ಕಿನ್ನಿಗೋಳಿ: ಮರ ಕಡಿಯಲು ಹೋದವನು ಮರದಲ್ಲೇ ತಲೆ ತಿರುಗಿ ಸಿಲುಕಿದ್ದು, ಅಪಾಯದ ಸ್ಥಿತಿಯಲ್ಲಿದ್ದವನನ್ನು ರಕ್ಷಿಸಿದ ಘಟನೆ ಕಿನ್ನಿಗೋಳಿ ಚರ್ಚ್ ಬಳಿಯಲ್ಲಿ ನಡೆದಿದೆ. ಕಿನ್ನಿಗೋಳಿ ಪಟ್ಣ ಪಂಚಾಯತ್ ನ ಮನವಿಯಂತೆ ಅಪಾಯಕಾರಿ ಮರಗಳನ್ನು ಅರಣ್ಯ ಇಲಾಖಾಧಿಕಾರಿಗಳು ಕಡಿಯುತ್ತಿದ್ದರು. ಈ ಸಂದರ್ಭ ಮರ ಕಡಿಯುತ್ತಿದ್ದ ಕೆಮ್ಮಡೆ ನಿವಾಸಿ ಹರೀಶ್ ಮತ್ತು ಮತ್ತೊಬ್ಬ ಯುವಕ ಮರವನ್ನು ಏರಿದ್ದರು, ಹರೀಶ್ ಅವರಿಗೆ ಮರದಲ್ಲೆ ತಲೆ ತಿರುಗುವಂತಾಗಿದ್ದು ಅಪಾಯದಲ್ಲಿದ್ದರು.
ಅರಣ್ಯಾಧಿಕಾರಿಗಳಿಗೆ ಮತ್ತು ಪಂಚಾಯತ್ ಸಿಬಂಧಿಗಳಿಗೆ ಈ ಸಂದರ್ಭ ಏನು ಮಾಡಲಾಗಲಿಲ್ಲ, ಈ ರಸ್ತೆಯಲ್ಲಿ ಸಾಗುತ್ತಿದ್ದ ಏಳಿಂಜೆ ಪಟ್ಟೆ ನಿವಾಸಿ ಎಲೆಕ್ಟ್ರೀಶನ್ ವಿಜಯ ಅಮೀನ್ ಕೂಡಲೇ ಮರವನ್ನೇರಿ ಹರೀಶ್ ಅವರ ಸೊಂಟಕ್ಕೆ ಹಗ್ಗವನ್ನು ಬಿಗಿದು ಕೆಳಗೆ ಬೀಳದಂತೆ ನೋಡಿಕೊಂಡರು. ನಂತರ ಅರಣ್ಯಾಧಿಕಾರಿಗಳು ಕ್ರೈನ್ ತಂದು ಹರೀಶ್ ಅವರನ್ನು ಕೆಳಗಿಳಿಸಿದರು. ವಿಜಯ್ ಅಮೀನ್ ಪಟ್ಟೆ ಅವರ ಸಾಹಸ ಎಲ್ಲರೂ ಮೆಚ್ಚುವಂತಾಗಿದೆ.