ನವದೆಹಲಿ: ತೀವ್ರ ಸೌರ ವಿಕಿರಣದಿಂದಾಗಿ ವಿಮಾನದ ಹಾರಾಟ ನಿಯಂತ್ರಣ ವ್ಯವಸ್ಥೆಯ ಡೇಟಾವನ್ನು ಹಾನಿಗೊಳಿಸುವ ಸಾಧ್ಯತೆ ಇದೆ ಇರುವುದು ಪತ್ತೆಯಾದ ಬೆನ್ನಲ್ಲೇ ಏರ್‌ಬಸ್ ತನ್ನ A320 ಸರಣಿಯ ವಿಮಾನಗಳನ್ನು ನಿರ್ವಹಿಸುವ ಎಲ್ಲಾ ವಿಮಾನಯಾನ ಸಂಸ್ಥೆಗಳಿಗೆ ಜಾಗತಿಕ ತಾಂತ್ರಿಕ ಎಚ್ಚರಿಕೆಯನ್ನು ಬಿಡುಗಡೆ ಮಾಡಿದೆ. ಅಲ್ಲದೆ ಸಾಫ್ಟ್‌ವೇರ್ ದೋಷದಿಂದಾಗಿ 6,000 ವಿಮಾನಗಳು ಹಾರಾಟ ಸ್ಥಗಿತಗೊಳಿಸಿದೆ ಎನ್ನಲಾಗಿದೆ.
ಇತ್ತೀಚಿನ ಘಟನೆಯೊಂದರ ವಿಶ್ಲೇಷಣೆಯಲ್ಲಿ ಬೆಳಕಿಗೆ ಬಂದಿರುವ ಈ ತಾಂತ್ರಿಕ ಅಪಾಯವು ಪ್ರಸ್ತುತ ಸೇವೆಯಲ್ಲಿರುವ ಗಣನೀಯ ಸಂಖ್ಯೆಯ A320 ವಿಮಾನಗಳಿಗೆ ಸಂಬಂಧಿಸಿದೆ ಎಂದು ಏರ್‌ಬಸ್ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ. ವಿಮಾನಯಾನ ಸಂಸ್ಥೆಗಳು ತಕ್ಷಣ ಕೈಗೊಳ್ಳಬೇಕಾದ ಮುನ್ನೆಚ್ಚರಿಕೆ ಕ್ರಮಗಳಿಗಾಗಿ Alert Operators Transmission (AOT) ಮೂಲಕ ಮಾರ್ಗಸೂಚಿ ನೀಡಲಾಗಿದೆ.
ಏರ್‌ಬಸ್ ಹೇಳುವಂತೆ, ಸಾಫ್ಟ್‌ವೇರ್ ಮತ್ತು/ಅಥವಾ ಹಾರ್ಡ್‌ವೇರ್ ರಕ್ಷಣಾ ನವೀಕರಣಗಳು ಕಡ್ಡಾಯವಾಗಿದ್ದು, ಅವನ್ನು ಅಳವಡಿಸುವವರೆಗೆ ಕೆಲವೊಂದು ವಿಮಾನಗಳು ಕಾರ್ಯಾಚರಣೆಯಿಂದ ಹೊರಗಿಡಬೇಕಾಗಬಹುದು. ಇದರಿಂದ ಜಾಗತಿಕ ಮಟ್ಟದಲ್ಲಿ ಸಮಯದ ವ್ಯತ್ಯಯ, ವಿಮಾನ ವಿಳಂಬ ಮತ್ತು ನಿಗದಿತ ವೇಳಾಪಟ್ಟಿಯಲ್ಲಿನ ಬದಲಾವಣೆಗಳು ಉಂಟಾಗಬಹುದು ಎಂದು ಕಂಪೆನಿ ಒಪ್ಪಿಕೊಂಡಿದೆ.
ಭಾರತೀಯ ವಿಮಾನಯಾನಕ್ಕೂ ಅಪಾಯ!
ಏರ್ ಇಂಡಿಯಾ ತನ್ನ ಅಧಿಕೃತ ಸಾಮಾಜಿಕ ಮಾಧ್ಯಮ ವೇದಿಕೆಯಲ್ಲಿ ನೀಡಿದ ಪ್ರಕಟಣೆಯಲ್ಲಿ, “ಏರ್‌ಬಸ್‌ನ ನಿರ್ದೇಶನವನ್ನು ನಾವು ಸ್ವೀಕರಿಸಿದ್ದೇವೆ. ನಮ್ಮ A320 ಫ್ಲೀಟ್‌ನ ಕೆಲವು ವಿಮಾನಗಳಲ್ಲಿ ಅಗತ್ಯವಿರುವ ಸಾಫ್ಟ್‌ವೇರ್/ಹಾರ್ಡ್‌ವೇರ್ ಮರುಜೋಡಣೆ ನಡೆಯಲಿದೆ. ಇದರ ಪರಿಣಾಮವಾಗಿ ಕೆಲವು ವಿಮಾನಗಳಿಗೆ ಅಧಿಕ ಟರ್ನ್‌ ಅರೌಂಡ್ ಸಮಯ ಹಾಗು ವಿಳಂಬಗಳು ಉಂಟಾಗಬಹುದು.” ಎಂದಿದೆ.
