ ಸಮುದಾಯ ಆರೋಗ್ಯ ಕೇಂದ್ರ ಕಟ್ಟಡ ನಿರ್ಮಾಣ ಜತೆಗೆ ಹರಿಗೆ ವಿಭಾಗ, ದಂತ ವೈದ್ಯಕೀಯ, ಕಣ್ಣಿನ ವಿಭಾಗ ಸಹಿತ ಅವಶ್ಯ ವಿಭಾಗಗಳನ್ನು ಸೌಲಭ್ಯ ನೀಡಬೇಕು. ಕಾಟಿಪಳ್ಳ ಪ್ರದೇಶದಲ್ಲಿ ಒಳ ಚರಂಡಿ ನಿರ್ಮಾಣ ಕಾಮಗಾರಿಗಳಿಗೆ ಆಗತ್ಯವಿರುವ ನಿಧಿಯನ್ನು ನವಮಂಗಳೂರು ಬಂದರು ಪ್ರಾಧಿಕಾರದಿಂದ ಒದಗಿಸಬೇಕು ಎಂದು ಸಮಿತಿಯ ವಿಠ್ಠಲ ಶೆಟ್ಟಿಗಾರ್ ನೇತೃತ್ವದಲ್ಲಿ ಮನವಿ ಅರ್ಪಿಸಿದೆ.