“ಮೊಯಿದೀನ್ ಬಾವಾ ಜೆಡಿಎಸ್ ನಿಂದ ಸ್ಪರ್ಧಿಸಿ ಬಿಜೆಪಿಗೆ ಲಾಭ ಮಾಡಿಕೊಡಲಿದ್ದಾರೆ!!” -ಬಾವಾ ಆಪ್ತನ ಸ್ಫೋಟಕ ಹೇಳಿಕೆ!!

ಮೊಯಿದೀನ್ ಬಾವಾ ಆಪ್ತ ಮರಳಿ ಕಾಂಗ್ರೆಸ್ ಗೆ!!

ಮಂಗಳೂರು: ಮಾಜಿ ಕಾಂಗ್ರೆಸ್ ಶಾಸಕ, ಸದ್ಯ ಪಕ್ಷ ಟಿಕೆಟ್ ಕೊಟ್ಟಿಲ್ಲ ಎಂದು ಪಕ್ಷ ತೊರೆದು ಜೆಡಿಎಸ್ ಸೇರಿ ಮಂಗಳೂರು ಉತ್ತರ ಕ್ಷೇತ್ರದ ಅಭ್ಯರ್ಥಿಯಾಗಿರುವ ಮೊಯಿದೀನ್ ಬಾವಾ ಅವರ ಆಪ್ತ, ಅವರ ಚಾಲಕನಾಗಿದ್ದ ನಿಜಾಮ್ ಗುರುಪುರ ಅವರು ಸೋಮವಾರ ಸಂಜೆ ಮರಳಿ ಕಾಂಗ್ರೆಸ್ ಪಕ್ಷಕ್ಕೆ ಸೇರ್ಪಡೆಯಾಗಿದ್ದಾರೆ.
ನಗರದ ಖಾಸಗಿ ಹೋಟೆಲ್ ನಲ್ಲಿ ಸುದ್ದಿಗೋಷ್ಠಿಯನ್ನು ಉದ್ದೇಶಿಸಿ ಮಾತಾಡಿದ ಅವರು,
ಉತ್ತರ ಕ್ಷೇತ್ರದಲ್ಲಿ ಜೆಡಿಎಸ್ ಪಕ್ಷಕ್ಕೆ ಯಾವುದೇ ರೀತಿಯಲ್ಲಿ ಜನಬೆಂಬಲ ಇಲ್ಲ. ಮಾಜಿ ಶಾಸಕರು ಬಿಜೆಪಿ ಪಕ್ಷಕ್ಕೆ ಲಾಭ ಮಾಡುವ ದೃಷ್ಟಿಯಿಂದ ಪಕ್ಷ ತೊರೆದಿದ್ದಾರೆ ಎಂದು ಆರೋಪಿಸಿದರು.
“ಮೊಯಿದೀನ್ ಬಾವಾ ಜೆಡಿಎಸ್ ಸೇರ್ಪಡೆಯಿಂದ ಕಾಂಗ್ರೆಸ್ ಪಕ್ಷಕ್ಕೆ ಯಾವುದೇ ತೊಂದರೆಯಿಲ್ಲ. ಅವರು ಪಕ್ಷೇತರರಾಗಿ ಸ್ಪರ್ಧೆ ಮಾಡುತ್ತಿದ್ದರೆ ಸ್ವಲ್ಪ ಮತಗಳು ಬೀಳುತ್ತಿತ್ತು. ಆದರೆ ಈಗ ಅವರಿಗೆ ಬೆರಳೆಣಿಕೆಯ ಮತಗಳು ಮಾತ್ರ ಬೀಳಬಹುದು. ಜೆಡಿಎಸ್ ಪಕ್ಷವನ್ನು ಇಲ್ಲಿ ಜನರು ನಂಬುವುದಿಲ್ಲ. ಜೆಡಿಎಸ್ ಗೆ ಮತ ನೀಡುವುದು ಬಿಜೆಪಿಗೆ ಹಿತ ಎನ್ನುವ ವಿಷಯ ಜನರಿಗೆ ತಿಳಿದಿದೆ. ನಾನು ಕಾಂಗ್ರೆಸ್ ಪಕ್ಷದ ನಿಷ್ಠಾವಂತ ಕಾರ್ಯಕರ್ತನಾಗಿದ್ದು ಬಾವಾ ಜೆಡಿಎಸ್ ಸೇರಿದ ಬಳಿಕ ಸುಮ್ಮನಿದ್ದೆ. ಈಗ ಮತ್ತೆ ಕಾಂಗ್ರೆಸ್ ಗೆ ಮರಳಿ ಬಂದಿದ್ದೇನೆ ಎಂದರು.

ಇದೇ ವೇಳೆ ಬಾವಾ 5 ದಿನಗಳ ಹಿಂದೆಯೇ ಜೆಡಿಎಸ್ ಬಿ ಫಾರ್ಮ್ ತಂದಿದ್ದು ನಿಜವೇ ಎಂದು ಕೇಳಿದ ಪ್ರಶ್ನೆಗೆ ಈ ಬಗ್ಗೆ ಮುಂದಿನ ದಿನಗಳಲ್ಲಿ ವಾಸ್ತವ ಸಂಗತಿ ಬಿಚ್ಚಿಡುವುದಾಗಿ ಹೇಳಿದರು.