ಇಂಡಿಗೋದಿಂದ ಪ್ರಯಾಣಿಕರಿಗೆ ಮುನ್ನೆಚ್ಚರಿಕೆ
“ಜಾಗತಿಕ A320 ಫ್ಲೀಟ್‌ಗೆ ಏರ್‌ಬಸ್ ನಮಗೆ ತಾಂತ್ರಿಕ ಸಲಹೆ ನೀಡಿದೆ. ನಮ್ಮ ಫ್ಲೀಟ್‌ನಲ್ಲಿ ಕಡ್ಡಾಯ ಸುರಕ್ಷತಾ ನವೀಕರಣಗಳನ್ನು ಆದ್ಯತೆಯಿಂದ ಕೈಗೊಳ್ಳುತ್ತಿದ್ದೇವೆ. ಇದರಿಂದ ಕೆಲವು ವಿಮಾನಗಳ ಸಮಯದಲ್ಲಿ ಸಣ್ಣ ಮಟ್ಟದ ಬದಲಾವಣೆಗಳು ಅಥವಾ ವಿಳಂಬಗಳಾಗುವ ಸಾಧ್ಯತೆ ಇದೆ. ದಯವಿಟ್ಟು ವಿಮಾನ ನಿಲ್ದಾಣಕ್ಕೆ ಹೊರಡುವ ಮೊದಲು ಆಪ್ ಅಥವಾ ವೆಬ್‌ಸೈಟ್‌ನಲ್ಲಿ ಇತ್ತೀಚಿನ ವಿಮಾನ ಸ್ಥಿತಿಯನ್ನು ಪರಿಶೀಲಿಸಲಾಗುವುದು” ಎಂದಿದೆ.
ಸುರಕ್ಷತಾ ನವೀಕರಣ
ವಿಮಾನ ಹಾರಾಟ ನಿಯಂತ್ರಣ ವ್ಯವಸ್ಥೆಗಳಲ್ಲಿ ಡಿಜಿಟಲ್ ಸಿಗ್ನಲ್‌ಗಳು ಅತ್ಯಂತ ಮುಖ್ಯ. ತೀವ್ರ ಸೌರ ವಿಕಿರಣ (Solar Radiation Storm) ಸಂಭವಿಸಿದಾಗ, ಕೆಲವು ಎಲೆಕ್ಟ್ರಾನಿಕ್ ಘಟಕಗಳಲ್ಲಿ “ಡೇಟಾ ಕರಪ್ಷನ್” ಸಂಭವಿಸುವ ಸಾಧ್ಯತೆಯನ್ನು ಏರ್‌ಬಸ್ ಗುರುತಿಸಿದೆ. ಇದೊಂದು ಅಪರೂಪದ ಪರಿಸ್ಥಿತಿ ಆದರೂ, ವ್ಯಾಪಕವಾಗಿ ಬಳಸಲಾಗುವ A320 ಕುಟುಂಬದ ವಿಮಾನಗಳ ಸಂಖ್ಯೆಯ ಹಿನ್ನೆಲೆಯಲ್ಲಿ, ಮುನ್ನೆಚ್ಚರಿಕಾ ಕ್ರಮಗಳನ್ನು ಜಾಗತಿಕ ಮಟ್ಟದಲ್ಲಿ ಕಡ್ಡಾಯಗೊಳಿಸಲಾಗಿದೆ.
ಪ್ರಯಾಣಿಕರಿಗೆ ಸಲಹೆ
-ವಿಮಾನ ನಿಲ್ದಾಣಕ್ಕೆ ಹೋಗುವ ಮೊದಲು ನಿಗದಿತ ವಿಮಾನ ಸ್ಥಿತಿ ಪರಿಶೀಲಿಸಬೇಕು.
-ಸಮಯ ಬದಲಾವಣೆಗಳು ಹಾಗೂ ವಿಳಂಬಗಳ ಸಾಧ್ಯತೆಯನ್ನು ವಿಮಾನಯಾನ ಸಂಸ್ಥೆಗಳು ಈಗಾಗಲೇ ಎಚ್ಚರಿಸಿವೆ.
-ಸುರಕ್ಷತಾ ನವೀಕರಣಗಳನ್ನು ಶೀಘ್ರ ಪೂರ್ಣಗೊಳಿಸಲು ವಿಮಾನಯಾನ ಸಂಸ್ಥೆಗಳು ಹಗಲಿರುಳು ಕಾರ್ಯನಿರ್ವಹಿಸುತ್ತಿವೆ.